Read Kambera MA-PABOBARUNGU 7 Bible Online

MA-PABOBARUNGU 7 - Kambera bible

MA-PABOBARUNGU 7

¹Na tamu na mahàmu narihi hàmupa welingu la mbui kati mambotu wilina; dàngu na lodu meti narihi hàmupa welingu la lodu dedi.

²Narihi hàmupa ba lua la uma mameti welingu la ngia pambabu. Ba lupangu ta-pangàda mànunya na meti ba nedi ndàba-nanya na tau.

³Na hawina narihi hàmupa welingu la riki tanggaka. Jiapa ka ringulangu-kai, mili na-hawewa na eti.

⁴Na tau nduba na kanuki mànuya na mbaha eti; na tau paeti na kanandi mànunya na meti.

⁵Narihi hàmupa jàka na-kanyàngi-nda tau manggàna, welingu ba nawotu-nda tau ànga.

⁶Na riki tau nduba nda ningua ihina, hama tuna kalàla mapa - pàrana la epiya.

⁷Jàka na-palapingu na tau paeti, nduba-nanya la pawunda-na; jàka nakei àmahu horungu na tau, iraku-nanyaka na hurina.

⁸Narihi hàmupa na njàpuna na hau lii welingu la pakiri-na; narihi hàmupa na lerangu eti welingu la ngànjangu.

⁹Àmbu rengga mbeni; ba mbulungu tau nduba-a na matuu kiringu.

¹⁰Àmbu paàrangu-du, “Nggikina hi narihi pahàmu la handàka-na welingu la rehi nàhu?” Ba mbulungu tau ànga-a ma-paàrangu tuna nu.

¹¹Na tau luri lupangu-ma bàdi na-manggàna; na wilina na manggàna na-pahama dàngu na kangeha;

¹²na-pahama-mbu dàngu àmahu ma-pamambiru. Nggamu na mamangu-nya na pingu dàngu na-manggàna, jiaya na ma-mànangu!

¹³Hamata-ya na paràma-na i Ala. Nadu nggamu nu ma-ngalangu pa-pakunduhu-ya jàka nggàraya na pambàda pa-kaleka-na i Ala?

¹⁴Ba tuna, hawola-wa jàka talànga pa-kanyurungu-mu. Tàka jàka nanggàna-kau hanggàmaru, àmbu maromba-dunya ba i Ala ma-wuangu-ha nuda pa-kadua-da. Nyuta duta nda tapi-anya jàka nggàraya na manjadi la rehi na-manàmu-nya.

¹⁵Na luringgu nda ningua linguna, tàka la ngala luringgu kuita-ha yiada da patiki pa-ndàkingu: Talànga handàka-na na tau mahàmu na-manjurangu, jiapa-kai ka na-manundu. Talànga handàka-na na tau akatu namalai na lurina, jiapa-kai ka daingu njalana.

¹⁶Àmbu lalu hàmu-dumu dàngu àmbu lalu manggàna-mbu. Nggàra linguna na pameti wiki?

¹⁷Àmbu lalu akatu-mbu dàngu àmbu lalu ndubambu. Ka nggikina hi meti la ndedi rehina?

¹⁸Wiliru-nja nuda pa-kadua-da. Jàka ta-mangàdatu-nya i Ala, jiangu-ma ba mahàmu-ya na pangala-nda.

¹⁹Na manggàna na-pawiti-nya na mamangu-nya parihi kaborangu welingu la tau hakambulu ma-kawaha-ya na hau paraingu.

²⁰La pinu tana yiana nda ningua tau manda ningu nyurangu; nda ningua mawunda mànu mahàmu dàngu mandedi njala ndokuma.

²¹Àmbu mbuhangu-du pa-patingingu pabanjarungu, raï ai duna hi ràtu-nanggau-padua paraïna haàtu tau pa-palewa.

²²Nyumu wiki upimbunya ba mbàda ràtungu-muka tau hawiangu.

²³Mbuu ndàbada nuda kukaka wànja manggàna-nggu. Ba tuna hama huka himbu-nggunya na manggàna, hama huka marauna welingu lai nyungga.

²⁴Nggamu ma-ngalangu pahunggu-ya na ihina yiana na luri? Lalu tanjiku-na la pa-jàngapu-ya!

²⁵Ba tuna nutakungu-manggunya pa-papekangu dàngu pahimbu-ya na papingu wàngu kapeku ngalangu-nggu manggàna dàngu hemana mbuu ndàbana na paàrangu-ka. Ku-kamangu la pa-jàngapu-ya ba ndubaya na njala, dàngu ba kita etiya na akatu.

²⁶Kuhunggu-ya ba narihi paita-pa na kawini welingu la meti. Na mbuhangu-na na kawini beri jala dàngu oka kahili-ya na ma-ehingu pa-njàkilu payàpa-na. Na parohu-na beri tangga kihungu-ya. Na tau mawunda-ya na pambuha-na i Ala na-hinggilu welingu la hiruna, tàka na tau njala jiangu-ma na-tanawa-nya.

²⁷Tàngaru, wàna i Ma-tanjiku Kanandingu: Mbuu ndàbada nuda kuhunggu-ha, ba kungeri kangu - ngutungu hemada.

²⁸Himbu manggu-nyapa hemada hawiangu, ba tuna nda kuhunggu-a. La honga tau harata, kuhunggu-pa haàtu tau mini patembi-nggu. Tàka la hongada nyuda nda ningu-a kawini paràka patunggu wili.

²⁹Didi-aya yiana na pahunggu-nggu: I Ala nawulu-ta ràka ma-ana dàngu tuda ma-ana. Tàka nyuta wikima ma-pakalutu wikinda dàngu ma-nggunangu-ngganangu.