Read Kambera MA-PABOBARUNGU 8 Bible Online

MA-PABOBARUNGU 8 - Kambera bible

MA-PABOBARUNGU 8

¹Kanjupu hàmu-aya na tau manggàna. Napinya hemana mbuu ndàbana. Na manggàna na-pahamemu mbaha etiya, hi na-tawelahu mànu na matana.

²Patutu-manya jàka na-wuangu pareta-na na hanganji, dàngu àmbu àtalu pa-ràndingu biamu lai Ala.

³Na hanganji àtalu wàngu biana etina, jàka nda na nggàna la etina, rihi hàmu maraunya.

⁴Na-paluangu limana na hanganji ba pa-mahumbarungu-ya; nda ningua matoru mbeni papanda-ya!

⁵Na tau na-makaradaku-nya na-mambiru dàngu na lànyapu; na tau paeti napinya na rehina dàngu nggiki hamana ba karadaku la hanganji.

⁶Nduma mbuu ndàbana ningu rehina dàngu pata mehana, tàka hakudu-ana na pa-jàngapu-nda!

⁷Nda haàtu-a mapinya jàka nggàraya na urana na manedi-nya, dàngu nda ningua mapanii hahanya jàka nggàraya na manjadi ngeru.

⁸Nda haàtu-mbu ma-ngalangu papàtu-ya jàka ndia ma-ngalangu pa-pakanduli-nya na rehi metina. Nuna nu pa-udulungu panda peku hinggilungu-ya, nda peku mara-ana welingu lai nu, jiapa-kai ka nawàngu wulu aka dàngu màhina.

⁹Yiana mbuu ndàbana kuita-ya ba ku-hamata-ya mbuu ndàbana na manjadi la pinu tana. Talànga handàka-na na tau nawàngu kawaha-na ka pa-hanggàmaru-ya na anguna.

¹⁰Mbàda ita-nggunya ba nameti dàngu ba taninya na tau akatu. Tàka ba nabeli na tau welingu la retina, dawotu-nya nyuna la paraingu ngia pawunda-na ma-akatu. Ba tuna, nuna nu kahewa-mbuna.

¹¹Ka nggikina hi dira mudaya nawunda-na ma-akatu na tau? Rukuna ba nda palu wuanya hukungu.

¹²Jiapa ka hangahu ma-akatu pawunda-na na haàtu tau njala, pa-daingu luri biana dàngu namalai-mbu na lurina. Nakàli panii wàngu na tau, na ma-mangàdatu-nya i Ala, jiangu-ma namuda ndàba na lurina.

¹³Tàka pàku na tau akatu nadangu na handuka pahunggu-na. Na lurina narengga làpahu hama tuna ninuya. Napa nameti kanguraku ba nda na-mangàdatu-nya i MIRI, kàli wàda.

¹⁴Ba tuna nuda mbuu ndàbada panii ma-kakòlulu-ya. Tàngaru biaya, nggàraya na manjadi la pinu tana: Ningu tau manundu pa-hukungu hama tuna tau katadaku, ningu tau akatu pa-palimbangu hama tuna tau manundu. Ba tuna, nunambu kahewa-ma-ana.

¹⁵Na pa-pambulunggu la kanandingu-nggu tuna yia, na tau lupangu-ma bàdi na-hawola. Nadu la lurina la pinu tana nda ningua hili hau mbaha eti ndumana, didi-ma-ayaka na ngangu, na ngunungu dàngu na hanggela na hawola. Nuna-ma-ayaka na papàda-na la wunda njilina, la lurina na pawua-nanya paraïna i Ala.

¹⁶Ba ku-pamukarungu pangala-nya na manggàna, dàngu hamata-nggunya mbuu ndàbana na manjadi la pinu tana yiana, ka jàngapu-dunggu-nyaka, jiapa-kai ka taràma lodu rudungu dàngu nda ana hangahu-nda,

¹⁷nda tatoma-a la papinya na pawunda-na i Ala. Jiapa ka nggiki hama pamukarungu-nda, nda jia manyàmu-andanya. Na tau paeti, kupinya wàna, tàka làti duna nda napi-anya.