Read Kambera LUDU BOKULU 3 Bible Online

LUDU BOKULU 3 - Kambera bible

LUDU BOKULU 3

¹La ngia pa-katuda-nggu la rudungu, ku-manggadipa-nya na wuranggu; kuhimbu-ya, tàka nda kuhunggu-aya.

²Ku-mbuhangu pa-winggiru-nya na paraingu, panjada-nja mbuu ndàbada da ànda dàngu da kanjilitu-na. Kuhimbu-ya na wuranggu wànggu; tàka kahewa-ma-ana.

³Daita-ka maronda la paraingu, hi ku-paàra-nja, “Mi-itaya dimi na wuranggu?” wànggunja.

⁴Hinama-apa ba kumàta-nja nyuda, hàmburu-nggunyaka na wuranggu. Hi nda kupuli-nya palaku, kuàpa pamàndu-nya lundu ku-karia-nya la uma inanggu, la kurungu-na i ina ma-paana-ngga.

⁵Ha dimi bidi kawini Yeruhali, pa-njanjingu-wa, la parongu-da da ruha dàngu da bai hawurungu la maràda, ba ndai kuwaru-ya na pa-mbuhangu, hi lundu nahoda-ya.

⁶Nggàraya nina na manàmu-nya welingu la maràda telangu, hama kutungu matimbi-ya? Na mbii katina hama muru dàngu kaminyangu-ya, dàngu da mbàndaku mbii kati welingu la ma-danggangu.

⁷Tàngaru, na kanjàka paduku manguna i Halomu, na-winggiru-nya nomu kambulu ma-kaborangu, da ma-kaborangu la Ihirailu,

⁸da ma-kanjupu màhi la pabera. Nyuda mbuu ndàbada dangàndi hapanda la banggida ba ehingu-madanya jàka ningu ma-kaluluku maru - rudunja.

⁹Na-pandoi kanjàka paduku nduma wikina i Halomu, welingu la ai ma-kanjupu hàmu.

¹⁰Da kambaniru-na welingu la àmahu baraha, welingu la àmahu raraya na hariangu-na. Na ngia pa-mandapu-na pa-palàmbarungu tera umbaya, pa-pahikungu wàngu mbaha eti paraï da kawini Yeruhali.

¹¹Luhuwa ha dimi bidi kawini Hiungu, tàngaru-yawa i Hanganji Halomu dàngu tubuku-na na-pawotu-na na inana, la lodu laleina, la lodu hanggela hawola-na.