Read Kambera LUDU BOKULU 4 Bible Online

LUDU BOKULU 4 - Kambera bible

LUDU BOKULU 4

¹Umananda pa-nggajungu, dou i tuturu-nggu duku, langatàka, umananda panggajungu. Da wua matamu hama kulundiha-ha la hambeli tamalingu-mu; na lunggimu hama tuna kabàba kamàmbi ma-kamburungu la tandula - tandula la Nggiliatu.

²Da ngandumu dabara kajilaku beri kabàba mbimbi pabidi kikiru dàngu paihu; dàngu pa - papa-mada hama tuna mbimbi ana ndua, nda ana haua ma-àlingu.

³Da-pa-malàmihu lulu kamba rarangu, da tada ngarumu, na-manandangu na ngarumu. Da papumu hama tuna kabika wua njalima-ha, la hambeli tamalingu-mu.

⁴Na nggorumu beri hama tuna da lewatu-na i Ndautu, ngia pa-bànjalu pambeni wàngu. Da hàdamu hama harata temingu-ha, palu panunggalu-da da ma-kaborangu-ka.

⁵Da huhumu beri dua ngiu ana ruhaha, ruha ana ndua maniti rumba la honga wàla mangàta.

⁶Ku-rinjungu palua la palindi muru, la tandula kaminyangu, hi lupa na-hapuputu na ngilu mbaru, na ma-payila-nya na kapàta rudungu.

⁷Dou i tuturu-nggu duku, umananda pa-nggajungu, nda ningu nyuramu.

⁸Màla ka tapuru welingu la Limbanongu, dou na bidi papanggu duku, màla ka tapuru welingu la Limbanongu. Puruwa welingu la pinuna na Amana, welingu la pinuna la Heniru dàngu Herumungu, ngia pa-ngiangu mahangu kadutulu dàngu hinga.

⁹Dou i eri ràmbu na bidi papanggu duku, na taraku wua matamu, dàngu da hàda la nggorumu dayila-ya na etinggu.

¹⁰Nambuha-mungga eri ràmbu nawàngu pa-bàrangu na etinggu, narihi làngga-mapa welingu la angguru. Na mina mbii katimu na-hambungaru, nalàpa ndàbaha da ngara raungu-ka.

¹¹Na làngga kareuku-mu, dou bidi papanggu, hama làngga manggalua weli wingungu dàngu wai huhuya. Da pakimu hama mbii katina na Limbanongu-ya.

¹²Na wuranggu woka pa-kangelingu-ya, woka pa-kangelingu, matawai pakuhi-ya.

¹³Lai nu datumbu da njalima, dàngu dawua-da ma-kanjupu hàmu nganguda. Wàla ai bidi papa dàngu narawàtu,

¹⁴narawàtu, wingiru, ai kaninggu dàngu tibu, dàngu ma - màtu ai kaminyangu. Emuru dàngu rutuhu homa, dàngu ma - màtu raungu papindi.

¹⁵Na matawai la wokanggu na-kabubalungu wai luri na ma-lulungu welingu la Limbanongu!

¹⁶Hadangu-wa dimi, ngilu weli diangu, maiwa dimi ngilu weli lurungu! Hapuputu-wa la wokanggu, ka na-hambungaru na mbii katina. Màla àruki na wuranggu ka namai la wokana, ka nangaanja da wuada da pingi aina da mahàmu nganguda.