Read Kambera LUDU BOKULU 5 Bible Online

LUDU BOKULU 5 - Kambera bible

LUDU BOKULU 5

¹Mainggunya la wokanggu, dou na wuranggu, bidi papanggu, ku-pauhi-nja da muru dàngu da raungunggu; kungaanja da tangiwa manggaluangu dàngu da manggaluangu-nggu, kuunu-nja da wai huhu dàngu da wai angguru-nggu. Ngangu dàngu ngunungu-wa, mbuu ndàbami angu mbuha, ngunungu-wa lundu imangandu la pangangu eti pakati puhumi.

²Ku-katuda, tàka ba tuna na etinggu na-pawàla. Ronguya ba na-katorukungu pindu na wuranggu. Bunggahu-ngga pindu, dou i eri ràmbu, na wuranggu, na kulundiha-nggu, mahini-ya na etinggu; nambaha na katiku-nggu la wai hamburungu, na lungginggu nambinu-nya kambàtiku hamburu rudungu.

³Mbàda kalàba-ngguhaka da pakinggu; kuhili hau beli-haka bàdi? Mbàda baha-ngguka wihinggu, ku-pa-marihaku beli-haka bàdi?

⁴Na-bàrangu na etinggu ba naàpa-ya na kaleki pindu paraïna wuranggu.

⁵Ka hadangu-nggunyaka pa-bunggahu-nya pindu na wuranggu. Wà - wàtida da emuru welingu la wua limanggu, hi nambaha na kaleki pindu.

⁶Ku-bunggahu-nya pindu na wuranggu, tàka mbàda hambàda-yaka. Kanjupu rinju-nggunya na talia liina; kuhimbu-ya, tàka kahewa-ma-ana. Kutiki-ya na tamuna ba kupaau-nya, tàka nda nahema-a.

⁷Da-hàmburu-ka tau maronda la paraingu; hi dapalu pa-manua-ka, dapiti leranya na halenda-nggu.

⁸Pa-ràndingu-wa ha dimi bidi kawini Yeruhali, jàkai hàmburu-ya na wuranggu, panii àrunya, ba hidu-nggunya paraï parinju-nya na pangangu eti pakati puhu.

⁹Ka narihi-mapa na wuramu welingu la hawiangu, ha dumu hiliwuku ma-kanjupu nggajungu? Ka narihi-mapa na wuramu welingu la hawiangu, tàka hiu paràha-nggama pa-paràndingu?

¹⁰Na-nggajungu dàngu na-kapàru na wuranggu, hau miniya la honga 10.000.

¹¹Na katiku-na hama àmahu raraya, àmahu rara ihi mbàngina, na lunggina na-kaledi dàngu na-mitingu hama miti ngganggaya.

¹²Da wua matana beri kulundiha la matawai-ha, kulundiha mahàla paihu la wai huhu, na ma-rànjaku la hingi tàma.

¹³Da papuna hama manandangu woka ruu ai mambii katiha, da tàda ngaruna hama wàla mangàta ma-kambàtikungu muru weli wingungu-ha.

¹⁴Da-manandangu da limana, ningu tawuru àmahu rara maningu matangu-na, na ihina hama nggajungu-na na nggedingu pa-pandikungu watu nilàmu-ya.

¹⁵Dawihi-na hama kambaniru màmaru bara ma-latangu marara-ha; nyuna hama nggajungu-na na Palindi Limbanongu-ya, hama mangarangu pingi ka hàbaru-ya.

¹⁶Kanjupu màtaku-ya na kareuku-na, mbuu ndàbada lai nyuna da-payila eti. Tuna nudu na wuranggu dàngu na kandua-nggu duku, ha dimi bidi kawini Yeruhali!