Read Kambera LUDU BOKULU 6 Bible Online

LUDU BOKULU 6 - Kambera bible

LUDU BOKULU 6

¹La ngginiya nalaku ningu na wuramu dumu, hiliwuku ma-kanjupu nggajungu? Nggi tubaya nalaku ningu, ka mahimbu-mbuyai duma?

²Na wuranggu lua-nanya la wokana, la woka raungu la papawa-nja da mbimbi la woka, dàngu la papàpu wàla mangàta.

³Nyungga manguna nyunaka na wuranggu, tàka nyuna mangunggu nyunggaya, napawa-nja da mbimbi la njonga da mangata.

⁴Umanandangu, dou na wuranggu duku, manandangu hama tuna na paraingu Yeruhali, manandangu hama tuna na paraingu Tiràhu. Upa-maratangungu, hama tuna pamba tanatara dàngu da penjida.

⁵Pambeli-nya na matamu welingu lai nyungga, nadu na tàngaru-mu na-pambingu-ka. Na lunggimu hama tuna kamàmbi ha-kabàba ma-kamburungu tandula la Nggiliatu.

⁶Da ngàndumu dabara kajilaku hama bara mbimbi ha-kabàba da pabidi kikiru hi ihuha; da-pa-papangu hama tuna da ana ndua - ana ndua mbimbi, nda hau-a ma-àlingu.

⁷Da papumu hama kabika wua njalima-ha, da-pa-kambelingu la hambeli tamalingu-mu.

⁸Jiapa ka nomu kambulu-ha da papaha maràmba, ka bonja-kinja walu kambulu kala wihi, dàngu bidi kawini panda taü,

⁹ba tuna didi-aya nyuna na kulundiha-nggu, na maninya la etinggu, ana kamehangu pambuha ina-nanya. Nyuna daita-ya dàngu dawotu ndàbanya kawini, dàngu da-hangàtaru-mbunya papaha maràmba dàngu kala wihina.

¹⁰Nggamuya na manàmu-nya beri hama tuna ma-rarangu kiri awangu harii mbaruya, ba na-pamananda wulangu tambulu mbenyaku, ba na-kahingiru tuna lodu bidi hunga? Kanjupu pa-maratangungu-ya, hama tuna pamba tanatara dàngu da penjida.

¹¹Kumai la woka kanari, pa-hamata wàla ma-kapunju la lolangu; raï-ai-duna hi ningu bia kapunju wàla angguru, jàka mbàda wàla-daka da njalima.

¹²Kanjupu rinju-nggunya nambuha-mungga, hama tuna ba ku-rinjungu pa-kaliti kareta pabera pa-karia-nja da tau bokulu.

¹³Renjawa dumu hiliwuku Hulàmu, punji - punjilungu-wa ka ma-hangàtaru-nggau. Ka nggikina hi imbuhangu pa-tàngaru-ka, ba talànga renjanggu la njonga tau ma-imingu?