Read Kambera LUDU BOKULU 8 Bible Online

LUDU BOKULU 8 - Kambera bible

LUDU BOKULU 8

¹Ai jàka ana mini wiki-nggunggau làti, mambàda huhu la huhu inanggu, jiangu-ma ku-puduku-kau jàka ku-hàmburu-kau la ànda, nda jia ningua ma-paaka-ngga.

²Ku-karia-nggau la uma inanggu, ka peku papeka-mungga nyungga. Napa kuwua-nggau wai angguru patungu mawau hiritu, wai wua njalima kau unungu.

³Na lima kalaimu na-pakala-ngga nyungga, na lima kawana-mu narohu-ka.

⁴Ha dimi bidi kawini Yeruhali, pa-njanjingu-wa lai nyungga, ba nda jia kuwaru-aminya, na pambuhangu-ma, ka lupa nahoda-ya.

⁵Nggamuya nàmu welingu la maràda telangu, na ma-haria la wurana? Kubengi-nggau nyumu la lumbu pingi àpilu, lai nuduya na ngia patumbu-mu dàngu na ngia pa-habola-nggau.

⁶Tuu-kawa wuramu nyungga, àmbu jia ningudu parohu-mu hinggilu-nggu nyungga; nadu ba hama mbangatu metiya na mbuhangu, dàngu hama kuaha metiya na kabàliku la pa-paangungu. Na rokana hama tuna roka epi ma-kandulangu-ya.

⁷Na wai dangu nda namàka-a papàda-ya na mbuhangu, dàngu nda na-ngalangu-a pa-kauta-ya iwa. Ngera hama tuna jàka ningu makei wànya banda malanja na mbuhangu, mbulungu payudi-ma-a pangala-na.

⁸Ninya haàtu na ana winima dakudu-apa da huhuna. Nggàraka bàdi pawunda-manya jàka ningu mamai pakarai-ya?

⁹Ngera hama tuna jàka hau kangeli-ya nyuna, mawulu-nya lewatu àmahu bara la pinuna. Ngera hama tuna jàka pindu habongalu-ya làti, ma-dimbaku wànya oka atu kajiu.

¹⁰Nyungga hau kangeli-ka, da huhunggu lewatu-nanja. Na wuranggu napinya ba ku-paohangu lai nyuna.

¹¹Ningu woka angguru-na i Halomu la Mbaàlu-Hamungu; nawua-ya la madaiya nuna na woka. Nimbihu-da da mbayaru harata àmahu bara hiluna na ihina,

¹²dàngu hi da-ngalangu dua ngahu wunda jàrada. Màtawa ka ndumamu nyumuha da ndui hi Halomu, dàngu ndumada da madai wokamu. Tàka na woka angguru-nggu, na mangu wikinggu, nimanya duku la hangganggu.

¹³Ha dumu ma-ngiangu la woka, da-rinjungu da angunggu, parongu-ya na talia nggorumu; parongu-ngganya nuna lai nyungga!

¹⁴Dou na wuranggu duku, pa-maingu-wa hama tuna bai hawurungu, hama tuna ana ruha la Palindi Mbetiru.