Read Kambera YAHAYA 11 Bible Online

YAHAYA 11 - Kambera bible

YAHAYA 11

¹Da wàlana i Hanganji Ndautu hama tuna na pingi ai na pambàda punggu. Ba tuna hama tuna welingu la kanjiru-na ba natumbu na kalunga bidina, tuna numbu welingu la wàlana i Ndautu napa na-kawudaku na haàtu hanganji.

²Na kuaha-na i MIRI napa na-kapipi-ya, jia-duyaka hi na-paeti dàngu hi na-manggàna, namàhi papiti botangu dàngu la pa-pahàra-nya; napinya na pambuha-na i Ala hi na-karadaku-nya Nyuna.

³Pambuha-mananya la pa-manundu lai MIRI. Nda àtalu timbangu-ana duna dàngu nda na-palata-anya na pulu tau.

⁴Na ngera tau mila natimba padeni-manya, na tau nda pa-yatangu wàngu tànji eti-mana ba na kahiri-ya; na tau njala pa-hukungu-ya la hupu liina nyuna, na tau akatu na pamauya.

⁵La ngga - nggàra bia na-paluangu lima wàngu mola dàngu tuturu-na.

⁶Da ahu rumba napa da pa-angungu dàngu mbimbi, da mahangu kadutulu da-katuda angu dàngu kamàmbi. Da ana hapi napa daniti rumba[23] la lihi ana hinga, dàngu anakeda-a napa mapawa-nja.

⁷Napa da hapi dàngu da mbaruangu angu nganguda rumba, da anada napa da-katuda pa-angungu. Da hinga dangangu rembi hama tuna hapi.

⁸Jiapa na haàtu ana rara nda nggàra ehina jàka na-pajulu la lihi kataru pa-upahungu.

⁹La Hiungu Tandula Matua-na i Ala, nda ningu ma-akatu jàka ndia ma-paruha. Napa na paraingu nambinu-nya papi wànya i Ala, hama tuna wai mapinu-ya na tehiku.

¹⁰Napa natàka na rehina ba ninya na haàtu hanganji wàlana i Ndautu na ngia pa-parànja-nanya mata paraï ba - banjaru. Napa damai lai nyuna hi dapeka-nya rihina na ngia pa-ngiangu-na.

¹¹La lodu nuna napa i MIRI nahili handàkungui pawànya na kuaha-na ba nangàndi beliya na banjaru-na na marihi la Ahuru dàngu la Mehiru la tana - tana Pàturu, Hundangu dàngu Elàmu, la Mbambilu, Hamàtu dàngu la nu - nuha mamarau.

¹²Napa i MIRI na-jakarungu hau penji ndumada da banjaru. Nuna hau tandaya ba pauhi beli-nanyaka na banjaru Ihirailu dàngu Yahunda na ma-tanyalangu la mbuu ndàbana na hupu tana, hi nangàndi beliha.

¹³Na pa-hanganji Ihirailu napa nda nahili pakilitu-anyapa na Yahunda, tàka na Yahunda nda nahili muhu-anyapa na Ihirailu.

¹⁴Napa anguda pa-kaluluku-nya na tau Pilitingu la patama lodu dàngu la paramba-nja da banjaru la pahunga lodu. Napa da-panyàku-ha da banjaru Endumu dàngu Muapu, tàka napa na banjaru Amungu da-marubuku lai nyuda.

¹⁵Napa i MIRI na-pamihi-ya la Njobuwai Huwihu. Natuya na ngilu mbana ma-hapuputu hi lupa pihu mbungu ana luku kàrahu-ya na Luku Epuràtu, tàka hi peku pala mangu halapangu-na nimbihu-na na tau.

¹⁶Nduma banjaru-na na marihi, ninguka napa ànda bokulu la paluhu welingu la Ahuru, hama tuna la rehi luhuna na Ihirailu welingu la Mehiru.