Read Kambera YAHAYA 13 Bible Online

YAHAYA 13 - Kambera bible

YAHAYA 13

¹Yiana-yaka na hupu liina i ala, na pakataku-na i Yahaya, anana i Amuhu na rukuna la Mbambilu:

²Pa-kapàdaku-ha da penji pabera la pinu palindi kamulungu! Waranja da ngara tanatara, dàngu pangaku-nya na pungumu tandana màta ka da-kangaburu-ha da pindu bokulu-na na paraingu nuna na ma-ngànjangu.

³I MIRI mbàda paau-nanjaka da mini patara - mini patara papindi. Nyuda da-kaborangu, damo-nungu wikida dàngu ràka pa-wotungu-maha. I MIRI nawua-nja wai ngera la pahuku-nja da tau panggàna mbenina Nyuna.

⁴Patingi-nyawa na linguna na ma-kanyaüru la ma-palindingu, hama tuna kanyaüru tau dangu ma-pauhi. Patingi-nya na kanyaüru-da da pa-hanganji - pa-hanganji dàngu da ba - banjaru ma-pauhi. I MIRI Mahupu-mbiha talànga hamata-nanya na kanguhuru pabera.

⁵Nyuda maida welingu la ta - tana ma-maliru la hupu tana. La dalu hànggana i MIRI jiaha nyuda da pawàna la pa-patàlaru-ya nggubulu-na na pinu tana.

⁶Padudurungu-wa, nadu na loduna i MIRI ba mareni-naka. La lodu nuna na Mahupu-mbiha napa patàka-nanyaka na luju làjaru.

⁷Na tau - tauka napa napàda-nyaka lamanga-na na limana dàngu ba mbulangu-nanyaka na toru mbenina.

⁸Nyuda mbuu ndàbada handauni-nanjaka mangàdatu nda uku dàngu kayili hidu-danyaka hama tuna na kawini paana ba wànaka. Nyuda da maràngga pa-tàngaru wàngu hala etida darara da matada paraï pa-makia.

⁹Na loduna i MIRI napa nàmunya, dàngu la lodu nuna i MIRI pahàla-nanyaka na hànggana dàngu na mbenina na manda najaru. Na pinu tana napa maràda mbila-yaka, dàngu na tauka na manjala napa na-tàlaru.

¹⁰Nimbihu-da da kandunu dàngu da kanguhuru kandunu napa da pànjangu pa-kajilaku; na lodu napa na-kapatàngu la rapa hungana, dàngu na wulangu nda nahili hambila-apa.

¹¹I MIRI napanii, “Napa kuhuku-nya na pinu tana ruku akatu-na dàngu da tau akatu ruku njàlada. Nimbihu-na na tau abungu napa ku-pawawa-ya, na tau ngànjangu dàngu na mambana etina napa kuhuku-nya.

¹²Na tau na mamara hawutu-ada, darihi hawutu-pa welingu la marara ihi mbàngina.

¹³Napa kupa-kandàndaku-ya na awangu dàngu kuyoya-nya na pinu tana welingu la pangia-na la lodu paloha-nggunya na mbeninggu Nyungga, MIRI Mahupu-mbiha.

¹⁴Da tau nàmu la Mbambilu da-paiha ngganggangu hi dapalai la tanada haàtu - haàtu. Hama tuna ruha mapalai welingu la ma-patamangu, jàka ndia na kabàba mbimbi manda ningu mapawa-nja.

¹⁵Nggamu biaya na payàpa napa pakoja-ya hi lupa nameti.

¹⁶Nyuda napa ita wiki-madanja ba pa-làjaru-ha da ana rarada, ba rambanja da umada, dàngu ba rumbaku-ha da papaha-da,” wàna.

¹⁷I MIRI napanii, “Napa kukoda-nya na banjaru Mandai[24] la palàndahu-nya la Mbambilu. Nyuda nda dabihu-a pakei li hambeli ka mabara ka marara-yakai.

¹⁸Dawàngu pàndi dàngu panada napa da-pameti-ha da ana bidi mini. Nyuda nda damila-anja eti da ana rara dàngu nda daaï-aha da anakeda.

¹⁹Welingu la mbuu ndàbada da pa-hanganji, na Mbambilu jia-yaka na marihi manandangu, dàngu da-hamewu wànya paraï tau mangia-nya. Ba tuna Nyungga, MIRI, napa ku-palàjaru-ya, hama tuna ba tunggunya nu la Hondumu dàngu la Nggomora.

²⁰Nda hili ningu-apa napa ma-ngiangu ningu lai nu. Nda ningupa tau Arapu njadangu napa mawulu maüna lai nu, dàngu nda ningu-apa napa ma-pawangu ma-welingu mbimbi kamàmbi-na pangangu rumba lai nu.

²¹Na pa-ngiangu nuna napa pangia-da da banda matàmba-kia-yaka. Da wàngi dawulu hibuda la u - umada nyuda, dàngu da ota maningu kapangu da-ngiangu lai nu napa. Da kamàmbi matàmba napa kaujaku - kaujaku-daka la kanànda paraingu.

²²Da ulu ahu matàmba dàngu ahu rumba napa da panggepi làngingu la lewa - lewatu dàngu la uma - uma hanganji la Mbambilu. Na rapa tanàhaku-na mareni-nanyaka dàngu nda pahili pa-kanduli-anyapa,” wàna.