Read Kambera YAHAYA 16 Bible Online

YAHAYA 16 - Kambera bible

YAHAYA 16

¹Welingu la paraingu Hela la maràda wara, na banjaru Muapu na-pangàndingu ana mbimbi pawotu-na ndumada da ma-kuaha la Yeruhali.

²Da tau Muapu da-patiangu la hingi Luku Arunongu ba dapa - pangga nda patuba hama tuna na ma-hawurungu na payaulu welingu la hibuna.

³Nyuda dapanii dànja da tau Yahunda, “Peka-nggama jàka nggikina wàma-aka bàdi. Màtawa kau pamau-nggama la hambàti mbana lodu, dàngu màta-nggamaka ka ma-engangu la maümu. Nyuma yia tau mamai pa-hinggilu-kama, wini àru-nggama dàngu àmbu kaleka aru-nggama.

⁴Pahia àru-nggama ka mapaengangu la paraimu. Kahiri àru-kama welingu la tau na ma-mbuhangu pa-palàjaru kama,” wàda. (Na ma-panokungu dàngu na ma-palàjaru napa najàpu, dàngu na tau na ma-palàjaru-ya dàngu na maroduku-nya na tana Ihirailu napa na-molungu.

⁵Tunaka nu napa na haàtu na wàlana i Ndautu nanjadi hanganji, dàngu nyuna napa na-pareta-ya na banjaru-na ba nawàngu mbuhangu dàngu tuturu. Nyuna napa na-pandolaku-ya na ma-deningu dàngu narengga pa-luangu lima la palaku-nya na ma-deningu.)

⁶Na banjaru Yahunda napanii, “Nyuma marongu-mayaka na ruku ngambana na banjaru Muapu. Mapi-manjaka nyuda ba da-ngànjangu dàngu ba da-abungu, tàka na paniida nyuda abungu-adanya nda ningu ndoku ihina,” wàna.

⁷Ba tuna màtawa ka da-maràngga pahiingu na banjaru Muapu Màta bianja ka dahii jàka danamu-ha da pangangu mahàmu da pakàli ngada la paraingu Kiri-Harehitu. Màta-njaka ka da mbota monungu dàngu kanjaïku.

⁸Da woka la lihi Hehimbungu dàngu da kaliu angguru Hipuma pa-palàru-haka, da woka na kàli ngia pa-ngalangu-da wua angguru mahàmu halawàla ndumada da ngara ma-kuaha banjaru hi kiri maüku wànguda. Àmangu nuda da woka angguru da lerangu lupa tàka la paraingu Yaehiru, dàngu hanggangu la pahunga lodu tàka la maràda wara, tàka la patama lodu tàka la hapapa Tehiku Meti.

⁹Nàhu nyungga hii-nggunjaka da pingi angguru Hipuma hama tuna ba kuhii-nya la Yaehiru. Ku-pakawàraku-nya wai mata la Hehimbungu dàngu la Eliali, ba nangaa pambuta-haka muhu da ihi tanada.

¹⁰Nda ningu ndokupa haàtu ma-hawewa la woka - woka kamboka nuda. Nda ningu ma-kayaka jàka ndia maludu la woka angguru. Nda ningu-apa mapohu angguru papandoi wai angguru. Mbàda papànja-nggunyaka na pa-oingu hanggela hawola-da.[27]

¹¹Na etinggu namila mumuhu ba kuita-ya na hadana la Muapu dàngu la Kiri-Harehitu.

¹²Na tau Muapu lundu diraya ba na-kandekalu la palindi la ngia pa-lumungu-da pa-hamayangu, tàka nda ningu linguna.

¹³Nuna-duyaka na hupu liina i MIRI àmangu na pawua-na ngerana na Muapu.

¹⁴Nàhu i MIRI napanii, “Tailu mbua ndaungu pa-tumbukungu-kiaka, mbuu ndàbada da banda pawulu-na na Muapu mohu-danyaka. Na ràyatu na madangu napa ana hawutu-kiadaka dàngu da-lamanga,” wàna.