Read Kambera YAHAYA 18 Bible Online

YAHAYA 18 - Kambera bible

YAHAYA 18

¹La hau tana la hapapa-da da luku Hundangu parongu-ha da lingu kahinggiru.

²Welingu la tana nuna mai-danyaka da wunangu ba dali la Luku Nilu la tena - tena pàndangu. Ha tau papalewa ma-hawàritu, beli parenggangu-wa la tanami na ngia palida da luku. Ngàndiwa lii langu ndumana na banjaru-mi na ma-kapàru dàngu na ma-kaborangu, da taumi da mini jangga da ma-talonahu manula-da dàngu da pamangàdatungu la nggubulu pinu tana.

³Nyimi mbuu ndàbami mangia-nya na pinu tana! Hamata-ya jàka daheika da penji dita la pinu palindi - palindi! Patingingu-wa jàka palingu-ha da taropitu!

⁴I MIRI mbàda panii-nanggaka, “Welingu la pangia-nggu nu dita napa kungadu hu wawa dàngu mandangu pa-kariangu kahingiru-na, mandangu hama tuna na mburungu na maninya la rudungu na ma-pambanahungu la wula muti, dàngu kahingiru hama tuna handaraku mata lodu la harii.

⁵Ba ndedi jiaya na rehi wuada da ai, ba damunju-ka da wàlada dàngu da wua angguru ba ndedi darara la pingi, la Hundangu napa na-làjaru-ka paraï muhu, namuda-ma-a hama tuna na kahidi na ma-kàtahu kalunga welingu la pingi angguru.

⁶Da metida da panjuri-da pa-dunjakungu-ha hi nanganja ma-hawurungu la wula wandu dàngu banda bohu la wula maringu,” wàna.

⁷Napa natàka na rehina da maraku pangàndi-ha lai MIRI Mahupu-mbiha welingu la paraingu na ngia palida da luku, welingu la banjaru-na na ma-kapàru dàngu ma-kaborangu, welingu la tau jangga jola dàngu ma-talonahu manula-na dàngu na pa-mangàdatungu la nggubulu pinu tana. Nyuda napa damai la Palindi Hiungu, la ngia palumu-nya i MIRI Mahupu-mbiha.