Read Kambera YAHAYA 19 Bible Online

YAHAYA 19 - Kambera bible

YAHAYA 19

¹Yiana-ya na hupu lii langu ngerana na Mehiru. I MIRI namai la Mehiru na-kaliti karumangu mbangatu. Da marapu - marapu la Mehiru ta - tàtada la hanggana dàngu na tau Mehiru na-wudutu na etina.

²Napanii i MIRI, “Napa ku-patumbu-ya na pabera dua wiki la Mehiru: na angu dedi nalawa-nya na angu dedina, na lihi uma nalawa-nya na lihi umana, na hau paraingu nalawa-nya na hau paraingu dàngu na hau pa-hanganji nalawa-nya na hau pa-hanganji.

³Napa Nyungga ku-pabeta-nja da pa-pakaka-na na Mehiru dàngu ku-poraku-ha da ringgitu-da. Napa dakarai pa-ndulangu la marapu - marapu dàngu da-paàrangu la tau manyura dàngu la wàndi - wàndi jàka nggàra pawàngu.

⁴Napa kupuli-nya na Mehiru la lima haàtu hanganji mambana mbàringu na mawàngu mbana etina pa-pareta-ha nyuda. Nyungga, MIRI Mahupu-mbiha mambàda panii,” wàna.

⁵Na wai Luku Nilu napa na-kalàhangu dàngu napa manda - ndai namihi.

⁶Da londa - londa napa dawau muhungu nu ba mareni njàpu-naka na waina. Da tibu hala dàngu da rumba malaï-danyaka.

⁷Mbuu ndàbada da idingu la karaba idingu la hingi Luku Nilu damàdu-ma-aka hi na-jiliru-ha ngilu.

⁸Da ngara mini yàpa iyangu da makàli yàpa iyangu la luku dahali urada dàngu dahii, nadu da mangela-da dàngu da jalada ba nda ningupa linguda. Da ngara da ma-tinungu nda nggàrapa pamonu-da;

⁹nyuda dàngu da maràma ngganji lodu nanjàpu-ka na renggitu-da.

¹¹Lalu mbana ndubaha da ngara ma-pairungu la paraingu Huangu! Da tau Mehiru da marihi manggàna da-wuangu panaungu tau ndubangu! Da toru mbeni pàku papanii la hanganji ba wàla tau manggàna-ha dàngu ba umbuku hanganji wungangu-ha nyunda!

¹²Ha ai, hanganji Mehiru, nggihaka da mini panaungu-mu da ma-manggàna? Màla hi dapi bianya na pa-pakaka-na i MIRI Mahupu-mbiha ndumana na Mehiru.

¹³Da ngara ma-pairungu la Huangu dàngu la Mepihu bai tau hanganga juaha. Nyuda nda ma-pairungu-aha, tàka tau ma-panjàrangu banjaru-naha.

¹⁴I MIRI-maka na matuna-nja nu hi da-wuangu panaungu ma-pambingungu anguha. Na njàpuna, mbuu ndàbana na pa-palaku-na na Mehiru nanjala, na panggana hama tau maüku-ya ba mbembatu - mbembatu-na dàngu hi na-tanjàriku la muta wikina.

¹⁵Nda ningu ndoku haàtu la Mehiru mamàka pa-pandulangu, ka ma-kuaha-ya ka rayatu-ya, ka tau pawiri-ya jàka ndia ka àtalu tauyaka.

¹⁶Napa natàka na rehina na banjaru Mehiru ba beri kawini makia-ya dàngu mangàdatu-ya. Nyuda napa da-kandàndaku ba da-mangàdatu jàka daita-yaka i MIRI Mahupu-mbiha jàka na-jakaru-nyaka na limana la pahuku-nja nyuda.

¹⁷Na tana Yahunda jia na pa-kanggupuku wàda da tau Mehiru handàka panamu - handàka panamu-nja nyuda na botangu-na i MIRI Mahupu-mbiha na manggàna-ha nyuda.

¹⁸La rehina nuna napa na hilu Imbarani jia-yaka na pawàngu la lima mbua paraingu la Mehiru. Da tau lai nu napa dawunda harangu la parongu-na i MIRI Mahupu-mbiha. Na hau na paraingu napa datunya tamuna “Paraingu Mata Lodu,” wàdanya.

¹⁹La rehi nuna la puhu tana Mehiru napa ningu hau ngia pawotu maraku ndumana i MIRI, dàngu la padira tana hapungu-na na andu watu na pa-kahaungu-ya i MIRI.

²⁰Na ngia pawotu maraku dàngu na andungu jiaha da tandana ba ninya i MIRI Mahupu-mbiha la Mehiru. Era ningu ma-roduku-nya, hàla nyuda ka da-warangu la pakarai pa-ndulangu lai MIRI, napa na-paràhangu haàtu tau la pa-pamara-ha nyuda.

²¹I MIRI napa na-pawuwangu wikina la banjaru Mehiru, hàla napa tanda-danyaka dàngu hi da-marubuku-nya, hi dangàndi-nya kameti maraku dàngu hi damaraku wànya. Nyuda napa dapeka-ya na paràndi-da lai Nyuna ba dawàngu pa-harangu.

²²I MIRI napa na-ràmbahu-ya na banjaru Mehiru, tàka hàlaka nu napa na-pamàlaru-ha. Nyuda napa da-pambelingu lai MIRI, dàngu Nyuna napa na-patingi-nya na hamayangu-da dàngu hi nawua-nja pa-màlaru wàngu.

²³La rehi nu napa ninguka ànda bokulu la henaku-na na Mehiru dàngu na Ahuru. Da mangia-nja da dambu tana nuda da-paluangu da-pamaingu ba daliya na ànda nuna dàngu hi anguda ba da-lumungu.

²⁴La rehi nu na Ihirailu hama-ma-adaka na mandapu-da dàngu na Mehiru hamangui na Ahuru, nuda ba tailu banjaru-ha jia-haka napa na pakanyurungu wàna na nggubulu pinu tana.

²⁵I MIRI Mahupu-mbiha napa na-pakanyuru-ha hi napanii, “Ku-pakanyuru-nggai nyimi, ha Mehiru banjaru-nggu, Ahuru pa-padika-nggu dàngu Ihirailu, banjaru paleha-nggu,” wàna.