Read Kambera YAHAYA 2 Bible Online

YAHAYA 2 - Kambera bible

YAHAYA 2

¹Yiada-haka da lii languna i Ala rukuna la Yahunda dàngu la Yeruhali da pangala-na i Yahaya anana i Amuhu:

²La lodu - lodu na manàmu-nya na tandula pangia Umana Miri na-kahuluku jangga dàngu nandola bànduku la pinu palindi - palindi dàngu tandula - tandula. Da ba - banjaru da-pajurungu lai nàhu,

³nyuda mbuu ndàbada dapanii, “Màla ta-kandekalu la Tandula-na i MIRI,[3] la Uma Ala Ihirailu. Nyuna napa na-ajaru-ta jàka nggikinda wàndaka bàdi. Nyuta napa tatundu-nya na àndana Nyuna, nadu na pa-ajaru-na i MIRI ba paweli-na la Yeruhali, napanii welingu la Hiungu,” wàna.

⁴Nyuna napa ma-patanda-nja ngera da banjaru da ma-palakarangu, dàngu marata-ha da palakara-da da kabihu banjaru. Da hapanda patuku-ha tuha luku, da nimbu panjadi-ha kahidi ridihu kalunga. Da banjaru nda dahili pa-hànjalangu-apa, dàngu nda da-rimangu-mbupa la pa-pabera.

⁵Ha, wàlana i Yakupu màlawa ka talaku li la hariina i MIRI!

⁶Dou Ala, Nyumu mu-dunjaku-nyaka na banjaru-mu, na wàlana i Yakupu! La nggi - nggi la tana yiana natuu kabeli mata ma-welingu la pahunga lodu dàngu welingu la tau Pilitingu.[4] Na madangu nakiku-nya na huri tau hangàdangu.

⁷Na paraina nambinu wàngu àmahu mabara marara, dàngu da pawulu-na nda pataü-aha. Da njarana lalu danguda, da kareta-na nda pataü-aha danguda.

⁸La nggi - nggi ningu marapu, dàngu nyuda dalumu-nja da kahala hada pa-pandoi wikida.

⁹Haàtu - haàtu na tau napa pa-paakangu-ya dàngu pamakia-ya. Àmbu jàma-dunja dou MIRI!

¹⁰Nyuda napa datama la kubu liangu - kubu liangu la tandula kaba watu, jàka ndia daàki lambongu daa la tana ka peku marada welingu la hànggana i MIRI dàngu welingu la kuaha-na na ma-pangarangu.

¹¹Napa na tau ngànjangu pa-pawawa-ya, na tau jangga eti pa-panyàku-ya, mbulungu i MIRI-a na pa-mangarangu.

¹²La lodu nuna i MIRI Mahupu-mbiha napa na-pawawa hàlaya na tau na ma-pajangga wikina, tàka hi hukunya na tau ngànjangu dàngu na majangga etina.

¹³Da pingi ai kajuu jangga la Limbanongu dàngu mbuu ndàbada da pingi ai bokulu la Mbahàngu napa pa-patàlaru-ha.

¹⁴Da palindi - palindi dàngu da tandula - tandula da manggoji napa pa-pandidaru-ha.

¹⁵Da lewatu - lewatu jangga dàngu da kangeli - kangeli tindingu napa pa-nyànggaru-ha.

¹⁶Da kapa - kapalu da ma-bokulu halawàla dàngu da ma-manandangu halawàla napa pa-tambulu-ha.

¹⁷Na tau ngànjangu napa pa-pawawa-ya, dàngu na tau jangga eti napa pa-panyàku-ya. Mbulungu i MIRI-a na pa-mangarangu.

¹⁸Da marapu - marapu napa da-molungu ailulu.

¹⁹La rehi hada lumbatu-na i MIRI la payoya-nya na pinu tana, na tau napa natama la kubu liangu - kubu liangu la tandula - tandula kaba watu tàka jàka ndia daàki lambongu la tana ka peku marada welingu la hànggana i MIRI dàngu welingu la kuaha-na na ma-pangarangu. Jàka nataka-ka na lodu nuna, da marapu - marapu àmahu mabara dàngu marara pa-pandoi-da da pa-rubuku-da napa pa-dunjaku tuda nu biaka nduma kalaü dàngu panii.

²²Jia, àmbi monungu-dupa la tau nda payatangu ba nda ningua wilina.