Read Kambera YAHAYA 22 Bible Online

YAHAYA 22 - Kambera bible

YAHAYA 22

¹Yiana-yaka na lii langu ngerana la Lolangu Harii mata: Ha, mangia-nya la Yeruhali, nggikina nyimi hi mihei la toku ndidu uma?[32]

²Nda ràka-ana na nggubulu paraingu ba naremi dàngu ba na-kayaka kakàlaku mbaha eti. Nadu da mini mbeni hanggangu-mi da mameti la pabera nda metida ba dapakangaburu-a.

³Mbuu ndàbada da liku-urumi mbàda palai-daka dàngu pa-tanawangu-haka dàngu ndedi tungudu haumbu ana pana. Mbuu ndàba da tau kapàru-mi pa-tanawangu-mbuha jiapa ka mbàda palai marauda.

⁴Àmbi ihi lingga nyungga; pahia biangga nyungga ka ku-paduduru-nja da tau welingu la banjaru-nggu da mameti. Àmbi kamangu-du paomba-ka.

⁵Tubangu-ma, i MIRI Mahupu-jangga dàngu Mahupu-mbiha mbàda kawuku-mana-nyaka na lodu yiana ba lodu pariu raüngu-ya, lodu kanggupuku dàngu lodu kanyaüru-ya la Lolangu Harii mata. Da kangeli paraingu pa-nyungguru-haka. Natalia wara karai pa-ndulangu parongu-ya la tandula - tandula.

⁶Da tau Hiria damai la njara dàngu kareta pabera, da tau Elàmu da-dàkangu pàndi dàngu pana. Da tau Kiru da-payemangu temingu-da.

⁷Da lolangu kamboka la Yahunda dambinu wànguka kareta pabera. Da pamba la njara rimangu-da padua la ngaru pindu boku - pindu bokulu la Yeruhali.

⁸Nggubulu-na na ngia pa-torungu-na na Yahunda da-tanyungguru. La rehi nuna, hamata-miha da dàka pabera la kuru madàka.

⁹Nyimi hunggu-minjaka da maràta - ràta la kangeli Yeruhali da paràka pa-pahàmu. Nyimi ihamata ndàbaha da uma la Yeruhali, mi-nyànggaru-ha ba nda pirada la hongada tàka da watuda hi mi-pahàmu wànja da kangeli paraingu. Ka pa-uhingu wai,

¹¹nyimi mi-pandoi ma-patàmangu daa la paraingu dàngu hi pandema-nya na wai welingu la ma-patàma memangu. Tàka nyimi ndai eti wànya i Ala ba mandai-manaka la pa-pakaka-nya nuna mbuu ndàbana dàngu hi kiri tumbuna nuna.

¹²La rehi nu i MIRI Mahupu-jangga dàngu Mahupu-mbiha na-paràha-nggai kai hii dàngu kai pa-dudurungu, kai kikiru-ha da katiku-mi dàngu kai kalambungu hinggi karungu.

¹³Tàka na nyuna, nyimi hawola-minya dàngu remi pàku-minya. Hambàli-minya mbimbi dàngu hapi hi ingangu tolungu dàngu unu-minya wai angguru bai warangu, “Maiwa ka tangangu ka ta-ngunungu, nadu haromu ba meti-ndanyaka!” wàmi.

¹⁴I MIRI Mahupu-jangga dàngu na Mahupumbiha na-pawuwangu wikina lai nyungga hi napanii-ngga, “Langatàka, na akatu-da nyuda nda kujàma-anja lundu dameti. Nyungga, MIRI, mambàda panii,” wàna.

¹⁵I MIRI Mahupu-jangga dàngu Mahupu-mbiha na-paràha-ngga palua lai Hepuna na kapala la kuru uma hanganji, la pa-patàka-nya yiana na liina i MIRI,

¹⁶“Bau kaka wikimu, nyumu na nggamukau? Nggàra hàku-muka hi mukobu retimu la palindi watu?

¹⁷Rimangu, nyumu napa kuwàru pamarau - raukau. Nyungga napa ku-njàkilu-kau dàngu kukulu-kuluru-nggau hi kukilu - kilunggau hanggangu la parai bokulu hama tuna mbola. Lai nu nyumu hi mumeti la karaha-da da kareta pa-hamela wàmu. Nyumu mbàda pairaku-munyaka na tamu kuru uma mirimu.

¹⁹Jia-duyaka nu nyumu hi ku-pukalu-kau dàngu hi ku-papuru-nggau welingu la pànggatu-mu na majangga.

²⁰La rehi nu napa kupaau-nya na atanggu i Eliyakimu anana i Hilikia.

²¹Da paki ràmamu dàngu da boru bànggimu napa ku-panggàna-nya nyuna. Mbuu ndàbada da kuaha-mu napa ku-pakata-nja lai nyuna. Nyuna napa ama-danyaka paraï da mangia-nya la Yeruhali dàngu Yahunda.

²²Nyunaka napa na ma-kuaha lundungu la wawa hanganji wàlana i Ndautu. Nyuna napa na makata-nya na kuhi pa-hanganji. Nyuna jàka na-bunggahu-haka nda ningu-apa mamàka pa-pandàbi-nya, tàka jàka na-pandàbi-nyaka, nda ningua mamàka pa-bunggahu-ya.

²³Nyuna napa kuwua-nya pa-mandapu ma-undungu hama tuna na paku na papaku pa-undungu la dindingu. Nggubulu-da da kuru umana patembi ndàbaha rukuna nyuna.

²⁴Tàka da nua kalembi-na dàngu da patanggu-na napa jia-haka da bukuna. Nyuda napa da-kanderungu-maaka lai nyuna, hama tuna na wurungu na-patiwalungu la paku.

²⁵Jàka tunaka nu, napa na paku na papaku pa-undungu, napa tambukalu-nanyaka duna hi na-kanabu. Dàngu nuna jia-yaka na dirana na nua kalembi-na hamanai mbuu ndàbana na ma-kanderungu lai nyuna. Nyungga, MIRI, mambàda panii,” wàna.