Read Kambera YAHAYA 24 Bible Online

YAHAYA 24 - Kambera bible

YAHAYA 24

¹I MIRI napa na-pamolu-nya na pinu tana, hi lupa na-katuku riku dàngu na malinggitu kahàna. Nyuna napa na ma-kabeli puhaya na pinu tana dàngu na-paiha nggangganya na ma-mandapu-nya.

²Mbuu ndàbana na tau napa na-pahama ndàba na ura dedida: ratu dàngu rayatu, na ata pakei dàngu na pa-tangara-na, na ma-danggangu dàngu na makei, na ma-pinjangu dàngu na ma-wuangu pinjangu, na mawulu dàngu na mamila.

³Na pinu tana napa nda papinya karuma-na tàka hi pakabu-ya. I MIRI mbàda panii-naka, jiangu-maka napa ba tuna nu.

⁴Na pinu tana napa namàdu dàngu namalaï, na nggubulu pinu tana na-kariku. Na awangu na tana hama kariku-mada.

⁵Na pinu tana na-iraku nadu na ma-mandapu-nya napangga-ha da pareta-na i Ala, da-pahilu-nja da pa-kawuku-na dàngu da-kandulingu welingu la pa-ràndingu na patura-na i Ala dàngu nyuda lundu nu - nu.

⁶Jia-duyaka i MIRI hi naràtu-nya na pinu tana hi nahuku-nya na ma-mandapu-nya rukuna na pa-pandoi-da. Nyuda napa dakehi hi hawutu-adaka nyuda da mamara.

⁷Da pingi angguru da-kariku dàngu naharui ka hunggu wai angguru. Na tau na ma-hawola àmangu nàhu biti-nanyaka.

⁸Nda pahili rongu-apa ma-kàritu jungga na ma-nggaüru dàngu ma-tumbungu lamba hakapapa mamanggonggatu. Pànjangu-nanyaka na mbabu tau ma-hanggela hawala.

⁹Nda hili ningu-apa ma-unungu angguru maludu, nda hili ningu-apa mapàda-nya na mbangatu-da da wolu maüku.

¹⁰Nggubulu-na na paraingu na-kanyaüru; mbuu ndàba da pindu uma pakuhi-ha ba mangàdatu-danya da mangia-nja.

¹¹Da tau dawara hu lua la ànda ba nanjàpu-njaka wai angguru. Nda ningu-apa hawola la paraingu nuna lundu nu - nu.

¹²Na paraingu naluju-làjaru-ka, dàngu da pindu boku - pindu bokulu-na da tanyànggaru-ka.

¹³Nuna-duyaka na matumbu la nggubulu pinu tana la hau banja - hau banjaru. Hama-mana la rehi pàpu, la rehi pàpu wua haitungu ba pàpu lundu hàlaha dàngu da wua angguru da ma-pa-malamiringu ba papàpu la pingiha.

¹⁴Da tau da mamara napa ludu mbaha eti-danyaka. Da tau la patama lodu napa bobaru-danyaka na mangunju-na i MIRI

¹⁵dàngu na tau la pahunga lodu napa dawotu-nya Nyuna. Da ma-mandapu la hingi tehiku napa da pa-mangunju-ya i MIRI, na Ala Ihirailu.

¹⁶Welingu la hupu tana parongu-ya na ludu wotungu ndumana na Ihirailu, na banjaru ma-karadaku. Ba tuna, ai inai nyungga! Ba kariku-nggunya! Da ma-kaleka - kaleka pangalangu-madanya, màlai ba manaü kaleka-mada.

¹⁷Rongu, ha nggubulu-mu ma-mandapu-nya na pinu tana! Na kanggupuku, na kahili dàngu na hiru nedi-danggai.

¹⁸Na tau na mapalai welingu la kanggupuku napa na-kanabu la kahili, dàngu na tau na mamara welingu la kahili napa nakàna la hiru. Na ura kawalu napa pa-huburungu-ya welingu la awangu dàngu na lata pinu tana napa na-kanggauhaku.

¹⁹Na pinu tana napa naràta, na-muburu dàngu na-nggàduku.

²⁰Na kawunggilu pinu tana napa mbembatu - mbembatu-na hama tuna na tau maüku, dàngu na-yoyangu hama tuna na uma dai la ngilu mbangatu. Na pinu tana napa nambàpa paraï pambotu da njalana. Na-làjaru nda nahili hadangu-apa.

²¹La rehi nuna i MIRI napa nahuku-nya na ngara ma-kuaha la lumbu awangu lerangu dàngu da hanganji - hanganji la pinu tana.

²²Nyuda napa pa-pauhi pa-pohungu-ha hama tuna na tau pa-tahangu la kubu liangu, dàngu hi panàngga-nja la uma kapàtangu lupa natoma na rehi la pahuku-nja.

²³Na wulangu napa na-kapàtangu dàngu na mata lodu nda nahili handaraku-apa, nadu i MIRI Mahupu-mbiha napa na-pareta ba hanganji-ya. Napa Nyuna na-pareta la Yeruhali, la pinu Tandula Hiungu tàka hi na-pajiliku-nya na bunjuku-na la ngara liku uru banjaru-na.