Read Kambera YAHAYA 25 Bible Online

YAHAYA 25 - Kambera bible

YAHAYA 25

¹MIRI Nyumuka Alanggu, ku-pabokulu-kau Nyumu dàngu kuwotu-nya na tamumu. Nadu da paràma - paràma-mu kanjupu pa-hangàtarungu-ha; Nyumuma ma-pakaka-nja weli ndaingu, dàngu wàngu tuturu-mu ba pahàra-nja.

²Nuna na paraingu mbàda pakabu-muyaka; nuna na paraingu maningu tindingu-na kanànda-yaka. Da uma hanganji pawulu tau nàmu damauka, nda pa-pahada-anjapa lundu nu - nu.

³Napa dawotu-nggau paraï da banjaru ma-kapàru, dàngu da-mangàdatu-nggau la parai - paraingu-da da banjaru mbana eti.

⁴Nadu ba ngia pa-hinggilu-kau Nyumu nduma tau lamanga, pa-ngiangu ma-mànjaku nduma tau mila la rehi ndukana. Ngia pa-hangindingu-kau la hambàti ngilu mbangatu, ngia pamaü la mbana. Nadu na tau mbana eti na-kaluluku, hama tuna na làpuru la wula urangu.[35]

⁵hama tuna na ngilu mbana la tana màdu. Nyumu ma-pakandii-ha da muhuma, mu-papànja-nja na warada da tau mbana eti, hama tuna na maü karumangu na ma-pa-wadaru-ya na mbana ma-hambàti.

⁶La Tandula Hiungu, i MIRI Mahupu-mbiha napa na-payema-nya pamangu ndumana na banjaru mbuu ndàbana la pinu tana. Na-pajàma-nya pangangu marihi hàmu dàngu angguru papindi.

⁷La pinu tandula nuna napa na-wainggahu-ya na karumangu handuka na ma-panggàbalu-nja da ba - banjaru.

⁸I MIRI Mahupu-mbiha napa na-pamolu-nya na meti lundu nu - nu! Nyuna napa na ma-podahu-ha da wai mata welingu la nimbihu mata, dàngu hi na-pamarau-ya na pamakia wàngu na manggàna-ya na banjaru-na la nggubulu pinu tana. Mbàda wànaka i MIRI dàngu na rukuna nuna jiangu-maka natumbu.

⁹La rehi nu napa napanii na tau, “Langatàka-madu, Nyuna jiaya na Alanda; Nyuna-maka na panedi-nda, ka pamàna-nda. Langatàka, Nyuna MIRI-ya; Nyuna-maka na panedi-nda. Nàhu ta-kayaka mbaha eti, nadu ba mbàda pamàna-nandaka,” wàda.

¹⁰I MIRI napa naopa-nya na Tandula Hiungu, tàka na Muapu napa nakali - lijaku-nya hama na rembi la pangia kangudu.

¹¹Na ma-mandapu-nya napa na-pajola-ha da limana hama tuna na tau ka kungeni ba wàna. Ba tuna i MIRI napa na-pawawa-ha da ngànjangu-da hi lupa nda da-payatàngu.

¹²Da tindingu Muapu dàngu da kangeli janggana napàpa-ha hi na-patàda-nja la tana hi lundu da kabu hama kumburu tana.