Read Kambera YAHAYA 26 Bible Online

YAHAYA 26 - Kambera bible

YAHAYA 26

¹La rehi nu napa na tau daludu wànya na ludu yiana la tana Yahunda, “Ai kanjupu kapingatu-ya na paraingu-nda; i Ala wikima ma-pahada-nya na tindingu-na, lai yiahu nyuta tamara.

²Bunggahu-ha da pindu bokulu paraingu, ka natama na banjaru tuturu, na banjaru na mawànya na pawuku-na na Alana.

³Ou MIRI, Nyumu ma-wuangu peku dàngu mànjaku la tau na ma-màndangu etina, nadu ba nawaikau Nyumu.

⁴Wai mànu-yawa i MIRI, ba naingu opa-nanda i MIRI Ala.

⁵I MIRI na-pawawa-ya na tau na ma-ngànjangu; na pakabu-ha da paraingu-da da maningu tindingu-da, hi na-pambidahu-ha la tana.

⁶Napa dakali - lijaku-nya paraïda tau mila dàngu mayila,” wàna.

⁷Na tau patutungu nali la ànda kunduhu, ba Nyumu, MIRI malota-nya àndana.

⁸Manunju-ya na botangu-mu, ou MIRI, dàngu hi mane - nedinggau Nyumu; jiakau Nyumu pawotu-ma dàngu parinju etima.

⁹Na hamangu-nggu narinju-nggau la rudungu, na etinggu na-kalaura-nggau la mbaru. La rehi patanda-munya napa na pinu tana, na mangia-nya na pinu tana napa napinya na ma-deningu.

¹⁰Jiapa-kadu ka hàmunya na tau akatu, nda na pa-pekangu-ma duna jàka nggàraya na ma-deningu. La nanggara pa-palatangu la ukumbu pa-kabaingu-ya na pawàna, dàngu nda na-wàrihu-ya na kuaha-na i MIRI.

¹¹MIRI, rimangu-mamunya pahuku-nja da muhumu, tàka nyuda nda dapi-anya. Màtawa ka da-kamiringu makia ba daita-ya na mbuha-munya na banjaru-mu. Màtawa nyuda ka damànji ba na-handauni-ha hukungu pa-payema-munja.

¹²MIRI, Nyumu napa ma-pamànjaku-kama, da paràma-maka Nyumu maràma-ha huruma nyuma.[36]

¹³Da miri hawiangu da-kuaha-madu-kama, tàka jiakau Nyumua pa-wàrihu-ma, ou MIRI Alama!

¹⁴Nyuda dameti-ka nda dahili luri-apa, da ndewada nda dahili hadangu beli-apa. Nadu bau hàlaka-duka pa-pamolu-nja nyuda dàngu mu-podahu-haka welingu la kanandingu.

¹⁵Mubonja patapu-nggamaka nyuma banjaru-mu, ou MIRI, na tana ngabama mu-palera-nyaka, jia-duyaka hi pa-mangunju-kau Nyumu.

¹⁶Mbàda ràmbahu-mu-nggamaka; la ndukama ma-punjilungu lai Nyumu, hi ma-hamayangu lai Nyumu, ou MIRI.[37]

¹⁷Hama tuna na kawini na matiki pa-paana ba na-paringgitungu dàngu ba na-kaladaku paraï pakatiu, tuma numbu nyuma la hanggamu MIRI.

¹⁸Nyuma ma-paihi kambungu dàngu ma-kayili la mayila, tàka nda ana nggàra-a pa-habola-ma; nda ma-wuangu pahàmu wàna na pinu tana, nda mabonja wàmbunya na ma-mandapu-nya.[38]

¹⁹Na banjaru-mu na mambàda meti naluri beli, da metida napa dahili hadangu. Da tau da pambàda taningu la tana napa da-hadangu hi dapayaa aungu. Hama tuna mburungu ma-pahayandalu-ya na pinu tana, bau paluri-ya na banjaru-mu na mameti ndai.

²⁰Tamawa la umamu ha banjaru-nggu hàla bitanya na pindu. Kapàndi-wa hawutu, lundu na-wadaru na hànggana i MIRI.

²¹I MIRI napa napuru welingu la pangia-na la awangu la pahuku-nya na ma-mandapu-nya na pinu tana paraï ruku njalada. Na-pameti kangunduhungu-da tau napa pa-pawuwa-yaka. Na tana napa nda nahili pandàbi-anjapa da tau pa-pameti.