Read Kambera YAHAYA 28 Bible Online

YAHAYA 28 - Kambera bible

YAHAYA 28

¹Ura dedi pàku-anaka na paraingu pa-hamemu wàda da mini maüku la Ihirailu! Na manandangu-na namàli-ka hama tuna na wàla ai pautu na ma-malaï la katiku-da nyuda. Ura dedi pàku ananya na paraingu mapo - pòdina pajangga la padua lolangu kamboka, na pa-hamemu wàda da ma-maüku dira matiki.

²I MIRI napa na-paràhangu haàtu mini kapàru dàngu kaborangu. Namai hama tuna làpuru pa-kariangu ura watu mboka, hama tuna ura kawalu dàngu iwa ma-pakauta. Wàngu mbana etina na-parahu-nja la tana.

³Na hememu-da da liku uru da ma-maüku nuda pataro - rohaku-ya.

⁴Na wuwa tamuna na paraingu-da na mangeri kabura napa na mau. Na urana hama tuna na ura wua kapilitu na marara la ndedi rehina; ba ita-kiyaka ailalu pàpuya hi nganya.

⁵I MIRI Mahupu-mbiha napa Nyuna wàla ai pa-kalipa ma-manandangu-ya la banjaru-na na marihi.

⁶Napa i MIRI nawua-nja pa-pàdangu ma-deningu da ngara hakimu, dàngu patoru mbeni wàngu da tau matanggu dai paraingu welingu la tau mamai pa-kaluluku.

⁷Da ngara wunangu dàngu da ngara ratumbu da-maüku nadu ba lalu unu padangu-da angguru dàngu wolu araku. Ba dalaku mbembatu - mbembatu-da dàngu datu - tunjuru paraï pa-hariwatu kanandingu. Da ngara wunangu nda dapi-anjapa ihida da harii mata da pawua-na i Ala lai nyuda. Da ngara ratu nda damàka-apa parata palakara da pangàndi lai nyuda.

⁸Da menjada dambinu wàngu muta, hi lupa nda ningu-mapa ma-yarahu lai nu.

⁹Nyuda dapulu-ngga nyungga, “Ba nareki-ya nggamu-yaka na pa-ajaru-na? Nggamu maihi wànya na pa-kalokangu-na? Ba nakaka-ya anakeda kuduta ihu nyuta pabidi yila welingu la huhu?

¹⁰Nggiki hama ajaru hau - haunanda hurupu, hau - haunanda lawiti kareuku, handala - handalaru papanii wàngu,” wàda.

¹¹Jàka ndai mbuhangu parongu-ka nyungga, napa i MIRI na-palewa tau hangàdangu pa-ajaru-kai la hilu tau hangàdangu.

¹²I MIRI na-mbuhangu pawua-nggai nyimi mbuu ndàbami ngia pa-hangahu. Tàka nyimi ndai etingu-a pa-patingi-nya Nyuna.

¹³Jia-duyaka ba tuna nu napa Nyunaka i MIRI na ma-ajaru hau - haunggai hurupu, hau - haunggai lawiti kareuku, dàngu handala - handalaru-nggai papanii wàngu. Tàka bai pangga napa minjoru kabara ndelangu hi mi-manua, mikana la hiru dàngu hi tanawa-nggai.

¹⁴Ronguwa jàka nggàra wàna i MIRI, ha dimi ma-paakangu ma-pareta-ya na rayatu la Yeruhali!

¹⁵Mipanii nyimi ba mbàda tura-mika pa-njanjingu dàngu na meti dàngu bai kawuku lii pahamangu dàngu na parai mameti. Nyimi màndungu-mananya-ka bai pàdanya ba nda nadeni-nggai ura pàda na manàmu-nya, nadu ba dangu kahili-mi la pa-manggangu wikimi.

¹⁶Jia ba tuna, i MIRI Mahupu-jangga hi napanii tuna yia, “Napa Nyungga kutunya latana ma-kapingatu dàngu ma-undungu na Hiungu; hauna na watu kabihu ma-pawilingu maningu pa-tulihu, ‘Nggamu mawai pa-màndungu, nda jia tamaï-ana la pakaku,’ wàna.

¹⁷Na ma-deningu jia-yaka na liku hukutu tàka na matànji jia-yaka na liku ndoluna,” wàna. Na ura watu napa na-kanjeku pabulu-ya na kakòlulu-mi na payàpa-mi. Napa na iwa ka nawari-ha da ngia pa-kapàndi-mi.

¹⁸Na pa-njanjingu-mi dàngu na meti dàngu na lii pahamangu-mi dàngu na parai mameti napa pa-màtangu-ya, jia-duya jàka nàmu-nyaka duna na ura pàda, mija-minyaka ba tarohaku-kai.

¹⁹Napa na-handauni-kai manjurangu panua naingu, nimbihu lodu, mbaru, tidu lodu, rudungu. Napa nda - ndàndami paraï pa-mangàdatu jàkai jàngapu-ya na lii welingu lai Ala.

²⁰Nyimi hama tu-manaka na ma-katuda la nggala manda madita-kai ka peku luruhu-mi. Na hinggi lumburu-mi nda na-mbàlaru la pa-lumburu wànya.

²¹I MIRI napa na-hadangu hama tuna la Palindi Parahingu. Nyuna napa na-pajàrungu hama tuna la Lolangu Nggimbiungu la pa-palaku-ya na pawuku-na, na pawuku-na na pa-hangàtarungu lai nyuta tau! Nyuna napa na-palaku-ya na paràma-na na pa-hangàtarungu.

²²Nyungga mbàda rongu-manggunya-ka na hupu botana i Ala Mahupu-jangga dàngu Mahupu-mbiha la pa-pamolu-nya nggubulu-na na paraingu. Àmbi paaka wàdunja da papanii hahangu yiada da pa-patàka-nggunggai. Napa narihi haruidu lai nyimi la pa-pamara wikimi!

²³Rongu-hawa da paniinggu, eti wànja da papeka hahanggu.

²⁴Na tau tungu woka nda jia panga - ngalangu-ana pa-kabànda, pahàka dàngu la panggari-ya na tanana ka tondunya.

²⁵Ba na-lànyapu-ka na tanana, hàbarungu-nanyaka wini, hama tuna da wàla hànggi mitingu dàngu da wàla hànggi bara. Natondu pa-ndalarungu dua ngia ngara uhu nggàndumu, tàka la halinggi-na ngara pangangu hawiangu.[42]

²⁶Napi-manya na huri ràmaya, nadu ba mbàda ajaru-mana-njaka paraï Alana.

²⁷Nda nawàngu-a pàmbalu mambotu pa-pàmbalungu wàla hànggi mitingu, jàka ndia ndutungu karobaku pa-kapidihu wàngu wàla hànggi bara. Ndumana nuna nawàngu pàmbalu ma-halela duna.

²⁸Ba na-pàmbalungu uhu nggàndumu nda napanga - ngalangu-a pa-pàmbalungu ka lupa na-kaweraku. Ndia! Napi-manya duna na huri pàmbalungu ma-jàngapu ba nawàngu pa-palaku-nya karobaku dita la pinu hi nda pa-pamija-ha da karohu uhu nggàndumu.

²⁹Na manggàna tungu nu paweli-na lai MIRI Mahupu-mbiha. Mbuu ndàbada da pa-pakaka-na i MIRI da-nggànangu dàngu da-hàrangu-ma.