Read Kambera YAHAYA 29 Bible Online

YAHAYA 29 - Kambera bible

YAHAYA 29

¹Ura pàku-ana-nyaka na paraingu Yeruhali na ngia pawotu maraku manguna i Ala ba wàdanya! Ura pàku-ananya na paraingu pangia maü terana i Ndautu! Màtawa da ndaungu ka da-pahili henakungu dàngu da lodu pa-mbabungu-na.

²Tàka napa i Ala na-patàka-nya ura pàda nuna na paraingu, hi lupa nahali ura dàngu na-padudurungu na tau. Nggubulu-na na paraingu napa hama tu-maana-ka na ngia pawotu maraku na pa-luburungu wai ria.

³Napa i Ala na-kaluluku-nya nuna na paraingu dàngu hi na-nggupulu weli winggiru-nya.

⁴Na Yeruhali hama tu-maana-ka na wàngi na ma-pamukarungu la pa-parongu-ya na talia nggoruna weli dalungu la tana, na talia nggoruna na mabàta weli dalungu la kabu tana.

⁵Na nyuna mbuu ndàbada nu da tau hangàdangu mbana eti napa da-mbulangu hama tuna kabu tana jàka ndia kalàmba pangàndi ngilu. Tàka ndedi mbàdiku-na dàngu nda pambuti-nya.

⁶I MIRI Mahupu-mbiha napa na-pahàla-ya nuna na paraingu ba nawàngu ngilu mbangatu dàngu upungu ma-wirungu. Napa Nyuna na-patàka-nya na làpuru dàngu na epi na ma-panyara.

⁷Hàla, mbuu ndàba na pamba tau hangàdangu ma-kaluluku-nya na Yeruhali, na paraingu ngia pawotu maraku manguna i Ala, mbuu ndàbada da ma-nggupulu-ya dàngu mahànjaluya nuna na paraingu, napa da-mbulangu hama tuna na manggadipangu la rudungu.

⁸Da ba - banjaru ma-pauhi la pa-kaluluku-nya na Yeruhali napa hama tuna tau rimbangu na ma-manggadipangu ba talànga nganguna, hàla hadangu dàngu nda ningu ihi kambuna, hama tuna na tau na mamadau na ma-manggadipangu ba talànga ununa wai, hàla hadangu dàngu mara nggoru-naka.

⁹Pangalangu bia paba - bànaru dàngu pa-kapudangu hama tuna tau mapoki! Maüku-wa, tàka nda ruku unungu-mu angguru. Laku mbembatu-wa, tàka nda ruku unumu wolu araku.

¹⁰I MIRI na-patàtiku-kai dàngu hi mi-katuda minjalu. Nyuna ma-pakapuda-nja da matada da wunangu, dàngu na ma-pandàda-nja da matada da ma-manyura.

¹¹Na ihina nimbihu-na harii mata na-kawiningu welingu lai nyimi hama tuna na mbuku na patungu henggilu. Jàka ngàndiya na mbuku la haàtu tau na mapingu pambaha, kau karaiya mbaha àrungga-nya jàka wàmunya, napa panii-mana-nyaka duna ba nda peku-ana, nadu na mbuku nuna ba pa-henggilu-ya, wàna.

¹²Jàka ngàndiya la tau manda pingu pambaha, nda kupingu-a pambaha, wàna-maka duna ba nahema.

¹³I MIRI napanii, “Da tau nuda ba da-marubuku-ngga la ngaru-maada, tàka da etida marauda-padua welingu lai Nyungga. Na anggama-da nyuda kalaratu pa-pandoi tau-maaha na patuda la katiku.

¹⁴Jia-duya napa ku-pa-katàtaku-ha ba ku-nutakungu papalu-ha. Na tau na mamanggàna napa nanduba-maaka, dàngu mbuu ndàbana na pinguna nda ningupa linguda,” wàna.

¹⁵Ura pàku-anaka na tau na mapamukarungu pakàpi-nya na pa-pakaka-na welingu lai MIRI! Dawàngu pa-kangunduhu ba da-paluangu limada, la kanandingu-da, ba nda ninguki haàtu maita-ta jàka ndia mapinya jàka nggàra ulanda, ba wàda.

¹⁶Mbuu ndàbada da-panjingu njànganya. Nggiya na marihi pa-mangilungu, na matanggu pipi jàka ndia na tana wurungu? Peku-naka na pa-pandoi ba napanii dànya na mapandoi-ya, “Nda nyumua ma-pandoi-ka,” ka wàna? Jàka ndia peku-naka na wurungu ba napanii dànya, “Nda ana nggàra-a nyumu papimu,” la pawàna?

¹⁷Ningu lara lii, “Nda nahili mandai-apa da omangu ba tana woka-haka, tàka da tana woka ba omangu beli-haka,” na mawàna.

¹⁸La rehi nu na ma-kawanga napa narongu-ya na kareuku la mbuku na pambaha dàngu na tau poki na maluri la kapàtangu napa peku ngitana.

¹⁹Da tau mila dàngu da ma-kambànga napa pàda beli-danyaka na mahàmu na pawua-na i Ala matua Ihirailu.

²⁰Nuna-yaka na hupu njàpuna na tau na ma-kapidihu anguna patau dàngu na ma-paaka-nya i Ala. I Ala napa na-pamolu-nya mbuu ndàbana na tau njala,

²¹na tau na ma-pulungu anguna patau, na tau na ma-kahiri-ya na tau njala la pahuku-nya, dàngu na tau na ma-wewaru-nya na panii kambàliku ka àmbu na-ngalangu ma-padeningu na tau manundu.

²²Jia-duya nu i MIRI, Ala Ihirailu, na ma-pahàla-ya i Ambarahàmu, napanii nàhu, “Ha banjaru-nggu, nyimi nda pahili paakangu-akai-pa, dàngu na matami napa nda nahili tawàla-apa paraï pa-makia.

²³Jàka era ita-minja da anami da pawua-nggunggai, napa peka-dimi-nyaka, ba Ala matua Ihirailu-ka Nyungga. Napa mitembi dàngu mi-mangàdatu-ngga Nyungga.

²⁴Na tau nduba napa na-papekangu papinya, dàngu na tau na makàli kaburaü napa na-mbuhangu ka-ajaru-ya,” wàna.