Read Kambera YAHAYA 3 Bible Online

YAHAYA 3 - Kambera bible

YAHAYA 3

¹Langatàka, i MIRI Mahupu-mbiha napa na-pitiha welingu la Yeruhali dàngu la Yahunda mbuu ndàbada da paràka paluri wàna na mangia-nya lai nu, jia-mbuha da pangangu dàngu da pa-unungu. Hamanai mbuu ndàbana na tau na pamonu-da:

²nu da ma-kaborangu, da panjuri, da hakimu, da wunangu, da ma-manyura, da ma-panaungu,

³da parawira, da mini la ngora la panggolu dàngu da ma-pangora la lii pareta, da tau mapingu pa-kabeli mata dàngu da ma-manyura.

⁴Napa i MIRI nawotu-ha da bidi tau la paliku urunya na rayatu, dàngu napa nyuda àtalu eti biada ba da-pareta.

⁵Napa na-maràngga pa-kapidihu na tau. Da bidi tau nda da-wàrihu-ha da ma-kaweda, tàka na tau kudu nda na-wàrihu tau bokulu.

⁶Napa natàka na rehina na tau ba napindi-ya na haàtu nua kalembi-na dàngu hi dapanii dànya, “Nyumu-makia-ka nu maningu ana paki ma-hàmungu; jia matàwa nu ka liku urukau lai nyuma la rapa handuka tungu yia,” wàdanya.

⁷Tàka napa nahema, “Nyungga nda tau manyura-aka! Nyunggai duku nda ningua pangangu dàngu papaki. Àmbi paràha-dungga la paliku urunya na banjaru!” wàna.

⁸Langatàka, na Yeruhali na hanggubalu-ka! Na Yahunda na-tanyungguru-ka! Nadu mbuu ndàbada da kareuku-da dàngu da paruku-da ba dalawa-nya i MIRI dàngu da-ndubaku-ya na kawaha-na.

⁹La nggàduku-da nyuda ba da-ngànjangu na lohangu na akatu-da. Nda la ma-kawiningu-a ba datu manjala hama tuna àmangu da tau Hondumu. Ura pàku-adanya-ka! Daparuu-nya na hanggàmaru la nduma wikida.

¹⁰Napanii i MIRI, “Patàka-nja da tau da ma-manundu lai Nyungga, napa nyuda ba mànjaku dàngu ba mànangu-danyaka. Nyuda napa ba pàda-danyaka na hàmuna na paraï ruku njilida.

¹¹Tàka ura pàku-ananya-ka na tau akatu! Hama tuna ba tudanya nu na tau, tu-manaika duda na pahunggu-da nyuda.

¹²Na banjaru-nggu napa na-roduku-nya paraï tau mangaa matangu dàngu na-pareta-yaka paraï tau ma-lamuji tau hawiangu. Na banjaru-nggu napa na-panjàra-nya paraï liku uruda hi lupa nda dahili pingupa ànda ngia palida làti,” wàna.

¹³I MIRI mbàda ehingu-manaka la pa-kukutu-nya dàngu la pa-patanda-nya ngerana na banjaru-na.[5]

¹⁴I MIRI na-kukutungu hama tuna hakimu-ya hangganja da ngara liku uru la banjaru-na. Yiana-yaka na pa-panjala wànanja nyuda paraïna i MIRI: “Nyimi-maka maramba-nja da ihi woka angguru; da umami dambinu wànguka malanja pa-rambangu welingu la tau mila.

¹⁵Ka nggikina nyimi hi mi-roduku-nya na banjaru-nggu dàngu hi mi-lamuji-ya na tau mila? Nyungga, MIRI Mahupu-jangga dàngu Mahupu-kawaha mambàda panii,” wàna.

¹⁶I MIRI napanii, “Kanjupu ngànjangu-ha da kawini Yeruhali! Da wenju ba itaha dàngu da pa-kamàdikungu mata ba dalaku ngànjangu. Na panggada dapandoi - ndoiya dàngu ba da-patanjàngu-nja da kara àmahu la wihida.

¹⁷Na nyuna Nyungga napa kuhuku-nja; napa da-pakara pa-mbutangu da katiku-da hi lupa da-kamulungu wànya,” wàna.

¹⁸Napa natàka na rehina i MIRI ba napiti hàlaha welingu la kawini - kawini Yeruhali mbuu ndàbada da ngga - nggàra-da da-pahamemu wàda: da ngaü katiku, da kara wihi, da ngaü la nggoru,

¹⁹da kara lima, da tamalingu,

²⁰tubuku, da muru la pungu dàngu la bànggi,

²¹tawuru dàngu da pula la uru,

²²da ngaü remida da ma-manandangu, da laü, da kalembi liu, da kàpu àmahu,

²³kalembi manipa, paki linangu, nggili nggoru dàngu tamalingu mamalai.

²⁴Nàhu nyuda datungu-pa mbii kati, tàka napa nyuda dawau nda hàmu. Da boru bànggida nàhu da ma-malijangu tàka napa pa-pahilungu-haka hombalu halata. Da katiku-da da maningu lunggi manandangu, napa da-kamulungu-ka. Da pakida da ma-manandangu napa pa-pahilungu-haka paki katàri. Nàhu da-manandangu, napa daka-mbànga ba pa-dambaku-nja hàpu.

²⁵Da mini, hamanai da ma-kapàru-mbu, napa dameti la pabera.

²⁶La pindu boku - pindu bokulu paraingu na tau napa na-hawina dàngu na-padudurungu, tàka nuna na paraingu wikimbu hama tu-maana na kawini pa-kalulu na ma-uhuku la tana.