Read Kambera YAHAYA 30 Bible Online

YAHAYA 30 - Kambera bible

YAHAYA 30

¹I MIRI napanii, “Ura pàku-ada-nyaka da ngara liku uru Yahunda, nadu nyuda ba da-kawutaru hanggangu lai Nyungga. Nyuda datundu-nja da pakakangu da panda pakaka-nggu. Nyuda datuu tanda limada la pa-ràndingu na ma-pahilitu dàngu na pawuku-nggu. Ka pabu - bundungu-duda-nyaka da njalada.

²Nyuda da lua la Mehiru dàngu nda karaida panaungu lai Nyungga. Da handera la Mehiru dàngu damonu-nya na pa-ndulangu-na na hanganji Mehiru.

³Tàka nuna na hanganji na pahala-ha da etida nyuda, dàngu na opangu na pamonu-da welingu la Mehiru napa nanduka.

⁴Jiapa-kadu ka mbàda tàkada da tau papalewa Yahunda la paraingu Huangu dàngu Hanihu la Mehiru,

⁵mbuu ndàba na tau napa makia-nanyaka nadu ba mbàda monu-nanyaka na banjaru nda palingu. Na pangala-da nda pautu wàngu-aya, tàka paakangu-ya,” wàna.

⁶Yiana-ya na hupu liina i MIRI na ngerada da banda da mangia-nya na tana mbara luru, “Da ngara papalewa dawotu-nja da kalandai dàngu da otada ngàndi pawua juangu, hàla dali ningu la ngaba madangu pa-manjurangu wàngu, pangia-da da hinga, da kataru pa-upahungu dàngu nangga pawulu kàpangu. Da pawua juangu nuda dawotu-ha la hau banjaru na manda màka ndoku pandula-ha nyuda.

⁷Na pa-ndulangu-na na Mehiru kahewa-maana. Jia-duya hi kutunya tamu paaungu-na na Mehiru, ‘Ularu nangga manda pa-upahungu,’ wànggunya,” wàna.

⁸I Ala na-paràha-ngga pa-tulihu hàlaha da akatu banjaru-na la hau mbuku ka tanda panda ma-rombangu-ha lundu nu - nu.

⁹Nadu, nyuda ba banjaru ma-mbuhangu pa-kawutaru-ha hanggangu lai Ala, dakàli kambàliku, dàngu nda da-handàkangu pa-mbuhangu pa-patingingu lii pa-ajaru welingu lai MIRI.

¹⁰Nyuda dapanii-nja da ngara wunangu, “Bitanya na ngarumu! Àmbu panii-dunggama nggàraya na ma-deningu. Panii-yaka jàka nggàraya na pambuha-ma la parongu-ya. Puli bia-nggama ka ma-padaingu pahora duma.

¹¹Laku kau hinggilu, àmbu ngguma-nggama. Nda ma-mbuhangu-a parongu-ya na ngerana na Ala matua Ihirailu,” wàda.

¹²Tuna nuduka hi tuna yia na paniina i Ala matua Ihirailu, “Nyimi mi-tulaku-ya na pulunggu dàngu hi bokulu eti wànya na kapidihu dàngu na pa-lapingu.

¹³Jia-duya hi njala-minya. Nyimi pangera kangeli janggakai maràta weli ditangu hu wawa; ndedi mbàdiku-na nyimi njoru-maami-nyaka.

¹⁴Nyimi napa mbera karunggutu hama tuna wuru tana na mambera tanyalangu, hi lupa nda hilu hakadipu paràka pawàngu la paputu wàla epi welingu la tuluru jàka ndia pataku wàngu wai welingu la mbàlu,” wàna.

¹⁵I MIRI Mahupu-mbiha, na Ala matua Ihirailu, napanii-nya na banjaru-na, “Panjilungu dàngu mandangu-wa, napa Nyungga ka ku-pamàna-nggai. Pawaiwa lai Nyungga dàngu mànjaku etimi, napa Nyungga kupa-kapàru-kai,” wàna. Taka nyimi ndai bihu!

¹⁶Tàka hi mbàda pakakangu-biami la papalai welingu la muhumi bai wàngu pa-kaliti njara palai. Hàmu! Ba jiangu-ma ipalai bàdi napa! Bai pangàdangu da njarami da-mbangatu palaida, ba tuna da tau da mayaulu-kai darihi mbangatu-pa duda.

¹⁷Harata-ya na mapalai ba daita-ya na haàtu muhu, dàngu tau malima-a jiaka-ma-a bai palai hàla nyimi mbuu ndàbami. Na mani-kinya welingu la pambami jia-kia-yaka ba hapungu-na na andu penji dita la pinu tandula.

¹⁸Na nyuna ba tuna i MIRI patiangu-mana-nyapa rehi rapa pa-itangu-na mila etina lai nyimi. Rimangu-mananya la pamila-nggai eti. Nadu Nyuna i MIRI ba Ala mawunda-ya jàka nggàraya na ma-patubangu. Oha-anaka na tau na ma-monungu lai Nyuna.

¹⁹Ha nyimi ma-ngiangu la Yeruhali, napa nyimi ndai hii pangalangu-apa. I MIRI namila etina, dàngu napa nalu hema-makai duna jàka mi-warangu la pakarai pa-ndulangu lai Nyuna.

²⁰I MIRI napuli-nggai la papàda-nya na rehi kamangu na mambotu, ba papeka-dunanggai. Tàka nàhu Nyuna wikima duna na ma-hadidi-kai hi lupa mipàda-nya ba ninya Nyuna.

²¹Jàka era hiliru-mi welingu la ànda, la kajiami napa mirongu-maya duna ba nawara-nggai, “Yiana-ya na ànda, liya na ànda yiana,” na mawàna-nggai.

²²Da kahala hada marapu-mi da pa-apihungu àmahu bara jàka ndia àmahu rara napa ikawuka wàrunja hama tuna na wàrungu ma-marihaku, dàngu paniimi, “Pa-yilangu-wa welingu lai nyungga!” wàmi.

²³Jàka era hàbarungu-minya wini, i MIRI napa na-papurungu urangu ka peku tumbuna na wini dàngu ka ngalangu papàpu wuana ma-bundungu. Ndumada da bandami napa ninguma duna maràda pa-rumbangu ma-lerangu.

²⁴Da hapi mini rombangu dàngu da kalandai maluku-ha da wokami napa dangangu pangaa banda marihi hàmu, da pa-payema kahaungu.

²⁵La lodu nggupulu-ha da tindingu muhumi dàngu ba pameti-ha da tauna, nimbihu da palindi dàngu da tandula da pa-tapanjirungu ana luku.

²⁶Na wulangu napa naharii hama tuna mata lodu, tàka na mata lodu napa na-harii papihu wundangu paharii welingu la harii memana, hama tuna na harii la dalu pihu mbua lodu jàka pambulu-nja. Nuda mbuu ndàbada napa danjadi la rehina i MIRI ba na-kamburu-nja dàngu ba na-palànga-ha da manua-na na banjaru-na na pambàda pajàra-na.

²⁷Na kuaha-na dàngu na mangunju-na i MIRI paita welingu la mamarau-ya. Na epi dàngu na kutungu pa-itangu-nanya hànggana Nyuna. Na kareuku dànanja Nyuna dàngu da puluna da-patunu hama tuna epi.

²⁸Na-paràha-nya na ngilu pa-mangilu-nya Nyuna hama tuna na iwa pahupu nggorungu mawari-ya mbuu ndàbana. Na-pamolu-nja daba - banjaru, hi na pabeta-nja da pa-pakaka-da da ma-akatu.

²⁹Tàka nyimi dimi, banjaru-na i Ala, napa hawola-minyaka dàngu ludu-minyaka hama tuna na pawàngu la rudungu mbabu la lii anggama. Nyimi napa mimbabu hama tuna na tau na malaku pa-jurungu ba da-pandutungu da taleli hanggangu la Umana i Miri, na ma-kahiri-ya na Ihirailu.

³⁰Napa i MIRI na-parongu-nya na hanggubu nggoruna na ma-bokulu, dàngu na tauka napàda-manya na kuaha-na na-mawirungu. Na hànggana napa na-patàkangu epi ma-pakehi, ura kawalu, ura watu dàngu làpuru.

³¹Na tau Ahuru napa na-kanggupuku ba narongu-yaka na nggoruna i MIRI dàngu ba dapàda-nya na hukungu welingu lai Nyuna na mambotu.

³²Ba talànga pàda-danyaka na pa-nutakungu-na patungu, na banjaru-na i MIRI mbabu wàngu-danyaka lingu lamba dàngu jungga. I Ala wikima duna malawa-nya na tau Ahuru.

³³Piti weli àmangu-maka ba pa-yemangu pangia patunu-ya na hanganji Ahuru. Na pa-ngiangu nuna na-manjolungu dàngu na lerangu, nambinu wàngu ai mutungu ba dapabu - bundungu. I MIRI napa na-paroka-ya ba nahapui-ya wàngu kayeku-na mahama luku tana liraya.