Read Kambera YAHAYA 31 Bible Online

YAHAYA 31 - Kambera bible

YAHAYA 31

¹Ura-pàku-adaka da tau da malaku la Mehiru pakarai pa-ndulangu! Nyuda da-bokulu eti wànya na kapàru-na na pamba pabera Mehiru, da pamba ma-kaliti njara, dàngu da njarada da ma-kapàru hamangui da kareta-da da madangu. Tàka nda dawaiya i MIRI, Ala matua Ihirailu dàngu nda dakarai-a pa-ndulangu-na.

²I MIRI na-manggàna dàngu napinya jàka nggàraya na pa-palaku-na. Nyuna na-patàka-nya na ura pàda dàngu na-palaku-ya na pangàdungu-na la pahuku-nya na tau akatu dàngu na tau mandula-ha nyuda.

³Da tau Mehiru tau-maaha, nda Ala-aha. Da njarada nyuda pa-padikangu-ma-aha, nda da-pahuri alangu-a. Jàka era pa-luangu-na lima i MIRI, nuna na banjaru ma-pandulangu napa na-tunjuru, tàka na banjaru na pandula-na napa njoru-nanyaka. Nu ka kawàra molungu-danyaka.

⁴I MIRI napanii lai nyungga, “Hama tuna na hinga na ma-kangàriku ma-pamandu-nya na payàpa-na dàngu nda peku pa-mangàdatu-ya paraï kaladaku dàngu warada da ma-pawangu da pawànda la palawa-nya, tuna numbu Nyungga napa ba ku-pamàndu-nya na Tandula Hiungu.

⁵Hama tuna na heu na ma-hawurungu na ma-kanggàpaku la pinu hibuna ba na-kahiri-ha da anana, tunggu numbu Nyungga, MIRI Mahupu-mbiha napa ba ku-kahiri-ya dàngu ba ku-katindi-ya na Yeruhali,” wàna.

⁶I MIRI na-panii, “Ha banjaru Ihirailu, nyimi milawa-ngga dàngu minjala-ka lai Nyungga. Tàka nàhu, beliwa lai Nyungga!

⁷Napa natàka na rehina nyimi mbuu ndàbami bai wàrunja da kahala hada marapu àmahu bara àmahu rara pa-pandoi-mi wàngu mbinu njalami.

⁸Na Ahuru napa pa-pamolu-nya la pabera, na nyuna nda ruku màka tau. Na tau Ahuru napa napalai welingu la ngia pa-kangaburu, dàngu da ana bidi minida nyuda napa patuha ata.

⁹Na hanganji-da napa napalai paraï pa-mangàdatu, dàngu da ngara ma-kaborangu-da da-katàtaku halawàla, hi lupa da-dunjaku-nja da penji pabera,” wàna. I MIRI na mambàda panii, i MIRI na pa-lumungu wàngu kameti maraku patunu la Yeruhali.