Read Kambera YAHAYA 32 Bible Online

YAHAYA 32 - Kambera bible

YAHAYA 32

¹Tàngaru na rehina napa natàka na haàtu hanganji na ma-pareta wàngu ma-padeningu, dàngu da liku uru - liku uru banjaru da-palaku-ya na ma-padeningu.

²Nyuda nimbihu-da hama tuna na ngia pa-hangindingu welingu la ngilu dàngu làpuru. Nyuda ngera hama tuna na luku na ma-lulungu la maràda wara, hama tuna na maü kaba watu bokulu la tana katuku riku.

³Na tau na mangita nda jia kapudangu-ada, dàngu na marongu da tanaü-ya.

⁴Na tau na marengga hambumbatu làti, napa nawàngu lerangu etina dàngu pananjarungu-na. Na tau na ma-kaàkaku làti, napanii pa-tànjingu.

⁵Na tau nduba ràka patembi-ya nda wàda-apa, dàngu na tau palapingu tau patutungu-ya nda wàda-anyapa.

⁶Na tau nduba napanii ma-ndubangu-ma duna, dàngu na-pakakangu patuu ma-akatu. Nggàra biaya na palaku-na jàka ndia na papanii-na paakangu-nanya hanggangu lai Ala. Nda na-handàkangu-a pa-wuangu pangangu la mamanjuu jàka ndia pa-unungu la mamadau.

⁷Tàka na tau kaputingu na-kanandi-nya dàngu nawunda ma-akatu. Nyuna nahimbu wulu aka la pa-hanggàmaru-ya na tau mila ruku kambàliku-na dàngu na-pabeta-nya la pangala-nya na hàkuna.

⁸Na nyuna na tau matua eti na-matua-ma duna na pa-pakaka-na dàngu na-matua-mbu na pawàna.

⁹Ronguwa dimi, ha kawini - kawini maluri la mahàmu, manda ningu handukangu!

¹⁰Peku-mipa nàhu la panda nggàra ehimi, tàka ràkangu hau ndaungu-kiaka nyimi bai mbota monungu, nadu ba nda ningupa wua angguru papàpu-mi, dàngu nda ningumbu ihi raïngu hawiangu.

¹¹Lundu la rehi nàhu na lurimi nahàmu, nda ningu ma-handuka-nggai. Tàka nàhu nyuna kandàndaku-wa bai mangàdatu! Pukalu-ha da pakimi dàngu borungu-wa hinggi karungu la bànggimi.

¹²Paduduru-njawa da woka kamboka-mi dàngu da woka angguru-mi da ma-kabàta wuada,

¹³nadu na tana banjaru-nggu mbàda tumbu-nanyaka wuku rumba patara. Màla hiinja-wa da umami na ngia pa-hawola dàngu na paraingu na maremi ma - mànu!

¹⁴Jiapa na uma hanganji-mbu napa pa-dunjakungu-ya dàngu na parai puhu pareta na mambabu napa na-malinggitu kahàna. Na tandula dàngu da lewatu ngia padai papambidahu la tanaya lundu nu - nu. Da kalandai matàmba dàngu da mbimbi tanyalangu-danyaka pangangu rumba lai nu.

¹⁵Tàka hili handàkangu-mapa napa ba namai wàngu kuaha-na i Ala. Na maràda telangu napa nanjadi woka - woka ma-kamboka, tàka da woka napa hama omangu-ha.

¹⁶La nggubulu tana napa kada-nanyaka na patutungu dàngu na pa-deningu.

¹⁷Nimbihu-na na tau napa dawunda-ya na mahàmu, jia-duyaka napa hi ninya na peku hàmu dàngu na ngudu mànjaku lundu nu - nu.

¹⁸Na banjaru-na i Ala napa namara welingu la handuka, hi daluri la pangia mapeku dàngu ma-mànjaku.

¹⁹Oha-amika dimi mbuu ndàbami, nadu ba ningu-padua wai ndumada da pa-runjuku-mi dàngu da bandami ngangu-danyaka rumba la nggi - nggi dàngu nda nggàra ehida. Tàka na muhumi hama tuna omangu na patuni ura watu mboka dàngu na paraingu-da nyuda napa pa-nyungguru-ya.