Read Kambera YAHAYA 34 Bible Online

YAHAYA 34 - Kambera bible

YAHAYA 34

¹Maiwa kai pauhi, ha dimi banjaru, dàngu patingingu-wa. Màtawa na pinu tana nggubulu-na dàngu mbuu ndàba na maluri lai nu ka damaï parongu.

²I MIRI nahàngga-nja da banjaru mbuu ndàbada dàngu da pamba-daka. Napa nahuku-nja hi na patàlaru-ha nyuda.

³Nda patani-anja da metida, tàka pa-màtangu-ha pa-mbubuku hi dawau. Napa darara da palindi ba na-njànjaru-nja wai riada nyuda.

⁴Na mata lodu, na wulangu dàngu da kandunu napa da-làjaru. Pa-kulurungu-ya napa na awangu hama tuna karàta pa-kulurungu. Napa da-kanabu da kandunu hama tuna da ruu ai ma-kawàraku welingu la pingi ai.

⁵Mbàda peyema-nanyaka la awangu na hapanda-na i MIRI, tàka nàhu na hapanda nuna pinjalu-nanyaka na banjaru Endumu na pambàda panggàna-nya hukungu dàngu na pa-patàlaru.

⁶Na hapanda-na i MIRI napa na-maletaku la wai ria dàngu na-kapiri-nya aparu-da nyuda, hama tuna wàngu wai ria dàngu aparu banda kameti maraku. Nadu ba pa-yemangu-nanya kameti maraku la Mbòhura i MIRI, dàngu rupu pada - dangu-nanya la tana Endumu.

⁷Dameti napa da tau hama tuna hapi matàmba dàngu kamboka hapi. Narara hama tuna wai riaya dàngu na-kapiri wàngu aparu na tanada.

⁸Jia-yaka nuna na rehina i MIRI napa ba na-kahiri-ya na Hiungu dàngu ba na tungu hilu kiringu-na la muhuna.

⁹Napa da-pambeli-ha teru da luku la Endumu, tàka na tanada tana lira-yaka. La hupu njàpuna naroka hama tuna teruya nggubulu-na tana.

¹⁰Lodu rudungu nda nambàda-a na rokana, dàngu na-hambutalu lundu nu - nuya na kutungu-na welingu lai nu. Napa pa-dunjakungu-ya lundu ana umbuku nuna na tana ka nabulu jua dàngu màdu marokutu-na dàngu nda haàtu-mbupa napa mali ningu lai nu.

¹¹Ngia-nanyaka napa nggaha matàmba dàngu wei rumba, wàngi dàngu ngganggaka ma-ndàdiku lai nu. Napa na-pawiti-nya paraïna i MIRI hi nda nggàra linguna dàngu hi nabulu jua nuna na tana hama tuna ba ndedi pa-padikangu.

¹²Nda ningua hanganji ma-pareta-ya nuna na tana, tàka da liku uruda mbuu ndàbada da-molungu-ka.[44]

¹³Da uma hanganji dàngu da paraingu-na da maningu tindingu natumbu-nja napa wuku rii madàka dàngu rumba, tàka hi nangia-nya ahu rumba dàngu ota pawulu kàpangu.

¹⁴Da banda bohu napa da-manyala ningu lai nu; da kuu dapahe - hemangu, tàka da wàngi[45] dahimbu ngia pa-hangahu-da.

¹⁵La pangia lai nu dawulu hibuda da kataru pa-upahungu, hi datilu, dabukutungu hi da-kabubulu-ha da anada. Da kapàhambu da-pauhi ba kawàra ningu papada.

¹⁶Himbuya dàngu dihaya la Mbukuna i MIRI: Nda heua ma-mbulangu welingu la dika nuda jàka ndia na manda ningu papana. Nadu ba tuna numaka na hupu liina i MIRI, dàngu ba Nyuna wikima na ma-pauhi-nja.

¹⁷I MIRI-ma duna na ma-paberi-nja nyuda nuna na tana hi da-maràngga ngalangu ndumada. Napa nyuda da-engangu lai nu lundu nu - nu, tàka hi damangu-nya nuna na tana lundu handalaru handàdiku.