Read Kambera YAHAYA 37 Bible Online

YAHAYA 37 - Kambera bible

YAHAYA 37

¹Ba narongu-ka i Hanganji Hihikia na pa-patàka-da nuda da tau madua haàtu, bàriku-nanjaka da pakina, hi nakalambungu hinggi karungu tanda handuka-na, hàla ka lua-nanyaka la Umana i MIRI.

²Tunaka nu palewa-nanjaka i Eliyakimu, na kapala kuru uma hanganji, i Hepuna na mini tulihu nanggara dàngu da ngara ratu da maningu pànggatungu la palua tomaya i Wunangu Yahaya, anana i Amuhu. Nyudambu dapaki hinggi karungu.

³Yia-nayaka na hupu liina i Hihikia, na pa-patàka-danya i Yahaya, “Na lodu nàhu lodu handuka-ya; nyuta pa-hukungu-taka dàngu pa-pamakia-taka. Nyuta beri kawini ma-patikingu pa-paana, tàka nanjàpu-ka na àtalu-na.

⁴I Hanganji Ahuru na-palewa-yaka na ngora tanatara majangga pànggatu-na la pa-paaka-nya i Ala na maluri. Rai-ai duna hi mbàda rongu-nanyaka i MIRI Ala na pa-akangu nuna, dàngu hi nahuku-nja napa nyuda nu da mawunda-ya nuna! Jiaya ba tuna hamayangu-wa lai Ala ndumada da taunda da maluri-kipa,” wàna.

⁵Ba narongu-yaka nuna na hupu liina i Hanganji Hihikia,

⁶i Yahaya na-paràha-nja da papalewa pa-patàka-nya na hemana yiana, “Napanii i MIRI, àmbu mangàdatu-du tamu umbu bau ronguya na pa-wàlahu-da da atana na hanganji Ahuru ba nda namàka-a i MIRI pa-pahàla-ta nyuta.

⁷Napa i MIRI na-pawiti-nya nahanganji Ahuru hi kiri pamàndu-nanya na pulu kareuku ngilu hi kiri belina la tanana, tàka lai nàhu hi pameti-ya nyuna,” wàna.

⁸Na ngora tanatara Ahuru nuna narongu-ka lii, na hanganji-na ba mbàda dunjaku-nanyaka la Lakihu dàngu ba talànga pabera-na lawanya na paraingu Lipuna, nda nggi tuna marauna welingu lai nu. Ka lua-nanyaka lai nàhu patoma-ya na hanganji-na.

⁹Na hanganji Ahuru mbàda rongu-naka lii, na pamba Mehiru na pairu ngàndina i Tiruhaka welingu la Hundangu talànga nàmu-manyaka la pakalulukunja nyuda. Tuna nuduka hi napangàndingu huratu na hanganji Ahuru lai Hihikia,

¹⁰hanganji Yahunda. Tuna yia na linguna na huratu, “Àmbu na-panyonga-dukau na paràndina na Alamu na pa-bokulu eti wàmu, ba ndau handipalu-a nyumu la limanggu nyungga.

¹¹Mbàda rongu-mamu-nyaka, nimbihu-da da paraingu da pa-kaluluku-da da hanganji Ahuru, ba palàjaru ailulu-ha. Bau ngàdaya nyumu peku maramu?

¹²Ba jiaya na bokunggu la mangilu ba na-palàjaru-ha da paraingu Nggohàngu, Haràngu dàngu Renjipu, lupa ba na-pameti-ha da tau Endingu da maninja la Telaharu, nda haàtu-mbu welingu la marapu - marapu-da ma-pamara-ha nyuda.

¹³Ka nggihaka nàhu da hanganji paraingu Hamàtu, Àrapàtu, Heparàwaïmu, Hena dàngu Iwa?” wàna.

¹⁴I Hihikia nakeiya nuna na huratu welingu la tau papalewa hàla hi nambaha-ya. Tunaka nu ka laku-nanyaka la Umana i Miri, hi na-wàlahu-ya nuna na huratu la hanggana i MIRI,

¹⁵ka hamayangu-nanyaka,

¹⁶“MIRI Mahupu-mbiha, Ala Ihirailu ma-mandapu la pinu patau awangu,[47] Nyumu didi-akau Ala ma-kuaha ndàbaha da pa-hanganji la pinu tana. Nyumu-maka ma-padika-nya na awangu na tana.

¹⁷MIRI, hamata àruya jàka nggàraya nàhu na matumbu lai nyuma. Ronguya mbuu ndàbana na paakangu-na i Hànaheripu hanggangu lai Nyumu, Ala Maluri.

¹⁸Mapi hàla-manya duma MIRI, da hanganji Ahuru ba mbàda pa-molungu-daka banjaru dangu hi da-palàjaru-ha da paraingu-da.

¹⁹Da marapu - marapu-da datunu-ha hi da-palàjaru-ha, nadu nuda da marapu ba nda ana nggàrama duda pa-kuaha-da. Nyuda ba kahala hada-aha welingu la ai la watu, ruku lima tau.

²⁰Ou MIRI Alama, pahàla àru-kama welingu la tau Ahuru, màta mbuu ndàbana na banjaru la pinu tana ka napinya ba Nyumua MIRI, ba didi-maakau Ala,” wàna.

²¹Tunaka nu i Yahaya na-pangàndi-nya lii langu na Hanganji Hihikia, na hemana na hamayangu-na na hanganji,

²²i MIRI napanii, “Na paraingu Yeruhali nariki-nggau dàngu na-paaka-nggau nyumu, Hànaheripu!

²³Mupinya nu, nggamuya na patola-mu dàngu na-papawawa-mu? Nyungga-maka Ala Ihirailu, Ala ma-matua.

²⁴Nyumu mu-paràha-nya na papalewa-mu la papanii abungu ba mbàda panyàku-muhaka da palindi mahupu jangga la Limbanongu wàngu kareta pabera-mu da madangu. Mupanii abungu ba mbàda punggu-muhaka da pingi kajiu da marihi jangga dàngu da marihi manandangu, hamanai ba mbàda lumbu làpahu-munja da omangu-na da marihi timbi.

²⁵Màlambu nyumu bau hamemu wànya na àkimu humuru hiu unungu wai la ta - tana hangàdangu, dàngu da panjuri-mu ba dakali - lijaku-nya na Luku Nilu hi lupa namihi.

²⁶Ndedi uhandàkangu-ma dumu parongu nuna mbuu ndàbana ba mbàda pakaka-manggu-nyaka weli àmangu? Tàka nàhu ba Nyungga ma-palaku-ya. Nyungga mawua-nggau nyumu kuaha la pa-palàjaru-ha da parai - paraingu maningu tindingu-na hi lupa kanànda-kia-danjaka.

²⁷Da tau da ma-ngiangu lai nu nda ana nggikina wàdama, da-katàtaku dàngu da-mangàdatu. Nyuda hama tuna rumba la maràda jàka ndia rumba matumbu dita la toku ndidu umaha, da mameti jàka na-jiliru-haka ngilu timiru mambana.

²⁸Na nyuna kupi hàla-manyaka na ngera wikimu nyumu. Kupi-manya jàka nggàra ulamu dàngu jàka nggi luamu. Kupi-manya nyumu ba mbeni nda uku-mungga Nyungga,

²⁹kurongu-mayaka na ruku mbenimu dàngu na ngambamu. Nàhu tunggu-nggauka ketu la urumu dàngu rapa la ngarumu, ka peku yila-nggunggau pali la ànda na pambàda laku limu bau pamaingu,” wàna.

³⁰Tunaka nu i Yahaya hi na-pangàndi-nya na lii langu yiana-mbu lai Hihikia, “Yiana-yaka na manjadi tanda ndumamu nyumu. Napa na tau la ndaungu nàhu dàngu la ndaungu manàmu-nya dangangu uhu nggàndumu matumbu wikina. Tàka hàlaka nu peku-daka pa-tondungu uhu nggàndumu dàngu angguru dàngu hi dapàda-nja da pangala-da.

³¹Da tau Yahunda da maluri-ipa napa da-mbokaru hama tuna na matumbu ba na-manjolungu na amuna dàngu ba ngalanya wuana.

³²La Yeruhali dàngu la pinu Palindi Hiungu napa ninja da tau da mamara, nadu i MIRI Mahupu-mbiha ba mbàda kawuku-mana-nyaka na ngerana nuna ba nadedi langatàka.

³³Yiana-yaka na papanii-na i MIRI na ngerana na hanganji Ahuru, ‘Nda jia tama-ananya napa na Yeruhali jàka ndia nda natungu-a hapungu pana hanggangu la paraingu nuna. Da panjuri - panjuri da maningu temingu nda haàtu-mbu napa malihi-nya na paraingu nuna, dàngu la weli winggiru-na napa nda patu-anya kamutu nggupulu-na.

³⁴Na hanganji Ahuru napa nabeli li la ànda na palina ba na-pamaingu, dàngu nda tama-nanya nuna na paraingu. Nyungga, MIRI, mapanii.

³⁵Na paraingu Yeruhali napa ku-kahiri-ya dàngu ku-katindi-ya, lumuna na patembi wàngga Nyungga dàngu lumuna na pa-ràndingu-nggu dàngu i Ndautu atanggu,’ ” wàna.

³⁶La rudungu nunama na papalewa-na i MIRI ba namai la ma-pamaü terangu-da da tau Ahuru dàngu hi na pameti-ha ba tau 185.000-ya. Hadangu harii la mba - mbaru da metida tapàlangu-danyaka.

³⁷Ka kandulingu-nanyaka i Hànaheripu, hanganji Ahuru, hi nabeli la Naniwa.

³⁸La hau na lodu, ba talànga lumungu-na la uma marapu Niruku, pameti wàda-nyaka hapanda paraïda i Àndarameliku dàngu i Harehiru, da anana mini. Hàlaka nu palai-danyaka la Araràtu. Tàka i Ehàruhandungu, na anana na haàtu-ka na ma-hanganji, hiluya.