Read Kambera YAHAYA 38 Bible Online

YAHAYA 38 - Kambera bible

YAHAYA 38

¹La manggawa-na na rehi nuna handauni-nanyaka hidu i Hihikia, natika pameti-ka amangu. I Wunangu Yahaya anana i Amuhu, na-tadalu-ya nyuna dàngu hi napanii, “I MIRI na-pangàndi-nggau langu ka pekuna nyumu tamu umbu kau pa-lànyapu ndàbaya na pa-paloku, nadu nyumu tamu umbu napa ba ndau mandangu-apa. Nda namandai-apa nyumu tamu umbu ba meti-munyaka,” wànanya.

²Pambelingu-nanyaka i Hihikia la dindingu hi na-hamayangu,

³“MIRI, namu àruya, nyungga yia ba kuata lai Nyumu ba dàngu tuturu dàngu tànji eti-manggu. Nyungga naingu-mana ba ku-pamukarungu la patundu-nya na pambuha-mu,” wàna. Hàlaka nu hii pa-manaürungu-nanyaka.

⁴Ba na-hàlaka palaku i Yahaya, i MIRI na-paràha-nya

⁵pabeli lai Hihikia dàngu la pa-patàka-nya na lii yiana, “Nyungga, MIRI, Ala palumu-na i Ndautu na boku la mangilu-mu, ku-rongu-yaka na hamayangu-mu dàngu kuita-mahaka da wai matamu. Napa kubonja-ya hakambulu lima mbua ndaungu na ndaungu lurimu.

⁶Napa Nyungga ku-pahàla-kau nyumu dàngu na paraingu Yeruhali welingu la hanganji Ahuru. Na paraingu yiana napa daingu-mana duku ba ku-katindi-ya,” wàna. Hàla, paràhangu-nanyaka tau i Yahaya paperi-nya wua kapilitu pambàda pamija la manggàri-na i Hihikia ka napuli. I Hanganji Hihikia na-paàrangu, “Nggàra-yaka na tandana ba na-pamàlaru-ka napa i MIRI dàngu ba peku hili luanggu-pa la Umana i Miri?” wàna.[48]

⁷Nahema i Yahaya, “Yiana-ya na tanda na pawua-nanggau i MIRI tamu umbu, ba na-pahàra-nya na paràndi-na.

⁸Na tanda la njàmu mata lodu pa-pandoi-na i Hanganji Ahàhu, napa i MIRI na-pawiti-nya hi na-kandulingu hakambulu walaku na ma-pamaü,” wànanya. Ka kandulingu-nanyaka na mamaü hakambulu walaku.

⁹Ba na-mandangu-ka i Hihikia, tulihu-nanyaka na wiliku wotungu yiana,

¹⁰“Kupanii, hina-apa padua taunggu, lupangu-maka bàdi kulaku, ba ku-panjàpu-ya na rihi luringgu la parai tau meti.

¹¹Kupanii, nda kuhili ita-ayapa i MIRI la pinu tana, jàka ndia la pa-itangu tau la pinu tana yiana.

¹²Ba nambota-ka na luringgu jia-yaka na rehi pa-kawuku-ngga, hama tuna maü ma-pawangu pa-nyànggaru; hama tuna tera palota la ngia pa-tinungu; kukaka-ya i Ala panjàpu-nanyaka na luringgu.[49]

¹³Maru - rudunggu ba ku-kaladaku paraï pa-katiu, da ringgu beri pa-karunggutu-naha heu hinga; kukaka-ya i Ala panjàpu-nanyaka na luringgu.[50]

¹⁴Na nggorunggu namàli dàngu nda na-duluku, hama kulundiha-ka ba kukanguu. Da-mayila da matanggu paraï pa-tangara la awangu, MIRI pahàla àruka la handuka-nggu yiana.

¹⁵Ka nggàra wànggu-aka? Yiana rukuna i MIRI-ya; nda peku katuda-nggu paraï pa-hawina.

¹⁶Dou MIRI, wuangga luri rukuna na pulumu dàngu na paruku-mu, màtawa ka kuluri ndumamu Nyumua.[51]

¹⁷Na mayila-nggu napa na-pambeli-ya mànjaku, Nyumu mu-pahàla-ka[52] welingu la manjurangu; da njalanggu mbàda jàma hàla-munjaka.

¹⁸La kaliungu tau meti nda ningua mawotu-nggau Nyumu, na tau meti nda napeku la pamonu-nya na tuturu-mu.

¹⁹Mbulungu tau luria mawotu-nggau Nyumu, hama tuna ba tunggu nu la lodu nàhu. Da ina amada dapeka-nja da anada ba nda uku tuturu-kau Nyumu, dou MIRI.

²⁰MIRI Nyumu ma-pamàlaru-ka, jiaya hi mawunda-nggau ludu wotungu la Umamu ba ma-kàritu jungga, la ngala lurima,” wàna.[53]