Read Kambera YAHAYA 40 Bible Online

YAHAYA 40 - Kambera bible

YAHAYA 40

¹Tuna yia na paniina na Alamu, “Omba-yawa, omba-yawa na banjaru-nggu!

²Pangudu-ha da eti tau Yeruhali, peka-njawa ba kanjupungu-nanyaka na ngerada ba ataha. Da ndokuda mbàda jàma-nggunjaka,[54] ku-pandua hama dangunja ba kuhuku-nja da njalada,” wàna.

³Ningu tau ma-warangu, “Rimanya ànda i MIRI la maràda telangu. Pamola-nya ànda bokulu la maràda nggailaru ndumana na Alanda!

⁴Nimbihu lolangu lupangu hungguru-manja bàdi, da palindi da tandula pa-ndidaru-ha. Da tana ma-patundungu ka danjadi-ha ma-ndidaru, da ma-karoba - karobaku pa-kamilihu-ha.

⁵Na bunjuku-na i MIRI napa pa-pawuwa-yaka; na tau mbuu ndàbana da-kawàra itaya. Langatàka i MIRI wiki-maka na mambàda ràndiya!” wàna.

⁶Ningu tau mawara, “Bobaru-yawa!” wàna. “Nggàraya na pa-bobaru-nggu?” hi wànggu ba ku-paàrangu. “Bobaru-ya na tau hama rumba-aya, hama wàla ai ma-mananda handàkangu.

⁷Na rumba nameti dàngu na wàla ai na-malaï, jàka na-hapui-nya ngilu mbana i MIRI. Langatàka na banjaru nuna hama tuna rumba-maaya.

⁸Na rumba nameti dàngu na wàla ai na-malaï, tàka na liina na Alanda na-torungu lundu nu - nu,” wàna.

⁹Heiwa la palindi jangga, dàngu pakada-nyawa na lii hàmu la Yeruhali! Wara pa-kodungu-wa, dàngu pakada-nyawa, na lii hàmu la Hiungu![55] Pekanja da paraingu Yahunda napa ba nàmu-nyaka na Alada nyuda!

¹⁰Tàngaru, i MIRI Ala namai wàngu kuaha-na la pa-paluangu lima wàngu kaborangu-na. Nakiri-ya paraï da tau da pambàda pahàla-na.[56]

¹¹Hama tuna haàtu ma-pawangu Nyuna na-kulipu kabàba-na; Nyuna wiki ma-pauhi-nja nyuda. Da ana mbimbi nalunggu-ha, nawàngu ma-malijangu ba nairu ngàndiha da baida nu da manguna.

¹²Nggamu mamàka pa-takaru wànya tàbalu limana na libu muru, jàka ndia ma-hukutu wànya panggana na hanggubu awangu? Nggamu ma-takaru wànya takaru na tanana na pinu tana jàka ndia matimba-nya mbotuna na palindi la ndahingu?

¹³Nggamu ma-kapipi-ya i MIRI, jàka ndia ma-papeka-nya beri ma-panaunya Nyuna?

¹⁴Lai nggamu ngia pa-paàrangu-na i MIRI ka na-ngalangu pingu dàngu jàngapu? Dàngu nggamu ma-paita-nya Nyuna ka na-nggànangu na pawàna?

¹⁵Lai MIRI da ba - banjaru hama tuna ha-kambàtiku wai la hambaha, hama ha-kawutiru kabu tana-aya la ndahingu; da nuha hama halela-da dàngu kumburu tana kangudahu.

¹⁶Mbuu ndàba da banda la omangu Limbanongu nda da-jàmungu-a patuha kameti maraku patunu; da pingi aina nda da-jàmungu-a la patuha ai mutungu.

¹⁷Mbuu ndàbada da banjaru nda nggàra-aha lai Nyuna, beri hama tuna ba nda ninja la hanggana Nyuna.

¹⁸Ka nu i Ala nggamuka hamana wàmu? Nggamuka wàmu bau kakaya na hama hadana Nyuna?

¹⁹Nyuna nda hama-ada da kahala hada da ruku limada da tukangu, kahala tau pa-apihungu àmahu rara dàngu na ma-latangu àmahu bara.[57]

²⁰Na tau manda màka pakei àmahu marara mabara,[58] napindi ai manda muda pamobu. Nahimbu mini pandoi mamàhi, la pa-pandoi-nya kahala hada na manda muda pa-hanggubalu.

²¹Nggiki hamana hi ndau pinya dàngu hi ndau ronguya, dàngu hi nda papanii-nggau nu weli àmangu? Nggiki hamana hi ndau jàngapu-ya welingu la wungana, jàka nggikina na pakiringu-na na pinu tana yiana?

²²Na ma-padika-nya ditaya na-mandapu ningu la pinu kawori pinu tana, na mangia-nya na-màrahu-a ba itaya hama kabala-aya. Nyuna na ma-wàlahu-ya na awangu hama tuna tera, hi na-patàngi-ya hama tuna maü tera ngia pa-ngiangu.

²³Nyuna ma-pawiti-nya hi nda da-pawidi da maningu kuahangu, dàngu hi na-àlingu na kuaha-da da ngara tau bokulu.

²⁴Nyuda ngera hamana na pa-pamula na pabidi runjukungu, ba hina-apa natumbu na amuna. Jàka era pa-hapuputu-nanya na ngilu i MIRI, màdu-danyaka hi na-jiliru-ha ngilu hama tuna rembi.

²⁵Nggamu nu bau kakaya mahama-nya i MIRI Mahupu-matua? Dàngu nggamu-yaka nu na pa-pahama wàmunya?

²⁶Tàngaru la awangu, dàngu hamata-ya! Nggamu mawulu-ha da kandunu? Nyuna ma-wandalu-ha hi hama pambaha, napinja jàka pira nggubulu-da mbuu ndàbada, dàngu na-kawàra paaunja dàngu ta - tamuda. Nda ana ningua ma-mbulangu, nadu ba bokulu kuaha-mananya i MIRI!

²⁷Jiaya ba tuna, Ihirailu, nggikina hiu hali uramu, beri nda napinggau i MIRI Alamu ba handuka-munya? Hama tuna nda na-ihili-nya na ura dedimu, dàngu nda na-kawela-nya na hàkumu?

²⁸Nggikina hi ndau pinya dàngu hi ndau ronguya? I MIRI ba Ala malundu nuya, na ma-padika-nya nggubulu-na na pinu tana. Nda na-handàkangu panjili jàka ndia paonja; nda patoma-ya na kanandingu-na.

²⁹Na-paàtalu-ya na tau na manjili, nawua-nya ringgitu na manda nggiki wàna.

³⁰Da bidi tau dalua-ya la njili dàngu la onja da ana nduluru danjoru paraï pa-hakimbatu.

³¹Tàka na tau na ma-monungu lai MIRI, napa na-ngalangu àtalu mabidi. Nyuda hama tuna mbaku tehiku-ha ma-hawuru pa-janggangu wàngu àtalu wulu kàpana. Dapalai nda daera la panjili, dàngu ba dapangga nda daera la paonja.