Read Kambera YAHAYA 41 Bible Online

YAHAYA 41 - Kambera bible

YAHAYA 41

¹Na liina i Ala, “Kandii dàngu patingi-ngga Nyungga, ha dimi ma-ngiangu la parai - paraingu mamarau. Rimangu ka ninggau la hangga ma-patandangu ngera, ndàharungu-wa kau pekaya na palakara-mu. Màla ka angu batangu-nda, ka tabota-ya jàka nggamu ma-mànangu, dàngu jàka nggamu manjala.

²Nggamu makoda-nya na ma-kuaha welingu la pahunga lodu,[59] dàngu na mawua-nya patalu pangalangu? Nggamu ma-pawiti-nya hi na-pakàku-ha da ba - banjaru, hi na-panyàku-ha lai nyuna da hanganji - hanganji? Na hapanda-na na-pawiti-nya hi da-tanyalangu hama kumburu tana, na panana na-paiha-nja hama rembi pa-hawuru ngàndi ngilu.

³Nayaulu pangalangu hi na-ndàharungu dàngu nda ningu mahànda-ya; darengga da wihina, natika panda dili tana.

⁴Nggamu maruku-nja nuda mbuu ndàbada? Nggamu ma-kawuku-ya na matumbu - matumbu la pinu tana? Nyungga, MIRI, mani memangga weli nungu, dàngu napa nimangga lundu nu - nu.

⁵Na ma-mandapu la ta - tana mamarau daita-ya jàka nggàraya na pambàda raï rukunggu. Hàla nyuda hi da-katàtaku, hi da-analalu paraï pa-mangàdatu, ka pauhi-danyaka hi damai pa-kariangu.

⁶Mbuu ndàba na tau da-kawàra pa-ndulangu, dàngu da-kawàra pa-màndungu etida.

⁷Da tukangu ai da-pamàndungu eti mini tuku àmahu rara, na tau na ma-pamanipihu bàhi wàngu palu tundungu na-wotungu tau mapàha la kandeha pàha. Napanii, ‘Lalu hàmuya na paràma-mu,’ wàna; hàla na-pamàndu wànya paku ka àmbu nanggoda.

⁸Tàka nyumu, Ihirailu, atanggu, banjaru papindi-nggu, nyumu wàlana i Ambarahàmu, ariyaa-nggu.

⁹Mbàda piti-nggunggauka welingu la hupu tana, kupaau-nggau welingu la pangia - pangia mamarau halawàla. Kupanii, ‘Nyumu atanggu-nggau; nda ku-tulaku-aya na papindi-nggu,’ wànggu.

¹⁰Àmbu mangàdatu ba Nyungga makaria-nggau, àmbu na-wudutu na etimu, ba Nyungga Alamu. Nyumu napa ku-paundu-nggau dàngu ku-ndulakau, kulonda-kau wàngu lima talu mehanggu.

¹¹Tàngaru, mbuu ndàba da tau mambeni-nggau nyumu, napa pa-pakàku-ha dàngu da-kamakihu. Da tau da malawa-nggau nyumu, napa da-molungu hi pudahu hàlaha.

¹²Napa muhimbu-ha da tau ma-ndubaku-kau, tàka nyuda napa ndau hunggu-aha. Da tau da ma-pabera dànggau nyumu nàhu da-molungu-ka dàngu damohu-ka.

¹³Nadu ba Nyungga MIRI, Alamu, mayàpa-ya na lima kawana-mu; Kupanii, ‘Àmbu mangàdatu, Nyungga mandula-kau,’ ” wànggunggau.

¹⁴Napanii i MIRI, “Àmbu mangàdatu Ihirailu, jiapa kau kudu dàngu ulamanga. Nyunggama MIRI mandula-kau nyumu, Mahupu-matua, Ala Ihirailu jiaya na Ma-pamàna-nggau.

¹⁵Tàngaru, kutukau nyumu kapambalu pàmbalu, ma-bidingu, madàka dàngu madua ndalaru wàlana. Napa nyumu upàmbalungu palindi - palindi hiu pakabu-ha; da tandula upanjadi-ha hama tuna kalàmba.

¹⁶Napa mutàpi-ha nyuda, hàla hi na-hawuru ngàndiha ngilu dàngu na-hàbaru-nja làpuru. Napa mu-hawola ba MIRI-ka Nyungga, dàngu mu-hamemu ba Ala Ihirailu-ka Nyungga.

¹⁷Jàka era himbu-nanya wai na banjaru-nggu na maura dedi, dàngu ba namàdu na kalamba nggoruna paraï pamadau, napa Nyungga MIRI, kuhema-ya na hamayangu-da; na Ala Ihirailu nda na-dunjaku-anya na banjaru-na.

¹⁸Ku-pawiti-nya hi ninja da luku ma-lulungu la tandula - tandula kamuluku; napa da-kabubalu da matawai la padua ma-ndidaru. Napa kutuya tàma na maràda telangu; na wai napa na-tapanjiru welingu la tana màdu.

¹⁹Na maràda telangu ku-pamula-nya kajuu, pingi haitungu, pingi muratu,[60] dàngu pingi akahia. Na maràda telangu ku-pambeli-ya omangu, omangu eru, mbaranga dàngu kajuu.

²⁰Na tauka napa naita-ya dàngu napinya ba Nyungga MIRI, matuna-nya nu. Napa daeti-wànya hi da-jàngapu-ya, ba na Ala matua Ihirailu na matuya hi tuna nu,” wàna.

²¹I MIRI, hanganji Ihirailu, napanii-nja da marapu, “Pekaya na palakara-mu, wuangu tanda mbuti!

²²Maiwa, dàngu nyuraya nggàraya napa na madedi, ka mapinya na hupu njàpuna napa. Paloha-nya da manjadi na ma-làpahu, palara-nya na ihina ka maeti wànya.

²³Peka-yawa nggàraya napa na madedi, ka mapinggai nyimi ba ala langatàka-kai. Paloku-yawa na ma-palingu jàka ndia na ma-parunggi, ka ma-hangàtaru ba maita-ya.

²⁴Langatàka, nyimi dàngu da pa-paloku-mi ma-kakòlulu-maaya, dàngu da ngara malumu-nggau tau pa-mayitangu-maaha.

²⁵Mbàda koda-nggunyaka na haàtu welingu la pahunga lodu: kupaau-nya ka na-kaluluku weli diangu. Da ngara ma-kuaha napa nakali - lijaku-nja hama tuna na kapihaku, hama tuna na mapipi wurungu ba na-kalijaku-nya na tana wurungu.

²⁶Nggamuya lai nyimi na mambàda nyuraya hi lupa ma-pajia-ya ba ma-deningu-ya? Tàka nda ningua welingu lai nyimi mapanii-ya, nda ningumbu marongu-kai bai panii.

²⁷Nyungga, MIRI ma-kawunga pekanya na Hiungu; ku-paràhangu mangàndi lii hàmu la Yeruhali.

²⁸Ba kuhimbu la hongada da marapu, nda ana haàtu-a ma-paitangu ngerangu, nda ningu mamàka patanggu hema.

²⁹Langatàka, nda nggàrama linguda da marapu, kahala hada palala-ma-aha nyuda manda màka pawunda ana ngga - nggàra, dàngu manda duluku pa-pandoi ana ngga - nggàra,” wàna.