Read Kambera YAHAYA 42 Bible Online

YAHAYA 42 - Kambera bible

YAHAYA 42

¹Napanii i MIRI, “Yiana-ya na atanggu na pa-pamàndu-nggu, na tau papindi-nggu, na maliya na etinggu. Mbàda wua-nggunyaka nyuna na kuaha-nggu, la pangàndi-nya ma-deningu la nimbihu banjaru.

²Nda jia kaladaku-ana jàka ndia nda jia wara pa-kodungu-ana, na talia liina nda parongu-aya nàhu la ànda.

³Na au na ma-tambàluku nda jia pata-ananya, na epi na ma-kapidaku nda jia pàda-ananya. Wàngu tuturu-na napa napeka-ya na ma-deningu,

⁴nda na ndua ndandi jàka ndia nda nambota monungu, lupa na-ndolaku na ma-deningu la pinu tana. Da ta - tana mamarau darinju-nya na pa-ajaru-na,” wàna.

⁵I Ala na-padika-nya dàngu na-wàlahu-ya na awangu; na-làtiku-ya na pinu tana dàngu mbuu ndàbada da matumbu-nya. Nyuna nawua-nya na tau pinu tana kayeku paluri wàngu. Na-patàka-nya na lii yiana la atana,

⁶“Nyungga MIRI-ka, kupaau-nggau dàngu kuwua-nggau waingera la pawànya na ma-deningu. Nyumu kulonda-kau dàngu ku-kabubulu-kau la panjadi pa-njanjingu la tau pinu tana, dàngu harii nduma banjaru mbuu ndàbana.

⁷La pa-pabulangu mata tau poki, dàngu pa-pahàla-ya na tau welingu la uma kapàtangu.

⁸Nyungga MIRI-ka, nuya na tamunggu; nda jia wua-anggunya na mangunju-nggu, ka nggamu-yakadu; na wuwanggu nda jia puli-anggunya la kahala hada.

⁹Nàhu na panyura-nggu wuwa-nanyaka; ka kupeka-ya nggàra biaya na ma-bidingu wànggu; ba ndedipa nu natumbu mbàda panii-nggunggai-nyaka,” wàna.

¹⁰Wunda-nyawa ludu wiliku bidi, i MIRI, wotu-nyawa Nyuna ha pinu tana nggubulu-mi! Kanduuwa, ha tehiku[61] dàngu na ihi-muka, da ta - tana mamarau dàngu da mangia-nya!

¹¹Màtawa na maràda wara dàngu da paraingu ka dawotu-nya i MIRI, màlawa na ma-mandapu la Kendàru ka dawotu-nya Nyuna! Màtawa na ma-mandapu-nya na paraingu Hela ka dapayaa-aungu, dàngu ka dawa - wara welingu la pinu palindi!

¹²Màtawa nyuda ka da pa-mangunju-ya i MIRI, ka da-bobaru-ya Nyuna la ta - tana mamarau.

¹³I MIRI na-ndàharungu pa-kangaburu hama tuna na mini mbeni hanggangu, hama tuna haàtu panjuri ma-kanjupu ringgitu pa-pabera. Nyuna nawara pa-kayaka la pa-kangaburu, ba na-paitangu ngia ditana hangganya na papana.

¹⁴Napanii i Ala, “Mandai-maka ba ku-pakambiu wikinggu; ndii wànggu bia dàngu ku-roputu wikinggu. Tàka nàhu toma-nanyaka na rehina ba wànya na pawàngu, ka ku-kaladaku hama tuna na kawini na matiki pa-paana wàngguka.

¹⁵Da palindi dàngu da tandula napa ku-pabulu-ha, da ngara matumbu-nyaka ku-pamalaï-ha. Da mondu luku napa ku-pambeli-ha maràda wara,[62] mbuu ndàba da tàma ku-pamihi-ha.

¹⁶Na banjaru-nggu na mapoki napa kulonda-ya palinya na ànda na pandedi pida; ku-kapipi-ha la ànda pandedi tandada. Na ma-kapàtangu napa kupaharii-nja nyuda, na ànda ma-karoba - karobaku napa ku-palinjaku-ya. Nunaya na pawunda-nggu lai nyuda, dàngu napa Nyungga ku-patutu hàlanya.

¹⁷Na tau na mawaiha da kahala hada marapu dàngu ba dapeka ba jiaha da alada, napa pa-paakangu dàngu pa-pamakia-ha,” wàna.

¹⁸Napanii i MIRI, “Patingingu ha dimi tau kawanga! Tàngaru-wa dimi ha mapoki!

¹⁹Nggamuya na marihi poki welingu la Ihirailu atanggu? Nggamuya na marihi kawanga welingu la tau pa-palewa-nggu?

²⁰Ha Ihirailu, dangu paita-mu ba tuna nyumu ndau eti wàanya, na kahilu-mu na-habonga tàka nyumu ndau patingingu-a,” wàna.

²¹I MIRI, na-orangu la pa-pamànangu; na-mbuhangu ka tembiya dàngu ka ma-humbaru-nya na ukuna.

²²Ba tuna nuna na banjaru pambàda ramba pa-mbutangu-yaka; pa-tahangu la kuru - kurungu la unu tanaha, nyuda payàpa-ha dàngu papàtu-ha la uma kapàtangu. Da-hambeta ba rambanja, dàngu nda ningua mamàka pa-pahàla-ha.

²³Nggamu la hongami ma-mbuhangu parongu-ya na rukuna yiana, dàngu maeti wànya piti welingu nàhu?

²⁴Nggamu ma-pakata-nya na Ihirailu ka ramba-nya? Ka nda i MIRI wikia? Lai Nyuna-maka na ngia panjala-nda, ba nda taluri tundunya na pareta-na, dàngu ba nda takiku-nya na pa-ajaru-nanda.

²⁵Hi na-pawiti-nya ka ta-handepa-ya na hànggana Nyuna na ma-mbàringu, tàka hi taita-ya na injana na rukuna na pabera na ma-wirungu. Na hànggana natunu-ya na Ihirailu hama tuna epi, ba tuna nda ta-kapata-aya dàngu nda ta-papekangu-a welingu la pambàda eranda.