Read Kambera YAHAYA 43 Bible Online

YAHAYA 43 - Kambera bible

YAHAYA 43

¹Ha Ihirailu tuna yia na puluna i MIRI, “Nyungga mawulu-kau la watu malala-kau la loja, àmbu mangàdatu, jiangu-ma duku ba ku-pamàna-nggau! Mbàda tiki-nggunyaka na tamumu ba kupaau-nggau, jiakau nyumuma mangunggu.

²Jàka era pala-munya la wai, napa Nyungga mapala karia-nggau, nda jia hadànjalu-amu la handuka - handuka-mu. Jàka era li ningumu la epi, nda jia kehi-amu, da lii pa-kamangu mambotu nda jia pa-hanggàmaru-adanggau.

³Nadu ba Nyunggama i MIRI, Alamu, Ala matua Ihirailu, ma-pamàna-nggau. Kuwua-ya na Mehiru ka palohu wàngu ba pahàla-kau, na Hundangu dàngu na Heimba jiaha da hilumu.

⁴Nyumu mu-pawilingu la matanggu, Nyungga ku-pawili-nggau dàngu kumbuha-nggau; jia hi ku-wuangu tau la pahilu-kau nyumu, da ba - banjaru la pahilu-ya na lurimu.

⁵Àmbu mangàdatu, nadu ba Nyungga maopa-nggau. Welingu la patama lodu dàngu welingu la pahunga lodu ku-paràha-nja da ana umbuku-mu pamai pa-pauhi.

⁶Ku-pareta-ya na luru dàngu na dia, ka dalu pahàla-ha. Màtawa da anamu mini ka dabeli welingu la mamarau, dàngu da anamu kawini ka dabeli welingu la hupu tana.

⁷Nadu nyuda mbuu ndàbada pambàda paaungu-haka wànya na tamunggu, ku-padika-nja nyuda ka pa-bokulu-ya na tamunggu,” wàna.

⁸I Ala napanii, “Paràha-nya pa-ndaharungu la hangga na banjaru-nggu da mapoki jiapa ka ningu matada; da ma-kawanga jiapa ka ningu kahilu-da.

⁹Paràha-nja mbuu ndàbada da banjaru ka da-pauhi dàngu mbuu ndàbada da kabihu ka da-kanguhuru. Nggamuya la honga marapu - marapu-da nyuda na mambàda pekaya jàka nggàraya na manjadi la rehi nàhu? Nggamuya la hongada nyuda na ma-ngalangu panyura-ya na rehi na manàmu-nya? Màtawa da hakahii-da ka da-ndàharungu la pa-wuangu mbuti ba da-padeningu nyuda, jia-maya ka wàda ndàba da marongu-ha nyuda!

¹⁰Ha banjaru-nggu, nyimika hakahii-nggu, kupindi-kai nyimi la panjadi atanggu, kai tandaka Nyungga dàngu kai waika, kai jàngapu-ya la kanandingu-mi ba Alaka Nyungga. Ala Mahupu-kamehangu-ka Nyungga, hinggilu-nggu Nyungga nda hili ningua la rehi na ma-làpahu dàngu na manàmu-nya.

¹¹Didi meha-ma-aka Nyungga, hinggilu-nggu Nyungga nda ningu ma-pamànangu.

¹²Nyunggama mambàda paniinggai, Nyunggama ma-pamàna-nggai Nyimi, nda ala weli nàmungu-a, nu da maninja la hongami nyimi; jiakai nyimi-maka hakahii - hakahii-nggu. Tàka Nyungga, jiaka Nyungga-maka yia na Ala,

¹³lundu nu - nu, pa-daingu Ala-maka duku Nyungga. Nda ningua ma-hinggilu welingu la kuaha-nggu Nyungga, jàka ndia la pa-pabeta-nya na pa-pakaka-nggu,” wàna.

¹⁴I MIRI Ma-pamàna-nggai, i Ma-matua la Ihirailu, napanii, “Lumumi nyimi, ku-pangàndingu tanatara la Mbambilu, tàka hi ku-poraku-ha da habàtalu pindu uma kapàtangu-da; na payaa-aungu-na na tau Kàhandimu ku-pambeli-ya padudurungu.

¹⁵Nyungga MIRI, Alamu na ma-matua, Hanganji-mu, ma-padika-nggau nyumu, ha Ihirailu!” wàna.

¹⁶I MIRI nalota hau ànda bokulu mali la tehiku, mali la wai mambana ngalingu-na.

¹⁷Na paràha-nja pa-pabera da tanatara dàngu da ma-kaborangu-na, tàka hi dalaku hanggangu wàngu kareta njara. Tàka na nyuna danjoru, nda da hili hadangu-a, hi dameti hama tuna humbu mambàda.

¹⁸I MIRI napanii, “Nda ningua linguna ba tanamu beliya na rehi na ma-làpahu, kahewa-na ba ta-kanandi-nya na pambàda tu kajia.

¹⁹Tàngaru, ka kuwunda hau ma-bidingu, wàngguka; nàhu pa-kiringu-nanyaka, màla ndau ita-aya? Napa kulota ànda la maràda telangu, dàngu ku-palingu ningu luku la maràda nggailaru.

²⁰Napa da pa-mangunju-ka paraï da banda matàmba; da ahu rumba dàngu da ota pawulu kàpangu napa dawotu-ngga Nyungga nadu ba ku-palingu wai la maràda telangu, dàngu ku-pahangga-nja da luku la maràda nggailaru la pawua-nya ka na-unungu na banjaru papindi-nggu.

²¹Jiaha nyuda-maka banjaru pa-kabua-nggu nduma wikinggu, ka da-bobaru-ya na wotungu ndumanggu Nyungga,” wàna.

²²Napanii i MIRI, “Tàka nyumu ha Ihirailu ndau marubuku-angga Nyungga, dàngu ndau lumu-anggapa Nyungga.

²³Ndau ngàndia mbimbi nduma kameti maraku patunu-mu, ndau tembi-aka wàngu hunggu maraku-mu. Tàka làti nda ku-pambotu-akau wàngu kameti maraku, jàka ndia nda ku pa-handuka-akau la pa-karuhi-kau kaminyangu.

²⁴Nyumu ndau kei-angga dupa hiritu ndumanggu, ndau pahoda wàngga aparu kameti maraku pa-hambàli-mu. Tàka na nyuna hi nyumu biai ma-pambotu-ka Nyungga wàngu nja - njalamu, ma-pahanduka-ka Nyungga wàngu da ndàngamu.

²⁵Ba tuna Nyungga Ala ma-podahu-ha da njalamu, Nyungga kujàma-nggamu nadu ba tuna numaka na huringgu; da njalamu àmangu nda kuhili namu-ahapa.

²⁶Panamu-ngga Nyungga, màla ka talua la ma-patandangu ngera, pekaya na palakara-mu ka na-lohangu bau pa-deningu.

²⁷Da bokumu la mangilu[63] da ma-wungangu, danjala-ka, da ngara liku-urumu da patula ngganggangu lai Nyungga,

²⁸Da ratumi mbàda pa-iraku-danya na Umanggu.[64] Jia-duya hi kuwua-ya na Ihirailu ka pawawa-ya, da wàlana i Yakupu kumàta-nja ka pamànji-ha,” wàna.