Read Kambera YAHAYA 45 Bible Online

YAHAYA 45 - Kambera bible

YAHAYA 45

¹I Korihu napindi-ya paraïna i MIRI pa-katangu hanganji; papindi-ya nyuna la pa-panyàku-ha da ba - banjaru dàngu la pa-pukalu-ha da hanganji - hanganji. I MIRI napa na-bunggahu-nya pindu paraingu, nda haua ma-padaingu pa-kabitangu. I MIRI napanii-nya nyuna,

²“Napa Nyungga ku-payema-nggau ànda; da palindi dàngu da tandula ku-pedahu-ha, da pindu - pindu kaliangu napa kubera-ha, da habàtalu bàhi kupata-ha.

³Ka wua-dunggu-nggauka nyumu napa banda pawulu wàngu da ma-kawiningu, kau pingga Nyungga MIRI-ka Ala Ihirailu, na mambàda paau wànggau tamumu.

⁴Nyumu kupaau-nggau dàngu kutunggau ngara, jiapa-kai ka ndau tandaka Nyungga. Ku-patanggu-nggau nyumu la pandula-ya na Ihirailu atanggu, nadu nyuda ba banjaru papindi-nggunja.

⁵Nyungga MIRI, nda hilu ningua hawiangu, Nyungga Ala Mahupu-kamehangu. Nyumu ku-pambinu-nggau madàka-mu, jiapa-kai ka ndau tandaka Nyungga.

⁶Nu mbuu ndàbada hi kuwunda-ha ka pekuna welingu la pahunga lodu dàngu la patama lodu mbuu ndàbana na tau ka napingga ba MIRI-ka, nda ningu ala hinggilu-nggu Nyungga.

⁷Nyungga ma-padika-nya na harii dàngu na kapàtangu, Nyungga ma-patàka-nya na kanyuru dàngu na ràtungu. Nyungga MIRI-ka ma-paloku-ha nuda mbuu ndàbada.

⁸Ku-papuru-nya na talu welingu la awangu hama tuna urangu, na tana na-pajàmangu wikina panggepi-ya nyuna, hi na-patumbu-ya na mànangu dàngu na pa-hàlangu; Nyungga MIRI-ka mawunda-ha nuda hi danjadi,” wàna.

⁹Ura pàku-anaka na tau ma-patayaku dànya na Mawulu-ya; nyuna hama tuna na wurungu na ma-ndubaku-ya na mapipi-ya. Na paàrangu nu na tana wurungu la mapipi wurungu, “Nggàra ulamu?” ka wàna. Na hali ura ihu na wurungu ba nda napingu na mapipi-ya?

¹⁰Ura pàku-anaka na tau mapanii-nja da inana da amana, “Nggikina hi tuna nu ba paana-ngga?” na mawàna.

¹¹I MIRI, Ala ma-matua la Ihirailu napanii, “Paàra-ngga Nyungga na ngera na manàmu-nya. Na nyuna àmbu paàra-nya na ngerada da ananggu, jàka ndia la pa-paràha-ngga la pawunda jàka nggàraya.

¹²Nyungga MIRI-ka ma-padika-nya na pinu tana, dàngu ma-padika-nya na tau ka ningu mangia-nya na pinu tana. Wàngu kuaha-nggu ku-wàlahu-ya na awangu, dàngu ku-pareta-ha da matalodu, wulangu dàngu kandunu.

¹³Nyungga makoda-nya i Korihu la pa-paloku-ya na pawuku-nggu dàngu ka pamàndu-nya pa-bànduku na ma-deningu. Napa Nyungga ku-palinjaku-ha mbuu ndàba da ànda ngia palina. Napa nyuna natura beliya na paraingu-nggu na Yeruhali dàngu na-pahàla-ya na banjaru-nggu na pa-tanawangu, dàngu nda pawua pa-runungu dàngu nda pa-mbayaru-a,” wàna. I MIRI Mahupu-mbiha mbàda panii-naka.

¹⁴I MIRI napanii-nya na Ihirailu, “Mangu-njawa da ihi tana Mehiru dàngu da utuna na Hundangu. Da tau Heimba da manggalaku mangu-munjaka; da-pandutungu la kajia-mu dàngu ningu nggili bàhida. Nyuda da-maràbaku hi dapeka, ‘Ni langatàka-nya i Ala la hongami; nda hili ningua hili hau ala hinggilu-na Nyuna!

¹⁵I Ala na ma-pamàna-nya na Ihirailu Nyuna Ala ma-kawiningu wiki-nanya.

¹⁶Mbuu ndàba na tau na ma-pandoi kahala hada marapu; napa pa-makia-ya dàngu pa-paaka-nya.

¹⁷Tàka na Ihirailu napa na-pamàna-nya paraïna i MIRI; na mànangu-na napa na-padaingu. Napa nyimi nda pa-pamakia dàngu nda pa-paaka-anggai lundu nu - nu,’ ” wàna.

¹⁸I MIRI ma-padika-nya na awangu, Nyunama na Ala! Nyuna ma-padika-nya dàngu ma-unggulu-ya na pinu tana, nawulu paundu-nya dàngu hi na-ndolaku pa-daingu. Nda na-padika-anya ka pangia malinggitu kahàna-ya, tàka hau pa-ngiangu paràka pa-ngiangu-ya. Nyunama na mapanii, “Nyunggama MIRI-ka, nda hili ningua hawiangu.

¹⁹Nyungga nda kupanii-a la ma-kawiningu, jàka ndia wàngu kangunduhu-kai. Nda ku-paràha-anya na banjaru-nggu Ihirailu ka nahimbu-ka tàka hi kahewa-ma-ana. Nyungga, MIRI-ka, mapanii-ya na ma-deningu, dàngu mapeka-ya jàka nggàraya na ma-langatàka,” wàna.

²⁰Napanii i MIRI, “Mi-pauhi-wa dàngu mai pa-kariangu-wa, nyimi mbuu ndàbami mamara la honga ba - banjaru! Manduba-ha da tau da mapaï ngàndi kahala hada ai, dàngu hi da-hamayangu la marapu - marapu da manda màka pa-pamànangu.

²¹Paniiya na palakara-mu, patàka-nja da mbuti, màtawa ka da-pa-hamangu. Nggamu ma-bobaru-ya na rukuna nuna, dàngu na mapanii-ya weli àmangu? Ka nda Nyungga-a, MIRI? Nda ningua ala hinggilu-nggu Nyungga. Nyunggama Ala ma-padeningu dàngu Ma-pamànangu, nda ningua hawiangu hinggilu-nggu Nyungga!

²²Ha ma-mandapu-nya na pinu tana nggubulu-mi, pa-mbelingu-wa lai Nyungga ka pamàna-nggai, ba Nyungga-a Ala nda ningua hawiangu!

²³Nyungga ku-paràndingu, dàngu na ràndinggu nda ku-panjilu-anya; lumu wikinggu Nyungga ku-harangu: Nimbihu-na na tau napa na-patika la hangganggu, dàngu wàngu hilu wikida ba da-paràndingu la pa-tuturu lai Nyungga.

²⁴Da tau napa dapanii, ‘Na pa-deningu dàngu na àtalu mbulungu welingu lai MIRI-a!’ Na tau mbuu ndàbana na ma-paumbi-ngga napa damai lai Nyungga hi da-makia.

²⁵Ba tuna na wàlana i Yakupu napa pa-pamànangu-ha, dàngu napa dawotu-ngga Nyungga, na MIRI.