Read Kambera YAHAYA 46 Bible Online

YAHAYA 46 - Kambera bible

YAHAYA 46

¹Yiana-yaka na hupu njàpuda da marapu Mbambilu; àmangu da kahala hadada i Mbelu dàngu i Nembu pa-lumungu-ha, tàka nàhu pawotu-haka la banda, ba jia-haka da ngàndida da banda njili.

²Nuda da kahala hada nda da-duluku-a pandula-ha da ma-malinggi-ha, nyuda wiki padendi-ha hama tuna pa-tanawangu. Nuna-yaka na hupu njàpuda.

³Patingi-nggawa Nyungga, ha dimi wàlana i Yakupu, nyimi mbuu ndàbami marihi welingu la banjaru-nggu. Mbàda kabubulu-nggunggaika piti welingu bai dedi.

⁴Pa-daingu Ala-mamingga lundu kaweda-mi; dàngu pa-daingu mangga-nggunggai lundu uwangu-mi. Nyungga mawulu-kai dàngu pa-daingu kabubulu-nggunggai, napa kundula-kai dàngu ku-pamàna-nggai.

⁵Dàngu nggamu-yaka na pa-pahama wàmingga? Ningu nu ràka ma-pahama dàngga Nyungga?

⁶Na tau na-bunggahu halopa-na hi naburi-ha da àmahu rarana, dàngu natimba-nja da àmahu bara la ndahingu. Nahewa tukangu ma-pandoi kahala hada marapu, hàla hi na-marubuku-nya na kahala hada pa-pandoi-na.

⁷Na kahala hada nuna napaku-ya dàngu na-banjalu-ya la pangia-na, lai nu hanina ba na-ndolaku dàngu nda namàka-a pa-lelingu. Jàka ningu tau ma-hamaya-nya, nda nahema-a, dàngu nda na-pahàla-aya welingu la handuka-na.

⁸Namuya dàngu pangàda-nya, ha dimi tau ma-katadaku!

⁹Patanda hàlanja da matumbu la rehi na ma-làpahu; pekawa ba Alaka Nyungga, dàngu nda hili ningu hawiangu, Alaka Nyungga, dàngu nda ningua mahama-ngga.

¹⁰Weli mulangu mbàda peka-ngguhaka da ma-malamiri, piti weli àmangu kunyura-mayaka jàka nggàraya napa na manjadi. Na pabota-nggu napa nanjadi, na pawuku-nggu jiangu-ma ku-pahàra-nya! wànggu maka.

¹¹Kupaau-nya na haàtu na maningu kuahangu welingu la pahunga lodu[66] na maina hama ma-hawurungu bohuya la pa-pahàra-nya na pabota-nggu. Jàka nggàraya na papanii-nggu jiangu-ma ku-pahàra-nya, jàka nggàraya na pa-pakaka-nggu yiangu-ma ku-palundu-nya.

¹²Patingi-ngga Nyungga ha dimi tau mangamba, nyimi mareki-ya ba namarau-mapa na patalu wàngu.

¹³Napa ku-pamareni-ya na lodu pamara wàngu, na mànangu na pawua-nggu nda pahili nàdi-ayapa. Napa ku-pamàna-nya na Yeruhali, dàngu kuwua-nya patembi-wànya na Ihirailu,” wàna.