Read Kambera YAHAYA 47 Bible Online

YAHAYA 47 - Kambera bible

YAHAYA 47

¹Napanii i MIRI, “Ha Mbambilu puruwa welingu la kanjàka hanganji-mu, dàngu mandapu-wa la kumburu tana. Ndau hamela dàngu ndau manandangu-apa nyumu hama tuna àmangu.

²Nggihuwa kanguta wàngu watu; pahàla-nya kàdi na tamalingu-mu, jijiku-nya na laümu lundu dawuwa da ana tau wihimu, dàngu pala-hawa da luku.[67]

³Napa naita-kau tau bau kalulu, da-paaka-nggau dàngu da-pamakia-kau. Napa Nyungga kutungu kiringu lai nyumu, dàngu nda haàtu-mbu papuli-nggu pamara,” wàna.

⁴I Ala matua Ihirailu na-pamara-ta nyuta, na tamuna MIRI Mahupu-mbihaya.

⁵I MIRI napanii-nya na Mbambilu, “Pàdi wàmuwa, kau tama la kapàta wuru yila. ‘Hanganji kawini-da da pa-hanganji-ya’ nda hili wàda-anggaupa.

⁶Àmangu kuhàngga-nya na banjaru-nggu, nda kureki-ahapa nyuda ba mangu-nggunja. Hàla ku-pakata-nja lai nyumu, ba tuna nyumu ndau milanja eti, jiapa da makawe-weda muwànja ma-mbàringu.

⁷Bau kakaya làbu hanganji kawini lundu nu - nuka napa wàmu bia, tàka nda na-miripu-a la etimu jàka ndia, ndau kanandi-anya na injana la hupu njàpuna.

⁸Jia ba tuna ronguka Nyungga, ha dumu makeha-nya na luri mànjaku! Bau kakaya na-mambiru na lurimu, dàngu nda ningu mahama-nggau. Bau pangàda-nya nda jia njadi-amu kawini meti lei, dàngu da wàla wuamu nda jia molungu-ada.

⁹Tàka napa ndedi mbàdiku-na, la dalu hau lodu, handàka tarànjaku-mada nuda da madua ngiada. Jiapa kau wàngu hiwaru dàngu lii mambiha, na leimu dàngu anamu pa-hànditu-maaha.

¹⁰Mu-pàdangu wikimu bau mambiru la akatu-mu, bau kakaya nda pa-hamata-aha da pawunda-mu. Na-pahambala-kau manggàna-mu dàngu na pingumu, bau rekiya nda ningua mahama-nggau nyumu.

¹¹Tàka napa nyumu na-handauni-kau ura pàda, na hiwaru-mu nda na-duluku pa-pahinggilu-kau. Napa nyumu natàka-nggau manjurungu, dàngu ndau duluku-a pa-tebuku-ya. Napa natàka harabàndangu na molungu, dàngu ndau mbuti-anya ba ndedipa.

¹²Pajàrungu bia dàngu mbuu ndàbada da hilu mbihamu dàngu da hiwaru-mu, da ma-pakaramba-kau welingu ba anakeda kudukau. Raï-ai duna hi ningu bia nu linguda lai nyumu, ka pa-mangàdatu wànja da muhumu.

¹³Nawàngu pahoda bianggauka paraï padangu da lii kamahingu. Paràha bianja da ngara ma-manyura ka da-pamara-kau nyumu; nu nyuda da ma-manginjiru-ya mbuu ndàba na kabihu awangu dàngu da ma-patanda-nja da kandunu, la nimbihu wula jiliku danyura-ya jàka nggikina na uramu.[68]

¹⁴Tàngaru, nyuda hama rembi pahàla epiha; nda da-ngalangu pa-pamara wikida! Na epi nuna lalu mbana nda najaru-na lai nyuda, nda mbana epi ngia padiru-aya.

¹⁵Nunaya na linguda da ngara ma-manyura lai nyumu da ma-pakaramba-kau nyumu piti welingu ba anakeda-kau; nimbihu-da dalaku wàrunggau nyumu; nda ningu mamai la pandula-kau,” wàna.