Read Kambera YAHAYA 48 Bible Online

YAHAYA 48 - Kambera bible

YAHAYA 48

¹Ronguwa, ha wàlana i Yakupu, wàlana i Yahunda ma-tamungu Ihirailu, i Ala Ihirailu-a pa-maraku-nggu, wàmu, dàngu ma-harangu wànya na tamuna i MIRI. Tàka na patiki-mu nu nda weli eti-amu.

²Jiapa ka tuna nu mu-hamemu wànya bau peka nyumu ba ma-mandapungu paraingu matua-kau; dàngu nyumu bau handera lai Ala Ihirailu-a nu i MIRI Mahupu-mbiha ba wàdanya.

³Napanii i MIRI, “Ronguwa ha Ihirailu! Nggàraya na manjadi àmangu, mandai-maka ba kupeka-nggainya; nggàraya na papanii-nggu, hi jia pahàra bia-nggunya dàngu hi ku-paloha-nya.

⁴Kupi-manggau bau tongguru etimu, tongguru katiku-mu, dàngu bau katiku watu.

⁵Weli àmangu mbàda nyura-nggunyaka; ba ndedi nanjadi mbàda peka-nggunyaka, ka àmbu peku ningu paniimu, ba pawunda-da da kahala hada marapu-muha nuda.

⁶Mbuu ndàbada da panyura-nggu da parongu-mu dadedi hàlaka; lupangu upeka-yaka bàdi ba ma-deningu-ya na papanii-nggu. Nàhu wàlahu-nggunyaka na ngera na mabidi, na pa-kàpingu pandedi pimu.

⁷Hina nàhu hi ku-padika-nya, nda weli àmangu-a; ndedi uhandàkangu parongu-ya na ngerana nuna, ka àmbu ningu papanii wàmu, ba mbàda pi hàla-mamu-nyaka mbuu ndàbana.

⁸Kupi-manggau nyumu ba nda ràka pawaikau, weli àmangu patanda-makauka nyumu ba tau katadaku-kau. Jia-duyaka nu nyumu hi ndau pinya, nda ningumbu hau panii matàka la kahilu-mu.

⁹Nyungga kupàtu-ya na hàngganggu ka peku bobaru-ya na tamunggu. Kupàtu-ya nuna welingu lai nyumu, ka àmbu pamolu-nggau.

¹⁰Daa la epi mayila nyumu kukama-nggau, hama tuna àmahu bara pa-paihi mbàngingu la epi.

¹¹Hi kulaku-nya yiana lumu wikinggu duku, nda ku-pahia-anya ka pa-iraku-ya na tamunggu; na mangarangu-nggu nda jia paberi-anggunya, ka lai nggamuya kàdu,” wàna.

¹²I MIRI napanii, “Rongu dumu Ihirailu, banjaru papaau-nggu, Nyungga, pa-daingu Ala-mungga. Nyunggama la ngaba, dàngu Nyunggamai la liu.

¹³Na limanggu na matunya latana na pinu tana dàngu na ma-wàlahu-ya na hanggubu awangu. Jàka era paau-nggunja tamuda, manyamalu mai-madanya.

¹⁴Pauhi ndàbawa dimi dàngu patingingu-wa! La hongada da marapu nda ningua manyura-ya ba na-kaluluku-nya napa na Mbambilu paraï tau papindi-nggu; napa nawunda-ya na pawuku-nggu.

¹⁵Nyungga-maka mapanii-ya dàngu mapaau-nya, kulonda-ya, hi lupa na-ondungu.

¹⁶Maiwa kai lihingga dàngu kai rongu, piti weli àmangu ba kupanii pa-lohangu; dàngu mbuu ndàbada da paniinggu naingu-mana ba jia langatàka-ha,” wàna. Nàhu nyungga palewa-nangga i MIRI dàngu nawua-ngganya na kuaha wikina.

¹⁷Napanii i Ala matua Ihirailu, na Ma-pamàna-nggamu, “Nyungga-maka i MIRI Alamu, ma-papeka-nggau jàka nggàraya na ma-palingu lai nyumu, dàngu ma-kapipi-kau la ànda ngia palimu.

¹⁸Jàka era eti wàmunja da hupu liinggu, napa na peku hàmumu hama tuna luku manda màduya, dàngu na-pakanyurungu hama tuna ngalingu la tehiku-ya na manda ana kahàna.

¹⁹Na wàla wuamu hama tuna karohu waraya danguna; patanggu-nggu Nyungga-maya ba nda pa-pamolu-nja napa,” wàna.

²⁰Lakuwa dàngu palaiwa welingu la Mbambilu, pakada-nya na lii yiana la nggi - nggini. Bobaru-maya pa-kariangu kayaka mbaha etimi, “I MIRI na-pamàna-nyaka na Ihirailu, atana!

²¹Ba na-kapipi-ha pali ningu la maràda mbila, nda da-erangu-a la pa-kandànga wàngu. I MIRI nabera palindi watu hi na-lulungu na wai, welingu la watu na-pa-tapanjirungu wai ndumada nyuda.

²²Nda ningua mànangu nduma tau akatu,” nuya na paniina i MIRI.