Read Kambera YAHAYA 49 Bible Online

YAHAYA 49 - Kambera bible

YAHAYA 49

¹Patingi-ngga nyungga, ha dimi tana mamarau katàmbalu-nja da papanii-nggu. Napaau-ngga nyungga i MIRI ba ndedi habola-ngga, napindi-ka piti welingu ba la kambuka.

²Da kareuku-nggu napandoi-ha hama dàka hapanda, na limana jiaya na paopa wànangga.[69] Nawulu-ka nyungga hama tuna ana pana padeli, da pa-pahàmu-na la katundulu ka rimangu la pawànja.

³Napanii-ngga, “Nyumu ata-nggunggau; rukumu nyumu, na tau napa na-pa-mangunju-ka,” wàna.

⁴Tàka kupanii nyungga, “Kahewa-maana na njilinggu; parahumangu ba kuwua hàlaya na pariinggu!” wànggu. Ba tuna na-màndungu la etinggu i MIRI napa na-kahiri-ya na hàkunggu, na-palimba-ngga tudana na pawunda-nggu.

⁵Ba ndedi kudedi napaau-ngga i MIRI ka naata-ngga, la pa-pauhi-nya na banjaru Ihirailu, ka dabeli lai Nyuna. I MIRI na-panjadi-ka tau patembi, i Ala jiaya na àtalu-nggu.

⁶I MIRI napanii-ngga nyungga, “Na ngeramu na marihi bokulu patia-nanggaupa ha atanggu; ndedi jiaka-a bau pabeli-nya na wàla wuana i Yakupu na ma-kanjepi dàngu bau pa-lànyapu belinya na pa-bokulu wàda da kabihu Ihirailu, tàka ku-panjadi-mbukau hariina na ba - banjaru, ka peku pamàna-nya nggubulu-na na pinu tana,” wàna.

⁷I Ala matua Ma-pamàna-nya na Ihirailu napanii-nya na tau na pa-pawawa halawàla, dàngu na pa-paumbi-da da ba - banjaru da pa-paata-da da maningu kuahangu-mbu, “Napa daita-ya na pawunda-nggu paraï da hanganji; napa nyuda da-hadangu patembi-ka Nyungga. Napa da maningu kuahangu daita-mbuya, hi da-patika pa-marubuku,” wàna. Nu hi tuna nu nadu i MIRI ba mbàda pindi-nanyaka na atana; i Ala matua Ihirailu na-patutungu la pa-njanjingu-na.

⁸I MIRI napanii-nya na banjaru-na, “La rehi orangu-na na etinggu napa Nyungga kuhema; la lodu ba ku-pamànangu, kundula-kai nyimi. Nyimi kuopa-nggai dàngu ku-mangganggai, dàngu ku-panjadi-kai pa-njanjingu dàngu da ba - banjaru. Ku-pahàmu beliya na tana na ma-malinggitu kahàna hi nanjadi-ya tana kangeha na ngia pa-ngiangu.

⁹Na tau papuhi la uma kapàtangu ku-paràha-nya paluhu; na maninya la ma-kapàtangu kungàndi-ya la maharii. Jiapa la tandula kamulungu nda ningu manjaka-nja, nàhu la ànda ningu-padua pangangu.

¹⁰Napa nyuda nda damadau jàka ndia nda damanjuu, dàngu nda jia tuni-anaha hambàti mbàna lodu la maràda wara. Nadu Nyungga, manamu-ha nyuda napa ku-kapipi-ha, dàngu kuiru ngàndiha la pangia da ma-pamata waingu.

¹¹Napa kuràma-ya na tana paàki na mali ningu la ma-palindingu, mbuu ndàbada da ànda bokulu-nggu napa ku-palinjaku-ha.

¹²Welingu la mamarau na-panundangu pamai na banjaru-nggu, weli diangu, welingu la patama lodu dàngu welingu la Hinimu[70] weli lurungu,” wàna.

¹³Luduwa ha awangu, kayaka-wa ha pinu tana, ha dimi palindi, kayaka hawola-wa! Nadu ba nàmunya i MIRI paomba-ya na banjaru-na, manamu-ya na banjaru-na na pa-kapidihu.

¹⁴Ba tuna da ma-mandapu-nya la Yeruhali dapanii, “I MIRI na-dunjaku-ndaka nyuta, na MIRI-nda mbàda maromba-nandaka nyuta,” wàda.

¹⁵Nahema i MIRI, “Peku-nakaka na haàtu ina la pa-maromba-nya na ana pa-paana-na, tàka hi nda nanamu-ya na ana wikina? Jiapa-kai ka na-maromba-nya, Nyungga duku nda jia maromba-anggunggau nyumu!

¹⁶Ha Yeruhali, kunamu mànu-makau Nyumu; na tamumu ku-huratu-yaka la tàbalu limanggu.

¹⁷Da tau da ma-pahada-nggau nyumu lu nàmu-njaka, dàngu da ma-pakabu-kau nyumu napa dalaku-ha.

¹⁸Tàngaru-wa dàngu panau-yawa la winggirumu, pauhi-nanyaka na rayatu-mu hi namai lai nyumu. Lumunggu Nyungga, Ala maluri, kupanii, langatàka, napa mu-hamemu rukuna na ma-mandapu-nggau, hama tuna na bidi papa kawini ba na-hamemu wànja da ngaüna.

¹⁹Na tanamu na mambila dàngu na ma-malinggitu kahàna, nàhu lalu nggipu-naka la tau na ma-rinjungu pa-mandapu-nya. Dàngu da tau da ma-pakakangu pa-pamolu-nggau, mbàda laku marau-daka welingu lai nyumu.

²⁰Da anakeda da madedi la ngia pa-tanawangu napa dapanii-nggau nyumu, ‘Lalu nggipuya na tana yiana lai nyungga, wuangga pangia ka ku-ngiangu lai yiahu,’ wàda.

²¹Ka panii-munyaka napa daa la etimu, ‘Nggamuka ihu ma-paana-ngganja yiada da anakeda? Ka nda mbàda mbulangu-ada làti da ananggu, dàngu ba nda kuhili paana-apa? Pa-dundilu ka la ngia pa-tanawangu hi pa-hinggilu pameha-ngga. Ba tuna nggi weli-daika ni da anakeda, dàngu nggamu na ma-pamatua-ha?’ ” wàmu.

²²I MIRI Mahupu-jangga napanii la banjaru-na, “Napa Nyungga kuwua-nja tanda da ba - banjaru dàngu napa nyuda da pabeli-nja da anamu; napa da anamu mini palunggu-ha, tàka da anamu kawini pawotu la kunduha.

²³Da hanganji - hanganji beri ama-munja, dàngu da maràmba kawini beri ina-munja. Nyuda da-patika ba da-tembikau dàngu da-pawawangu wikida la hanggamu. Ka pi-dumu-nyaka ba MIRI-ka Nyungga; na tau na ma-monungu lai Nyungga nda kahewa-ana,” wàna.

²⁴Tàka nyimi mi-paàrangu, “Peku-nakaka da pa-ribangu ba wàhiha la mambeni hanggangu, jàka ndia ba hànditu-ha da ma-tanawangu welingu la wunggu lima tau mbana eti?” wàna.

²⁵Nahema i MIRI, “Nuna-duyaka napa na manjadi. Da tanawangu la limada da mambeni hanggangu napa pa-hànditu beliha. Da pariba-da da tau mbana eti napa pawàhi beliha. Ba Nyungga wikima ma-ndubaku-ha da muhumu; napa ku-pamara-ha da anamu.

²⁶Napa ku-pamaüku-ha la wai ria da muhumu, hi lundu da-kawàra pameti dàngga anguda. Ka pi-nanyaka napa tau pinu tana, Nyungga ba MIRI-ka Ma-pamàna-nggau; Mahupu-àtalu, Alana i Yakupu, Ma-palohu pahàla-kau,” wàna.