Read Kambera YAHAYA 5 Bible Online

YAHAYA 5 - Kambera bible

YAHAYA 5

¹Rongu-yawa na ludunggu rukuna na woka angguru-na na ariyaa-nggu. Na ariyaa-nggu ningu woka angguru-na la karaha palindi ma-kamboka.

²Na-kangaburu-ya na tanana hi nawàru-nja da watu - watuna. Na-pamula-ha da angguru papindi hi na-pahadangu lewatu ngia padai. Naàki-ya na hau na lambongu na ngia papohu-nanja da angguru-na, hàla na-patia-nja rarada da wuana, tàka da-pahunggu-na wua angguru ma-mayilu jua-ma-aha.

³Tàka nàhu panii-nanyaka na ariyaa-nggu, “Nyimi mbuu ndàbami mangia-nya la Yeruhali dàngu Yahunda, patanda-nggama ngerama nyuma, na woka angguru-nggu dàngu Nyungga.

⁴Màla ningu nu panda raïnggu, la woka angguru-nggu? Tàka nggikina ihu hi da-mayilu hàlaika da wuana, hi nda mahàmu-hai hama tuna na pamonu-nggu làti?

⁵Na, tuna nuka napa na pawunda-nggunya na woka angguru-nggu: da oka da ma-winggiru-nya napa ku-butuhu-ha, da kangeli da ma-nggàpulu-ya napa ku-nyungguru-ha, hàla hi kupuli-nja da banda bohu ka danganya dàngu ka da kali - lijaku-nya.

⁶Napa kupuli-nya hi natumbu-nya ma-àtalu tumbu. Da pingi angguru-na nda kuroka-anjapa, dàngu nda kubuta-anya rumbana. Tàka napa ku-pahia-nya ka na-pandàda-nya rii madàka dàngu rumba, malai na karumangu nda ku-pahia-anyapa la pa-kawàtiku-nya urangu nyuna,” wàna.

⁷Nadu na banjaru Ihirailu làti woka angguru-na i MIRI Mahupu-mbihaya, tàka na tau Yahunda pingi angguru pa-pamula-naha. Welingu lai nyuda na-nedingu mamola, tàka hi mbana eti biayai. Na nedingu ka da-pamàndu-nya na pa-deningu, tàka hi kaladaku makarai mola biayai na maninya.

⁸Ura pàku-ami-nyaka nyimi makeiha da uma dàngu maramba-nja da woka bai bonja wànja da mangumi! Nda nahili mandai-apa njàpu-danyaka da pangia-na na tau hawiangu tàka hi mbulungu nyimi-makia-ka ma-ndàdiku la tana nuna.

⁹Kurongu-ya i MIRI Mahupu-mbiha ba na-harangu, “Da uma - uma da ma-bokulu dàngu ma-manandangu yiada mbuu ndàbada napa da malinggitu ba nda ningu mangia-nja.

¹⁰Da ihi tana napa da-pandàngangu, na woka angguru ba hakambulu hekutari-na ana hakambulu litaru-ma-ana wai angguru na ihina. Na uhu ba hangahu litaru-na na wini, ana hakambulu litaru-ana na ihina,” wàna.

¹¹Ura-pàku-ami-nyaka! Piti weli mbarungu lundu na-malingu ba wolu araku-maaka paunu-mi hi lupa imaüku dira matiki.

¹²La remi - remimi ningu lingu jungga, lamba karia jungga, lamba ha-kapapa dàngu taleli tàka hii unungu angguru. Tàka ndai kawela-anya na paràma-na i MIRI dàngu na pawunda-na.

¹³Jia ba tuna na banjaru-nggu na manda nggàra papina hi dundilu-ya palaku ba tanawangu-ha. Da liku uru dàngu na rayatu da meti ruku rimbangu dàngu kandànga.

¹⁴Na ngaruna na meti na-hanganga tabonga la pahoba-ha da liku uru la Yeruhali dàngu na rayatu na mambabu ba daremi.

¹⁵Nimbihu-na na tau napa pamakia-ya, tàka na ma-ngànjangu napa pa-pawawa-ya.

¹⁶Ba tuna i MIRI Mahupu-mbiha pa-itangu-nanyaka duna bunjuku-na ba nalaku-nya na ma-padeningu. Nyuna napa na-pajiliku-nya na matua-na ba nawàngu pa-patanda-nya ngerana na banjaru-na.

¹⁷La kanànda-na na paraingu da ana kamàmbi dàngu mbimbi napa niti-danyaka rumba dàngu nda nanjaka-nja pangangu.[6]

¹⁸Ura pàku-a-minyaka nyimi mapanu-takungu panjala!

¹⁹Na paniimi, “Màta bianya i MIRI Ala matua Ihirailu ka naluma parenggangu pa-kukutungu! Màtawa ka nalu pahàra-nya na pakaka-na ka taita-ya dàngu ka tapinya,” wàmi.

²⁰Ura pàku-a-minyaka nyimi bai panjingu njànganya na mahàmu dàngu na ma-akatu, na ma-kapàtangu dàngu na maharii, na ma-paita dàngu na malàngga!

²¹Ura pàku-a-minyaka nadu bai kaka wikimi bai manggàna dàngu ba lalu pingumi!

²²Ura pàku-a-minyaka nyimi mapeka hau mini la pa-unungu angguru! Nyimi ma-kaborangu manda mangàdatu jiapa ka pakorunja da paunu maüku!

²³Tàka màta ka ma-ngalangu wàngu àmahu li kajia ba wàmi, nyimi mi-pahàla-ma-aya na tau njala, tàka hi mihiri-nya na manda njala ka pa-mànanya.

²⁴Nyimi mi-tulaku-yaka na papekangu-na i MIRI Mahupu-mbiha, dàngu bai pakàba-ya na hupu liina i Ala matua Ihirailu. Jiaduya nu, hama tuna na rembi dàngu na rumba meti ba nakehi làpu la epi, tuna numbu napa da amumi ba da-muhungu, da wàlami ba damàdu, hàla molungu-danyaka ba na-jiliru-ha ngilu.

²⁵I MIRI nambeni-nya na banjaru-na. Nyuda mbàda rimangu-manaka la pahuku-nja nyuda. Da palindi napa da-yoyangu; da meti tau da-tapàlangu hama tuna ma-parumba la ànda. Ba tuna i MIRI mbeni-mananya-pa dàngu napa daingu pa-hukungu-manaka.

²⁶I MIRI napa napaau-nya na banjaru marau[7] tàka hi damai pa-renggangu!

²⁷Nyuda rimangu mànu-madanya la pa-pabera dàngu nda dapingu-a panjili. Ndedima duda da-katuda jàka ndia la pa-tàtiku.

²⁸Da ana panana dadàka dàngu na pàndina patiangu-nanya patungu-kiaka. Da wuu njarana hama kalatungu watu epi, dàngu da ndutungu kareta-da dawingu hama mbangatu ngilu làpuru.

²⁹Da ngara panjuri-na da-kangaüku hama tuna hinga mabidi hàla pa-njàkapu pahoba-na, hi napalai ngàndiya ka àmbu ningu ma-pahàla-ya.

³⁰Na lodu nuna na kaladaku pa-kangaburu napa narongu la nggubulu Ihirailu ba hama kanduu libu muruya. Tàngaru, la nggubulu paraingu nakapà-tanguka dàngu ma-handuka jua-yaka. Na harii na-pambeli-ya kapàta wuru yila-yaka.