Read Kambera YAHAYA 50 Bible Online

YAHAYA 50 - Kambera bible

YAHAYA 50

¹I MIRI napanii-nya na Ihirailu, “Ha dimi banjaru-nggu bau kakaya kuwàngga-kau nyumu hama tuna na haàtu mini lei mawàngga papaha-na? Jàka tuna nu, ka nggiya na huratu pahewa? Bau kakaya kudangga-nggau nyumu, hama tuna na haàtu ama madangga-nya na anana la tau ma-pahurungu wutangu? Nda tuna nua! Pa-tanawangu-kau nyumu hi wàrunggau, ruku njala dàngu akatu wiki-mamu dumu!

²Ka nggikina hi nda haàtu-mbu mahema welingu la banjaru-nggu, ba jiaya na mainggu papaau-nja? Nu hi dakandii, jia-yaka ihu ba dakaka-ya ba nda ku-duluku Nyungga pa-pahàla-ha nyuda? Langatàka-ma, la hupu liinggu Nyungga namàdu na tehiku, da luku ku-panjadi-ha maràda wara, hi lupa dameti da iyangu dàngu hi dawau pahàka.

³Na awangu ku-palua-ya la kapàta mitingu, ku-pandàda-nya hama tuna wàngu tera mitingu tanda handuka,” wàna.

⁴I MIRI Mahupu-jangga na papeka-ngga papanii, màta la paniinggu ka peku pa-àtalu-nggunya na tau manjili. Nimbihu mbaru na-pamiripu-ya na patikingu-nggu la pa-patingi-nya na papeka-nangga nyungga.

⁵I MIRI nawua-ngga eti diha kanandingu; nyungga duku nda ku-kawutaru dàngu nda ku-pambelingu-a welingu lai Nyuna.

⁶Ku-pajàma-nya na kajia-nggu la tau na mapalu-ka; dàngu na papungga la tau ma-ràmbitu-ha da wulu njeringgu. Nda ku-pembeli-anya na matanggu ba paaka-ngga dàngu ba pangànji-ka.

⁷Rukuna ba nandula-ka i MIRI, jiaya hi nda pa-pamakia-ka. Ku-paundu-nya na etinggu ka na-patorungu; kupinya ba nda jia pa-makia-akapa.

⁸Nadu ba nalihi-ngga i Ala, na-katindi-maka nyungga ba nda kunjala. Nggamu nu ma-patikingu pa-patayaku dàngga nyungga? Maiwa nu ka ta-pakariangu la hangga. Nggamu nu ma-ndubaku-ka nyungga? Paràha-nya ka na-ndàharungu la lihinggu.

⁹Langatàka i MIRI Mahupu-jangga na-kahiri-ka, nggamu matoru mbeni papeka ba kunjala? Mbuu ndàbada da ma-panjala-ka napa da-molungu hama tuna tera miri pahàla mabei.

¹⁰Ha dimi matembi-ya i MIRI, dàngu ma-patingi-nya na pulu atana, na ànda na palimi talànga wanguna na-kapàtangu, dàngu nda ningu harii ma-handaraku-nggai; tàka na nyuna pawaiwa lai MIRI; tuyawa na Alamu ka tula-munya.

¹¹Ha dimi ma-mbuhangu pa-kabaingu tau hawiangu, napa na-pamolu-nggai paraï pakaka wikimi. I MIRI-ma duna na mawunda-ya nuna hi tuna nu, napa pa-pajàra halawàla-kai.