Read Kambera YAHAYA 51 Bible Online

YAHAYA 51 - Kambera bible

YAHAYA 51

¹Napanii i MIRI, “Patingi-ngga, ha dimi ma-mbuhangu ka pamàna-nggai dàngu mamai pakarai pa-ndulangu lai Nyungga. Namuya na palindi watu ngia paweli-mi ba kahebi-kai, dàngu na ngia paàki watu ngia paweli-mi ba àkikai.

²Namuha da boku àpumi i Ambarahàmu dàngu i Hara da ma-paana-nggai nyimi; ba kupaau-nya i Ambarahàmu, nda ningua anana; hàla, ku-pakanyuru-ya dàngu hi kuwua-nya wàla wuana da madangu.

³Ha Yeruhali, napa kuomba-kau nyumu, dàngu mbuu ndàbada da ma-ngiangu la kanànda-mu. Da maràda-mu da mambila kutuha woka ngia pambawa, hama tuna na Endingu, na woka ngia pambawa-nggu na ma-kamboka. Lai nu napa na-henggela hawola na tau hi dawunda lii malangu la lu - lududa.

⁴Katàmbalu-nya na talia liinggu, ha dimi banjaru-nggu, patingi-nja da pulu da paniinggu, ha dimi taunggu. Ku-wuangu-ya na lii papekangu-nggu la ba - banjaru, da ukunggu jia-haka napa na harii lai nyuda.

⁵Na mànangu na pawua-nggu mareni-nanyaka, na rehi talunggu mareni tàka-naka. Nyungga wikima napa ma-pareta-ha da ba - banjaru. Da tana mamarau dane - nedingga Nyungga dàngu damonu-nya na pawunda-nggu na ma-wirungu.

⁶Kanundaru-ya na awangu dàngu panauya na pinu tana; na awangu napa na-molungu hama kawuu epi dàngu na tana napa na-katàri hama kalembi ndai, mbuu ndàba na ma-mandapu-nya nameti hama kalomuhu. Tàka na mànangu pawua-nggu na-padaingu mànuma, dàngu na talunggu nda ningu dirana.

⁷Patingi-ngga Nyungga, ha banjaru-nggu, nyimi mipinya nggàraya na ma-deningu; na nalii papekangu-nggu nimanya daa la etimi. Àmbi mangàdatu jàka na-payudi-kai tau, àmbi nggidiku jàka da-paaka-nggai nyuda.

⁸Napa nyuda da-tàlaru dàngu da-molungu, hama tuna da paki pangaa mabei dàngu da tera wulu mbimbi pangaa ana kataru. Tàka na mànangu pawua-nggu na pa-daingu mànuma, na talunggu na pangala tilangu la handalaru handàdiku,” wàna.

⁹Hadangu-wa MIRI, ndula àru-kama, pamàna-nggamawa wàngu kuaha-mu. Hadangu-wa hama tuna àmangu bau pa-muburu-ya na Rahàpu[71] dàngu bau kojaya na nggarihu tehiku hi lundu nameti.

¹⁰Nyumumai ma-pamàdu-ya na tehiku, na wai la kurunduu ma-kanjupu manjolungu. Mulota ànda na mali ningu la wai nuna, ka peku palada da tau pambàda pahàla.

¹¹Napa dabeli da tau pa-pahàla-na i MIRI datama la Yeruhali ba dàngu payaa aunguda da matada kanjupu hawewa-ha paraï pambaha eti manda njàpu. Da-hanggela hawola dambaha eti riki mata, na handuka dàngu na hali ura na-yilangu-ka.

¹²Napanii i MIRI, “Nyunggama duku maomba-kai. Ka nggikina hiu mangàdatu-nya na tau nda payatangu, na tau na pa-wàrungu hama tuna rumba?

¹³Kanii hi jia maromba bia-munya i MIRI na mawulu-kau na ma-wàlahu-ya na awangu dàngu na ma-bànjalu-ya na latana na pinu tana? Nggiki hi malo - lodumu bau mangàdatu-nya na haroputu-na na ma-pakapidihu na ma-rimangu la pa-patàlaru? Langatàka, na haroputu-da nyuda nda jia duluku-ada lai nyumu.

¹⁴Napa paluu pahàla-ha da pa-tanawangu; nda nanjaka-anja pangangu, dàngu nda jia meti-ada ka taninja.

¹⁵Nadu ba Nyunggama MIRI Alamu, na ma-kunggalu-nya na tehiku hi nakanduu na ngalingu-na. Mahupu-mbihaya na tamunggu.

¹⁶Nyungga ma-wàlahu[72]-ya na awangu dàngu ma-bànjalu-ha da latana na pinu tana. Kupanii-nya na Hiungu: Nyumu-maka banjaru-nggu; kuwua-nggauha nyumu da lii papekangu-nggu dàngu hi kuopa-nggau wàngu kuaha-nggu,” wàna.

¹⁷Hadangu-wa, ha Yeruhali, hadangu-wa! Na hukungu na papuha-nanggau i MIRI ruku hànggana mbàda li-munyaka lundu na-kanjupungu.

¹⁸Welingu la ma-mandapu-nggau, nda ningua malonda-kau, welingu la mangia-nggau nda ningua ma-kapipi-kau.

¹⁹Nyumu na-handauni-kau dua ngia ura pàda; rukuna na pabera na tanamu nakabu halàrungu, dàngu na rayatu-mu nameti rimbangu. Nda ningu mamila-nggau eti dàngu ma-panggaüru-kau.

²⁰La nimbihu hupu ànda da taumu danjoru paraï panjàpu na àtalu-da hama tuna ruha makàna la njeringu. Nyuda na-handauni-ha hànggana i MIRI, dàngu na-kayàmbaku-nja Alami.

²¹Patingingu dimi ha tau pa-kapidihu, ma-huruku - huruku-mi hama tuna tau maüku!

²²Tuna yia wàna na MIRI-mi, na MIRI Alami na ma-kahiri-kai, “Na mayila na pawua-nggu ba dàngu mbeninggu, napa kupiti beliya welingu lai nyimi. Napa na-wadaru na hàngganggu, ndai hili hambeta-ayapa.

²³Na mayila nuna napa kuwua-ya la ma-kapidihu-kai, na mambàda paràha-nggai pa-tanggilungu la tana, dàngu na makali - lijaku-nggai ba beri hama tuna ànda ngia pali taukai,” wàna.