Read Kambera YAHAYA 52 Bible Online

YAHAYA 52 - Kambera bible

YAHAYA 52

¹Hadangu-wa, ha Yeruhali, hadangu-wa! Paundu-nya na etimu! Wotuha da paki mangunju-mu! Ha Yeruhali, paraingu matua, na tau iraku nda natama li-apa la pindu bokulu-mu.

²Hadangu-wa welingu la kumburu tana, ha Yeruhali, kàmbahu-ha da aü da ma-karitaku la ihimu. Pukalu-ha da nggili bàhi da mahondu-ha da nggoru-mi, ha dimi ma-mandapu-nya na Hiungu na pa-tanawangu!

³I MIRI napanii-nya na banjaru-na, “Nyimi padangga juangu-kai, jia nàhu hi pahàla jua-mbukai.

⁴Àmangu milaku la Mehiru dàngu hi mi-pandàdiku tau tàkangu lai nu. Hàla, hi na-lamuji-kai paraïna Ahuru dàngu nda nggàra lata.

⁵Tàka nàhu nggàraka pangguma-nggu lai yiahu? Da tau Mbambilu ailulu tanawa biada-nggai. Da ma-kapidihu-kai dangamba dàngu da-nutakungu pa-paaka-ngga Nyungga.

⁶Jia ba tuna, napa nyimi mipeka-ya ba Alaka Nyungga, tàka la rehi nu napa mipinya ba Nyunggama mapanii dànggai nyimi,” wàna.

⁷Ai kanjupu hàmu-aya ba itaya maina na papalewa; nalaku lembaru-ha da ma-palindingu dàngu nangàndi lii hàmu, lii mànjaku, lii mànangu ndumana na Hiungu; ba napanii, “Na Alamu Hanganji-ya!” wàna.

⁸Ronguya na talia mbaha etida da madai paraingu, handàka tarànjaku-da ba da payaa aungu! Nadu ba ita mata-madanya ba nabeli i MIRI la Hiungu.

⁹Miwara mi-kayaka-wa ha dimi kananda - kananda Yeruhali, nadu i MIRI na-panggaüru-ya na banjaru-na dàngu na-pahàla-ya na Yeruhali.

¹⁰I MIRI na-paitangu kuaha-na la hangga matana mbuu ndàbana na banjaru. Mbulu hàlana na pinu tana napa na-hakahii-nya na mànangu welingu la Alanda nyuta.

¹¹Lakuwa! Dunjaku-nyawa na paraingu Mbambilu, ha nyimi dimi mangàndi-ha da pawàngu la Uma Ala! Àmbi jonggaru-duha da malanja iraku.[73] hawari pàku wikimi ba ndedi milaku.

¹²Nda jia ri - ringa-amipa bai laku, dàngu nda hama tuna na tau mapalai. Nadu i MIRI napa na-kapipi-kai; na Ala Ihirailu na-katindi weli winggiru-nggai.

¹³Napanii i MIRI, “Langatàka, napa na-ondungu na atanggu; napa Nyuna pa-wotungu-ya dàngu pa-pajangga-ya.[74]

¹⁴Àmangu nadangu na tau na ma-katàtaku ba naita-ya, nda tu ndoku-manapa na matana hi nda na-pahada taungu-apa.

¹⁵Tàka nàhu nadangu na banjaru na-pa-pahangàtaru-na, da hanganji - hanganji pàdi wàda bia paraï pa-maratangu. Napa nyuda daita-ya dàngu da-jàngapu-ya la kanandingu-da, nu na panda pida làti ba ndedipa,” wàna.