Read Kambera YAHAYA 53 Bible Online

YAHAYA 53 - Kambera bible

YAHAYA 53

¹Na banjaru nuna nahema tuna yia, “Nggamu mawaiya na pambàda ronguma nyuma? Nggamu-yaka na pambàda pekangu rukuna na kuaha-na i MIRI?

²I MIRI nawuku-ya ka hama kalunga-ya nu na atana na matumbu la tana màdu marokutu. Nda nggàra-a ma-manandangu lai Nyuna na ràka pa-tàngaru wàndanya; nda ningua ma-pawànda eti lai nyuna ka tarinju-nya.

³Ta-paaka-nya dàngu ta-wiliru-nya nyuna, tau ma-kanjupu mayila-ya dàngu ma-ndàmangu pajàra-ya. Nda haàtu ndokua ma-mbuhangu pa-tàngaru-ya, tàka nyutambu nda ta-ihili-anya.

⁴Tàka làti duna jiaha da hidunda nyuta da pa-handepa-na, jiaha da mayila-nda nyuta-maka da pa-mayila wàna, tàka ba takaka-ya nyuta na mayila-na nu hukungu welingu lai Alaya ndumana nyuna wàndanyai.

⁵Nyuna duna pa-pamanua-ya rukuda da njalanda nyuta, dàngu hi pajàra-ya mulana na akatu-nda nyuta. Nyuna pa-hukungu-ya ka pa-mànanda nyuta, rukuda da kalimbihu-na hi pamàlaru-ta nyuta.

⁶Nyuta mbuu ndàbanda ta-njàrangu hama tuna mbimbi, haàtu - haàtu himbu-mananya ngarangia wikina. I MIRI na-pabuku-nyaka nyuna da akatu-nda nyuta mbuu ndàbanda.

⁷Wàngu mbana eti ba palua-nya lima, ba tuna wàngu mandangu biana ba na-handepa-ya. Pàdi wàna bia hama tuna ana mbimbi pairu la ngia parupu-ya jàka ndia bai mbimbi pa-kikiru wulu ihina.

⁸Nyuna pa-tahangu-ya hi patanda-nya ngera, hàla hi ndutuya dàngu hi huku pameti-ya. Nda ningu ma-ihili-nya na ura dedina; Nyuna nameti ruku njalana na banjaru-nda.

⁹Nyuna patani pa-angungu tau akatu-ya; ba tuna na retina la padua tau wuluya, jiapa ka nda na-handàkangu patuu manjala, dàngu nda na-handàkangu pa-palapingu,” wàna.

¹⁰Nawuku-ya paraïna i MIRI ka na-mayila nyuna, dàngu ka na-pajàmangu wikina ka kameti maraku podahu njalaya. Napa nyuna na-malundungu dàngu naita-mahapa da wàla wuana rukuna nyuna na pawuku-na i MIRI napa na-hàrangu.

¹¹Tuna nuduka hi napanii i MIRI, “Ba nahàla pa-pàdangu mayila, napa na-paohangu hi nali hàmuya na etina. Nu na atanggu na maliya na etinggu, mbàda duku-nahaka da njala tau dangu; lumuna nyuna napa kujàma-nja da njalada nyuda.

¹²Nawàngu etina ba na-pajàma-nya na lurina dàngu hi diha papohu-nya la tau akatu. Nyuna naduku-ha da njala tau dangu dàngu na hamayangu ndumada ka jàmanja da njalada.[75] Jia-duyaka hi kuwua-nya nyuna tau dangu, da pawua jua-nggunya, dàngu hi na-ngalangu ndumana anguda da tau pa-deningu,” wàna.