Read Kambera YAHAYA 55 Bible Online

YAHAYA 55 - Kambera bible

YAHAYA 55

¹Napanii i MIRI, “Mai ndàbawa dimi nyimi mamadau, unungu-wa, ninguma wai. Maiwa dimi nyimi manda ningu àmahungu, keiwa uhu nggàndumu panda mbayaru dàngu nganguwa! Ninguma wai angguru dàngu wai huhu, kei jua-hawa.

²Nggàra ihi wàngu hi kei ngga - nggàra manda nggàna la eti, dàngu nggàra ihi wàngu hi ràma panda mbihu wàngu? Tundu-nyawa na pareta-nggu, napa minganya na mahàmu, dàngu hi mupàda-nya na pangangu na mapali mangàba.

³Rongu dimi, ha banjaru-nggu, maiwa lai Nyungga, napa kuwua-nggainya na luri na ma-langatàka. Lumuna na mbuhangu dàngu na tuturu panjanji-nggunya i Ndautu, kutura pa-njanjingu ma-palupangu dàngu nyimi.

⁴Langatàka, kutuya nyuna liku uru dàngu mini la ngora, ma-hakahii-nya na kuaha-nggu la ba - banjaru.

⁵Napa mipaau-nja da ba - banjaru hangàdangu, hi daluma rengga papamai lai nyimi, lumunggu Nyungga, MIRI Alami, Ala matua Ihirailu, nadu ba mbàda pa-bokulu-nggunggaika,” wàna.

⁶Beliwa lai MIRI la ngala ba napeku-ipa; kamahi-nyawa Nyuna la ngala ba na-mareni-ipa.

⁷Màlawa na tau akatu ka na-pahàmu-ya na lurina, dàngu ka na-panjilu-nya na katiku halaku kanandingu-na. Màtawa ka nabeli lai MIRI, ka nangala-nya na paaï panamungu-na Nyuna. Màlawa ka na-pambelingu la Alanda nyuta, nàdu ba namàja i MIRI la pa-jàmangu njala.

⁸Napanii i MIRI, “Na pangàdangu-nggu nda pangàdangu-mu nyumu-aya, na àndanggu nda àndamu nyumu-aya.

⁹Hama tuna na janggana na awangu welingu la pinu tana, tuna numbu na janggana na pangàdangu-nggu welingu la pangàdangu-mu, dàngu na àndanggu welingu la àndamu.

¹⁰Hama tuna na urangu na mapuru welingu la awangu, ba nda nahilu beli, tàka na-pambaha-ya na tana, na-pakamboka-ha dàngu na-patumbu-ha da pa-tondungu, natuu wuana na pa-hàbarungu napa dàngu na pangangu,

¹¹tuna numbu na pulunggu na maluhu welingu la ngarunggu ba nda nabeli jua lai Nyungga, tàka na-ngalangu pawunda-ya jàka nggàraya na pambuha-nggu, natàka-nja mbuu ndàba da pawuku-nggu.

¹²Napa nyimi mi-dunjaku-nya la Mbambilu ba dàngu hawola-mi, hi karia-nggai paluhu dàngu mànjaku. Da palindi dàngu da tandula da-hanggela dàngu hi dawara da-kayaka, da pingi ai la woka da-kapòkukungu lima.

¹³Da pingi kajiu napa dahilu-ha da pingi rii madàka, da pingi wàla mbunga dahilu-ha da wuku jemi. Nu hi tuna nu ka bobaru pakada-ngga Nyungga; ka tanda ma-palupangu manda mbulangu-ya,” wàna.