Read Kambera YAHAYA 56 Bible Online

YAHAYA 56 - Kambera bible

YAHAYA 56

¹I MIRI napanii-nya na banjaru-na, “Wunda-yawa jàka nggàraya na ma-deningu dàngu na ma-patangangu la ukunggu. Nadu tiangu-ki ba mai-nggunyaka pa-pamàna-nggai nyimi dàngu hi paloha-nya na pa-deningu-nggu Nyungga.

²Ku-pakanyuru-ya na tau na ma-patutu-nya na lodu Hangahu dàngu na manda pa-iraku-ya na lodu nuna. Na tau na manda wunda ma-akatu napa kuangga pahàmu-nya,” wàna.

³Na tau hangàdangu na mambàda pa-mbulungu dàngu na banjaru-na i MIRI àmbu jia paniina, “I MIRI nda na-pahia-angga pa-marubuku-nya Nyuna dàngu na banjaru-na,” àmbu wàna. Na tau na pambàda pa-kahala bai àmbu jia pangàdangu-na, “Nda peku tama-anggu nyungga la banjaru-na i MIRI, ba nda peku-anggu paningu wàla wuanggu,” àmbu wànadu.

⁴I MIRI napanii-nja nyuda, “Jàka mieti wànya na lodu Hangahu, jàka mi-tuturu la pa-njanjingu-nggu dàngu kai wundaya jàka nggàraya na maliya na etinggu,

⁵napa na tamumi panamu-maha daa la Umanggu dàngu la honga banjaru-nggu. Narihi hàmu-mapa nuna welingu ba ningu ana mini kawini. Kuwua-nggai tamu ma-palupangu da panda marombangu,” wàna.

⁶I MIRI napanii-nja da tau hangàdangu da mambàda tama la diha banjaru-na i MIRI, na mambuha-nya i MIRI dàngu na malumu-nya Nyuna, na matembi-ya na lodu Hangahu dàngu na ma-tuturu la pa-njanjingu-na Nyuna,

⁷“Kungàndi-kai nyimi napa la Hiungu, la tandula matua-nggu,[76] dàngu ku-pahawola-kai la umanggu na ngia palumu-ngga. Da kameti maraku pawotu-mi la ngia pawotu maraku napa kuyema-maha duku. Na Umanggu napa uma hamayangu nduma mbuu ndàba banjaru-ya,” wàna.

⁸Tuna yia na paniina i MIRI Mahupu-jangga na ma-karia belinya na Ihirailu welingu la ngia pawàru-nja, “Napa ku-karia-nja da tau hawiangu ka da-pambulungu dàngu nyuda da pambàda pa-uhingu,” wàna.

⁹I MIRI na-paràha-nja da ba - banjaru hangàdangu pamai hama tuna banda bohu la pa-njàkapu-ya na banjaru-na Nyuna.

¹⁰Napanii i MIRI, “Da liku uru - liku uru banjaru-nggu tau pokiha! Nda nggàra-a papida. Hama tuna ahu kambiu manda bànggaha nyuda, tàka mahuru dàngu manggadipangu pàku-adanya. Dira minjalu-ha ba da-katuda!

¹¹Hama tuna ahu malumbangu mandedi handàkangu pambihu-ha nyuda. Nuda da liku uru nda nggàra-a pa-jàngapu-da la kanandingu-da. Nimbihu-da nyuda àtalu wàngu eti-ma-ada ba dahimbu kangeha nduma wikida.

¹²Dapanii nu da tau maüku, ‘Màla ka ta-unungu wai angguru dàngu ka ta-unungu lundu hodanda! Na lodu haromu narihi-pa pahàmu welingu la lodu nàhu!’ wàda,” wàna i MIRI.