Read Kambera YAHAYA 57 Bible Online

YAHAYA 57 - Kambera bible

YAHAYA 57

¹Ba nameti na tau hàmu na ma-karàngi la huri lumungu, nda ningua mapinya dàngu ma-ihili-nya. Ba dameti-ka, hinggilu-danyaka duda welingu la hanggàmaru hi da-hangahu mànjaku.

³Tàka nyimi, la kolaka tau mawunda njala, maiwa ka patanda-nggai ngera! Ndai rihia pahàmu welingu la tau ma-kawanangu alimuu, ma-ndàmangu pa-njuraku dàngu ma-pahunda!

⁴Nggamuya na pariki-mi? Nggamuya na pa-payudi-mi? Ka nda wàla wua ma-kambàliku dàngu ma-katadaku-akai nyimi?

⁵Nyimi mi-marubuku-nja da marapu kamboka dàngu bai pa-jàmangu wikimi la pa-itiru-na na tolumi la lumbu ai mambiha-mi. Da anami bai taninja la mondu dàngu la panga watu.

⁶Bànungu-duka hi mi-pauhingu watu kamilihu welingu lai nu. Nuna-yaka na ndumami! La watu nudamai bai piliri-nja wai angguru tàka hi miwua-nja uhu nggàndumu ma-ngejingu. Bai rekiya kumbuha ndàbanja nuda nu?

⁷Milua la pinu - pinu palindi la pawotu kameti maraku dàngu ba lundu hodami la itirungu-mi kawini.

⁸Mi-bànjalu-ha da kahala hada kajari-mi la patenga pindu umami. Mbàda dunjaku-minggaka Nyungga. Mi-pahàla-nja da pakimi tàka hi mihei la ngia pa-katuda pa-panggailaru dàngu kawini yorami na pambàda wuami wunda la pa-katuda angunggau, ba tuna palundu-dimi-nyaka na pa-itirumi.

⁹Nyimi mitungu mina dàngu mbii kati, hàla hi milua pa-marubuku la marapu Moluku. Mi-paràhangu papalewa la paraingu mamarau, jiapa la parai mameti-mbu.

¹⁰Dàngu nda kambotahu-na na monungu-mi ba buha - buhami pahimbu-ha da marapu - marapu. Bai kakaya nyuda damàka pawua-nggai ringgitungu mabidi ka àmbi maluputu.

¹¹Napanii i MIRI, “Nggamu-haka nu da marapu da ma-pamangàdatu-kai, hi lupa mi-kambàliku dàngu ba ndai namuka Nyungga? Màla ndai hili lumu-anggapa Nyungga ba dira mandaika ba pàdi wànggu?

¹²Na nyuna nàhu ka kupeka-nggai; na-karàngi-mi la ngera lumungu ma-kapilandu-ya, dàngu da pawundami nu mbuu ndàbada nda ningua linguda lai nyimi.

¹³Jàkai kaladaku, màtawa nuda da kahala hada ka da-pamàna-nggai! Napa nyuda damohu ba na-hawuru ngàndiha ngilu hi da-molungu wàngu handàka kayeku-a! Tàka na tau ma-handera lai Nyungga napa da-kangeha-nya nuna na tana hi da-marubuku-ngga la Umanggu,” wàna.

¹⁴Ningu mapanii, “Pandoi-wa dàngu pa-yemangu-wa ànda nduma banjaru-nggu, pa-hinggilu-ha mbuu ndàbada da ma-pahambarungu,” wàna.

¹⁵Nadu ba tuna yia na paniina i Ala Mahupu-jangga dàngu na ma-matua, na ma-kuaha lundu nu - nu, “Nyungga ku-ngiangu la pangia majangga dàngu ma-matua, tàka na nyuna la honga tau mawawa eti-mbu da ma-paura-ha da njalada, ka ku-pajia beliya na ringgitu dàngu na monungu-da.

¹⁶Nda ku-panjala pangala-anya na banjaru-nggu; nda na-palupangu-a ba kumbeni, ka àmbu namàli na ringgitu-da, tàka hi Nyungga pàkudui ma-paluri-ha nyuda.[77]

¹⁷Jiaya na njala malumbangu-da hi kumbeni, jia-duya hi kuhuku-nja dàngu hi ku-dunjaku-nja. Ba tuna nyuda da-malihu katiku-da dàngu hi daingu biana ba dahimbu ànda wikida.

¹⁸Mbàda ita-nggunyaka na huri lurida, tàka nyuda napa ku-pamàlaru-mbuha. Napa Nyungga ku-kapipi-ha dàngu kundula-ha hamanai ku-panggaüru-ha da tau da ma-handuka etida.

¹⁹Napa Nyungga kuwua-nja pa-mànjaku wàngu mbuu ndàbada da tau, ka ma-mareni-ha ka mamarau-hakai. Napa Nyungga ku-pamàlaru-ya na banjaru-nggu.

²⁰Tàka na tau akatu hama tuna na tehiku na ma-ngalingu na manda handàkangu pa-mandangu. Na arihu-na nangàndi kamàparu dàngu kapihaku.

²¹Nda ningua mànjaku nduma tau manjala,” wàna i MIRI.