Read Kambera YAHAYA 6 Bible Online

YAHAYA 6 - Kambera bible

YAHAYA 6

¹La ndaungu pameti wàna i Hanganji Uhia, nyungga kuitaya i MIRI. Nyuna mandapu-na padua dita la kanjàka-na na ma-jangga dàngu na ma-pangarangu. Na kalembi bokulu-na na-panggàbalu hàlanya na nggubulu Uma Ala.

²La winggiru-na ndolaku-danyaka da dika - dika da maroka hama tuna epi, kawàra ningu-mada ruu kàpada nomu mbàla. Dua mbàla ruu kàpana na-pandàbi-nya na matana, dàngu dadua mbàla na-pandàbi-nya na tauna, tàka dahili dua mbàlai jia-haka da pa-hawurungu wàna.

³Nyuda dapawa-rangu dàngga anguda: “Matua, matua, matua. Na-matua i MIRI Mahupu-mbiha. Na pinu tana nambinu wànguka na ninya Nyuna na ma-pangarangu,” wàda.

⁴Na hanggubu nggoruda nyuda nanggà-duku wànya na watu umana na Umana i MIRI, dàngu nuna na Umana i MIRI nambinu wàngu ma-kutungu.

⁵Ka panii-dunggu-nyaka, “Nai a-ai! Nda ningu-apa duku pamonu-nggu, ura pàku-anggunya, nadu ba na-iraku ruku njala na ngarunggu, dàngu ba ngiangu-manggu-nyaka la honga banjaru matuna nu. Jiapakai ba tuna kuita wiki wànya mata-mangguka na Hanganji, i MIRI Mahupu-mbiha!” wànggu.

⁶Tunaka nu na haàtu welingu la dika nuda hawuru toma-nanggaka nangàndi wàla epi na papiti wàna ngepi la ngia pawotu maraku.

⁷Na-jonggaru wànya wàla epi na tàda ngarunggu hi napanii, “Na wàla epi na-jonggaru-yaka na tàda ngarumu. Nàhu da njalamu pa-podahu-haka dàngu da ndokumu najàma-njaka i MIRI,” wàna.

⁸Hàla rongu-nggunyaka i MIRI ba napanii, “Nggamuya napa na pa-palewanggu? Dàngu nggamu-yaka na matanggu ngàndiya na liinda?” wàna. Ka hema-nggunyaka, “Yiangga nyungga. Palewa-ka nyungga!” wànggunya.

⁹Ka paràha-nanggaka nyungga pangàndi-ya na lii langu yiana la banjaru, “Nyimi napa rongu pangalangu-minyaka, na nyuna ndai hàmburu-aya. Nyimi napa ita pangala-mami-nyaka na nyuna ndai pianya jàka nggàraya na madedi,” wàna.

¹⁰Ka panii-nanggaka nyungga, “Pa-kanduba-hawa da kanandingu-da da tau nuda, pa-kawanga-ha da kahilu-da dàngu papoki-ha da matada, ka àmbu peku itada, jàka ndia ronguda, jàka ndia jàngapu-da, dàngu ka àmbu peku pambelingu-da lai Nyungga hi da-mandangu wàngu,” wàna.

¹¹Ku-paàra-nya, “Pira mandai-manapa ba tuna nu mànu MIRI?” wànggunya. Nahema-ka, “Lupa dadedi watu tanyu-ngguru hi nda ningu mangia-nja da paraingu, lupa ba nda hili ningu mangia-nja da u - uma, hi lupa nabulu dàngu na-kariku na tana.

¹²Na mangia-nja da paraingu nuda ku-yaulu-ha la mamarau lupa na-malinggitu na tana nuna.

¹³Jiapa-kingu la honga tau hakambulu ka ningu-kipa haàtu ma-ngiangu la tana nuna, nyunambu pa-patàlaru-mbuya. Tàka hama tuna na pingi wàngga jàka pungguya ba ningupa kanjiru-na, tuna numbu ba ningupa marihi welingu la banjaru nuna na manjadi kawunga ngia paweli-na na banjaru ma-matua.”