Read Kambera YAHAYA 61 Bible Online

YAHAYA 61 - Kambera bible

YAHAYA 61

¹Na kuaha-na i MIRI Mahupu-jangga ninya lai nyungga; Nyuna napindi-ka dàngu na-palewa-ka nyungga la pangàndi lii hàmu la mamila dàngu la pa-pamàlaru-ya na ma-làjaru etina; la pa-bobaru-ya la tau pa-tahangu ba rengga-nanyaka na pahàla-ha, hamanai da tau la uma kapàtangu ba marandeka-danyaka napa.

²Na-palewa-ka nyungga la pa-bobaru-ya ba toma-nanyaka na rehina i MIRI la pa-pamànangu; la pa-panggaüru-ya mbuu ndàba na ma-handuka, dàngu la patungu hilu hanggangu la papada nyuda;

³la pawua-nya hanggela hawola na tau na ma-hawina dàngu na ma-punangu wai mata; la pa-pambeli-ya na hawina-da ka nalua-ya la ludu wotungu. Hama tuna pingi ai pa-pamula wikina i MIRI-ha nyuda napa. Napa dawunda-ya na mahàmu dàngu na ma-deningu, tàka hi pa-mangunju-ya i MIRI.

⁴Napa da-pahada-nja da paraingu da mambàda mandai pa-tanyungguru dàngu hi da-pandolaku-ha da pa-ngiangu mambàda mandai pa-malinggitu.

⁵Ha dimi banjaru-nggu, na tau hangàdangu napa nalumu-nggai nyimi; napa dapawa-nja da bandami dàngu daràma-ha da woka mara lupa da woka angguru-mi.

⁶Nyimi napa atana i Ala wàdanggai dàngu ratuna na MIRI-nda wàda-mbunggai. Napa mipàda-nja da pawulu-da da ba - banjaru dàngu napa mi-hamemu wànja da malanja-da.

⁷Rukuna ba dua ndàni-naka na makia pambàda ngalami, dàngu ba mbàda nduma-minyaka na kamakihu dàngu na paakangu, jia-duyaka hi dua ndàni-mbunai na kangeha na pangala-mi la tanami hi mangu-minya na hawola ma-palupangu.

⁸Napanii i MIRI, “Nyungga kumbuha-nya na ma-deningu dàngu huda-manggunya na pa-kapidihu dàngu na akatu. Napa ku-patutungu-ma duku la pawua-nggai wundami, dàngu la patura lii pa-njanjingu ma-palupangu dàngu nyimi.

⁹Da wàlami patanda-ha la nggi - nggini, da-kawulangu la honga banjaru mbuu ndàbada. Jia-duyaka mbuu ndàbana na tau na maita-ya napa dapeka, ba ku-pakanyuru-ya na banjaru yiana,” wàna.

¹⁰Na Yeruhali napanii, “Na-nggaüru na etinggu rukuna i MIRI, kanjupu mbaha etika rukuna i Ala. Hama tuna na bidi papa mini kawini ba ma-manandangu ndàbaha da paki pawotu-da, tuna numbu i MIRI ba na-panggàna-ngga kalembi pamàna wàngu dàngu patalu wàngu.

¹¹Hama tuna wini na pa-hàbarungu ba nalua-ya napa la patumbu, tuna numbu i MIRI Ala ba na-patumbu-ya na mànangu hi dawotu-nya napa paraï mbuu ndàba banjaru,” wàna.