Read Kambera YAHAYA 62 Bible Online

YAHAYA 62 - Kambera bible

YAHAYA 62

¹Lumuna na Yeruhali napa nyungga kupanii, lumuna na Hiungu napa nyungga nda jia pàdi wànggua, hi lupa pamàna-nya dàngu na-handaraku na taluna hama tuna epi jilungu la rudungu.

²Ha Yeruhali, da ba - banjaru daita-ya na talumu, da hanganji - hanganji da-tàngaru-ya na bokulu-mu. Nyumu napa dapaau wànggau bidi tamu, I MIRI wikima duna matunggau tamu bidi.

³Nyumu hama tuna tubuku manandangu-kau la limana i MIRI, hama tubuku pa-hanganji la limana na Alamu.

⁴‘Na Pa-dunjakungu,’ nda wàda-anyapa na tamumu, ‘Na Ma-malinggitu,’ nda wàda-anyapa na tanamu. ‘Na Panamu-na i Ala,’ wàda-nggauka napa, tàka na tanamu ‘Na Mambàda nika,’ wàdanya, nadu i MIRI ba nahàmu-du lai nyumu, Nyuna beri leina na parai-munya.

⁵Hama haàtu bidi mini ma-keulu haàtu ana karia, tuna nu na mawulu-kau ba napaha-kau.[78] Hama tuna na bidi papa mini ba na-hawola ba naita-ya na papaha-na, tuna nu i Ala napa ba nahàmu-nggau nyumu.

⁶La kangeli Yeruhali ku-bànjalu-nyaka tau madai; la lodu la rudungu àmbu pàdi wàdadu, tàka lupangu-ma ka da-panamu-mànunya i Ala na pa-ràndingu na pambàda ràndina.

⁷Àmbu da-pahia-dunya Nyuna pakandii jàka ndedi na-pahada belinya na Yeruhali, dàngu la pa-panjadi-ya paraingu ma-kawulangu la nggubulu pinu tana.

⁸Mbàda pa-njanjingu wàngu harangu-naka i MIRI hi na-pahàra-nya wàngu mbihana: “Nda kuhili wua-ahapa la muhu da uhu nggàndumu-mi; da tau hangàdangu nda dahilu unu-anjapa da angguru-mi da pangala-mi wàngu dira matiki.

⁹Tàka nyimi ma-pauhingu ihi paraï, napa minganya ihina hi miwotu-nya i MIRI; tàka nyimi mapàpu wua angguru, napa miunu-nya waina la talora Umanggu,” wàna.

¹⁰Ha dimi ma-mandapu la Yeruhali, luhu li ninguwa la pindu bokulu, rimanja ànda da tau da mabeli. Pandoi-wa ànda bokulu, payila-nja da watuna, pahada-nja da penji ndumada da ba - banjaru.

¹¹I MIRI na-patàkangu liina lundu la hupu tana, “Pekanya na ma-mandapu la Hiungu, ‘Tàngaru, nàmunya i MIRI Ma-pamànangu! Dakiku-nya tau pambàda pamàna-na Nyuna,’ ”[79] wàna.

¹²Tuna yia napa ba tunja tamuda nyuda: ‘Banjaru Matua’; ‘Banjaru pambàda pamàna i MIRI,’ wàda. Na Yeruhali napa, ‘Paraingu parinju-na i MIRI’, ‘Paraingu panda hili dunjaku-na i MIRI,’ wàdanya.