Read Kambera YAHAYA 63 Bible Online

YAHAYA 63 - Kambera bible

YAHAYA 63

¹“Nggamuya ihu na mamai nàmu welingu la Mbòhura la Endumu? narara na kalembi-na, danggepi da pakina; napangga[80] ba dàngu nggalaku kaborangu-na,” wàda. “Nyungga yia MIRI mamàka pa-pamànangu mainggunya pangàndi lii mànangu,” wàna.

²“Nggiki hi tuda numaka rarada da pakimu, hama tuna kalembi tau ma-tarohaku wua angguru?” wàda.

³“Didi-maaka matama la ngia pa-tarohaku wua angguru nda ningua welingu la honga banjaru-nggu ma-pambapa dàngga. Kutaro - rohaku-ha da banjaru ba kumbeni, hama tuna ba taro - rohaku wua angguru. Da-tawuhuru da wai riada hi na-meletaku na kalembi-nggu, hi da-marihaku hàla da pakinggu.

⁴Mbàda kawuku-nggunyaka na lodu tungu hilu, dàngu na rehi pahàla-ya na banjaru-nggu.

⁵Kuhimbu, tàka nda ningua ma-pandulangu, ku-hangàtaru ba nda ningu ma-pambapa dàngga. Tàka na àtalu wikinggu jia na mandula-ka, na hàngganggu jia na ma-pambapa dàngga.

⁶La dalu hàngganggu na ma-hambumbatu, kutaro - rohaku-ha da banjaru; ku-patàlaru-ha nyuda, hi kubunya na riada la tana,” wàna.

⁷Ka ku-bobaru-ya na-panamungu-na i MIRI, wàngguka dàngu la pawotu-nya Nyuna rukuna mbuu ndàba da paraï paruku-na. Na pa-kanyuru-ya wàngu bundu làndangu na banjaru-na, nadu ba na-paaï pa-namungu dàngu nda ningua kanjupungu-na na pa-namungu-na.

⁸Napanii i MIRI, “Langatàka, nyuda banjaru-ngguha, ana manda pahala etiha,” wàna. Nyuna jia-yaka na Ma-pamàna-nja nyuda,

⁹Nyuna wiki na-handauni-ya handuka-da nyuda.[81] I MIRI nda nawàngu pa-pangàndingu-a papalewa jàka ndia wunangu; Nyuna wikima duna ma-pahàla-ha nyuda ruku paaï panamungu-na. Naingu-mana ba na-kabubulu-ha piti welingu la handàka-na.

¹⁰Tàka nyuda da-patula ngganggangu hi da-pahanduka-ya na etina i MIRI. Ka punjilungu-nanyaka Nyuna hi na muhunja nyuda Nyuna wikima ma-pabera-danja nyuda.

¹¹Ka namu-danyaka[82] na rehi la handàka-na, la rehina i Muha, atana i MIRI. Ka paàrangu-danyaka, “Nggi-yaka i MIRI na mairu ngàndiha da liku uru banjaru-na pali ningu la tehiku? Nggi-yaka i MIRI na mawua-ya na kuaha-na lai nyuda?

¹²Nggi-yaka i MIRI na ma-karaha-ya i Muha wàngu limana ma-kapàru kaborangu, dàngu na mabika-ya na wai la hanggada nyuda ka peku wuwa wànguna na tamuna lundu nu - nu?

¹³Nggi-yaka i MIRI na mairu ngàndiha nyuda pali ningu la libu muru? Hama tuna na njara na mali la maràda wara, ba nda da-handàkangu-a pa-tunjuru,” wàna.

¹⁴I MIRI nangàndi-ha nyuda la ngia pa-pànjangu, hama tuna banda pa-welingu ka dangangu rumba la maràda. Tuna nuduka ba na-kapipi-ya na banjaru-na, ka peku pa-bokulu-ya na tamuna.

¹⁵Ou MIRI, ngadu àru-kama welingu la awangu, welingu la pangia-mu na ma-matua dàngu ma-mangarangu. Nggi-yaka na pa-namungu dàngu na kaborangu-mu? Nggi-yaka na mbuhangu dàngu na mila etimu? Àmbu pàtu-duha nuda welingu lai nyuma.

¹⁶Ka nda Amama-nggaupa nu Nyumu? I Ambarahàmu dàngu i Yakupu nda datanda-a-kama nyuma. Tàka Nyumu ou MIRI, jiakau Amama nyuma, Ma-pamàna-nggama welingu la handàka-na.

¹⁷Ou MIRI nggikina hiu màta-nggama pa-njàrangu? Nggikina hiu pa-tongguru-ha da etima hi nda ma-mangàdatu-nggau Nyumu? Beli àruwa lumuda da atamu, lumuna na banjaru-mu, na mangu na kangeha-mu.

¹⁸Nggikina hiu pahia-nya na muhu la pa-kalijaku-nya na Umamu, tàka hi na-pairaku-ya tau na tandula matua-mu?[83]

¹⁹Mu-palua-nggama lima beri hama tuna ndedi mu-handàkangu-ma Nyumu pa-kuaha-kama nyuma; beri hama tuna ndedi ma-handàkangu-ma nyuma pa-banjaru-mu-nggama.