Read Kambera YAHAYA 64 Bible Online

YAHAYA 64 - Kambera bible

YAHAYA 64

¹Bàriku-ya na awangu, kau puru dou MIRI, pa-nggairidu-hawa da palindi la hanggamu,

²hama tuna epi ma-paroka ai hi na-pawura-ya na wai. Pa-jiliku-nya na kuaha-mu la mu - muhumu, hi lupa da-kandàndaku la hanggamu da ba - banjaru.

³Mbàda wunda-muka pawunda ma-wirungu, na panda mbuti ndokuma. Ba jia napuru-mu, da-yoyangu la hanggamu da palindi.

⁴Ndedi ninguma mambàda rongu, dàngu ndedi ningumbu mambàda ngitangu ba ningu ala hinggilu-mu Nyumu ma-paluangu lima, la tau mamonu-nya nyuna.

⁵Nyumu mulua pa-hàmburu-ya na tau pa-tutungu dàngu na maluri tundunya na pawuku-mu. Nyumu muhàngga-nggama, tàka nyuma pa-daingu njala biama tubangu-ma weli ndaingu-maka ba manjala.[84]

⁶Nyuma mbuu ndàbama tau iraku-kama, jiapa-ki da pawunda-ma da mahàmu da-marihaku-mbu. Napa nyuma ma-molungu ruku akatu-ma hama tuna ruu ai malaï pa-hawuru ngàndi ngilu.

⁷Nda ningu ma-hamaya-nggamu, jàka ndia makarai-ya na pa-ndulangu-mu, nadu bau wini-dunya na matamu welingu lai nyuma, dàngu bau puli-nggama[85] ka na-patàlaru-kama njalama.

⁸Na nyuna Nyumu ou MIRI, Ama-manggau duma, nyuma tana wurungu-kama, tàka Nyumu ma-unggulu-kama; nyuma mbuu ndàbama paruku limamu-nggama.

⁹Àmbu tikadu pahàngga halawàla-nggama, ou MIRI, àmbu hilu namu-duhapa da njalama; tàngaru, nyuma yia banjaru-mu-nggama.

¹⁰Da paraingu matua-mu da pahada maràda telangu-ka, na Yeruhali maràda bulu ma-kahàna-yaka.

¹¹Na Uma Ala na ma-matua dàngu na ma-bunjuku na ngia pawo - wotu-danggau da boku la mangilu-ma, na-patalàpu-yaka epi; mbuu ndàbada da pangia da pambuha-ma kananda-ki-dahaka.

¹²Muita ndàba-maha nuda MIRI, kanii hi padaïngu pàdi wàmu bia? Puli-mamu-nggamaka ka mapàda-nya na mayila ma-kanjupu mbotuna?