Read Kambera YAHAYA 65 Bible Online

YAHAYA 65 - Kambera bible

YAHAYA 65

¹I MIRI napanii, “Nyungga rimangu-manggu-nyaka la pahema-ya na banjarunggu tàka nyuda nda da-hamaya-angga. Rimangu-manggu-nyaka ka da-hàmburu-ka Nyungga, tàka nyuda nda dahimbu-aka. Na banjaru nuna pàku nda dapaau-angga Nyungga, jiapa-kai ka rimangu-manggunya pahema: Yiangga yia! ka wànggu làti.

²Nyungga duku rimangu mànu-manggunya panggepi-ya na banjaru-nggu, tàka nyuda da-mbuhangu pa-patula ngganggangu. Na banjaru nuna pàku dawunda ma-akatu dàngu datundu-nya na pa-pakaka wiki-maada.

³Nyuda nua naingu-mada ba datuya na pambeni wànggu rukuna ba dangàndi kameti maraku la woka - woka ndumada da marapu[86] dàngu ba datunu kaminyangu la ngia pawotu - ngia pawotu maraku lai nu.

⁴La rudungu nyuda dalua la kubu liangu - kubu liangu dàngu la reti - reti la pakarai panaungu la wàndi - wàndi. Nyuda dangangu tolu wei dàngu da-unungu wai rii tolungu manda hida.

⁵Hi dapanii, ‘Laku marau, àmbu jonggaru-kama, nadu nyuma duma ma-matua-kamaka dàngu ba kahika-manyaka welingu lai nyimi!’ wàda. Nda ku-torungu-a paita-ya na pawàda! Na mbeninggu lai nyuda hama tuna epi manda era la pambàda-ya.

⁶Na hukungu-da nyuda pambàda tulihu-yaka la hangganggu. Langatàka-ma, nda jia pàdi wànggua. Napa kutungu hilunggu la njalada nyuda

⁷rukuda da njalada nyuda dàngu da njalada da boku la mangilu-da. Nyuda da-pamakia-ka ba dawàngu patunu kaminyangu nduma da marapu la ngia pa-lumungu la tandula. Napa kuhuku-nja nyuda pa-namatu-nya na pawunda-da la rehi na ma-làpahu,” wàna.

⁸I MIRI napanii, “Da wua angguru da maningu-ipa waida nda pa-wàru-anja, tàka patuha wai angguru. Tuna numbu na banjaru-nggu nda jia pa-tàlaru ndàba-anggunya, nadu la hongada nyuda ninjapa da ma-paata lai Nyungga.

⁹Ninja da tau Ihirailu welingu la kabihu Yahunda da pa-pakanyuru-nggu napa, tàka da wàla wuada napa damangu-nya na tana ma-palindingu-nggu. Da tau papindi-nggu da ma-paata lai Nyungga napa da-ngiangu lai nu.

¹⁰Napa na banjaru-nggu na marubuku-ngga Nyungga; da mbimbi da hapida napa da niti rumba la Ma-ndidaru Harungu dàngu la Lolangu Akuru.

¹¹Tàka nda tuna nua na urada da tau da ma-dunjaku-ngga Nyungga, dàngu da manda wàrihu-ya na Hiungu, na tandula-nggu na ma-matua,[87] dàngu da ma-mangeji-nja i Nggàtu dàngu i Meni, da marapu pa-ondungu wàngu dàngu ma-pahàmu ura.

¹²Napa nyimi mimeti ruku ma-pajanggilu. Nadu, ba kupaau-nggai nyimi, ndai hema-a, dàngu ba ku-kareuku dànggai nyimi, ndai pa-tingingu-a. Mi-mbuhangu ningu-mapa palawa-ngga Nyungga dàngu patuu ma-akatu.

¹³Langatàka-ma, na tau na ma-marubuku-ngga Nyungga napa nangangu, tàka nyimi rimbangu bia-minya. Nyuda da-ngunungu, tàka nyimi madau bia-minya. Nyuda da-hawola, tàka nyimi makia pàku-aminya.

¹⁴Langatàka-ma napa nyuda da-kayaka mbaha eti, tàka nyimi hii padudurungu bia-minya.

¹⁵Da tau papindi-nggu napa da-ràtungu wànya na tamumi nyimi, ‘Màla àruki i MIRI Mahupu-jangga ka na-pameti-kai hama tuna nyuda!’ wàda jàka da-harangu. Tàka na tau ma-karadaku-ngga napa kuwua-nya tamu bidi.

¹⁶Nimbihu-na na tau la tana lai nu na makarai kanyuru, napa dakarai ka na-pakanyuru-ha paraïna i Ala na ma-tuturu. Nimbihu-na na tau na ma-mbuhangu pa-harangu, napa na-harangu la tamuna i Ala na ma-tuturu. Nadu na mayila àmangu mbàda yilangu-naka dàngu pa-marombangu-yaka,” wàna.

¹⁷Napanii i MIRI, “Napa Nyungga ku-padikangu awangu bidi dàngu tana bidi. Da madedi la rehi na ma-làpahu napa pa-marombangu-haka dàngu nda pahili namu-ahapa.

¹⁸Hawola-wa dàngu mbaha etiwa lundu nu - nu rukuda da pa-padika-nggu. Nyungga ku-padika-nya na Yeruhali bidi ba hawola juaya, dàngu na ma-mandapu-nya na-hanggela hawola.

¹⁹Nyungga wiki napa ku-hangela rukuna na Yeruhali, dàngu ku-hawola rukuna na ma-mandapu-nya. La paraingu nuna nda ningu-apa mahii, dàngu nda ningu-apa tau ma-kaladaku karai pa-ndulangu.

²⁰Nda ningu-apa anada mameti paana kuduna, dàngu na tau matua napa namalai na lurina. Na tau na ma-hangahu ndau lurina napa bidi tau-ayapa wàda bianya, na tau na mameti na mandedi toma matungu nu, nggàna-nanya hukungu-na Nyuna wàdangga.

²¹Da tau napa da-pahadangu uma hi dangia wikinya; na uma nuna nda nangia-anya tau hawiangu. Nyuda napa da-pamula angguru hàla hi dapàda wikinya na wai angguru; na tau hawiangu nda daunu-anya. Na banjaru-nggu napa namalai na lurida hama tuna da pingi ai, hi dapàda-nya na paraï ruku limada.

²³Mbuu ndàbada da paràma-da napa da-palingu, da anada napa nda jia meti harabàndangu-ada. Nyuda dàngu da wàla wuada napa ku-pakanyuru-ha lundu nu - nu.

²⁴Ba ndedi dakarai, mbàda hema-ngguka; ba ndedi nanjàpu na hamayangu-da, mbàda kataku-nggunyaka na hamayangu-da.

²⁵Da ahu rumba dàngu da ana mbimbi angu nganguda rumba; da hinga napa dangangu rembi hama tuna hapi, dàngu da ularu napa nda da-pa-manjurangu-apa. La nggubulu-na na tandula matua-nggu, nda ningu-apa ma-pa-manjurangu jàka ndia matuu ma-akatu,” wàna.