Read Kambera YAHAYA 66 Bible Online

YAHAYA 66 - Kambera bible

YAHAYA 66

¹Napanii i MIRI, “Na awangu kanjàka hanganji-nggunya, dàngu na pinu tana lata wihi-nggunya. Jia nggàra uma hamangu-yaka nu na pawulu-mungga, dàngu nggiki hama pa-ngiangu-yaka nu ka na-ngiangu ningu ba wàmungga?

²Na pa-nggubulu awangu paruku lima-nggunya, hi padika-nya mbuu ndàbana. Na nyuna na pambuha-nggu jiaya na tau ma-karàda etina, na ma-paura-ha da njalana, dàngu na ma-mangàdatu dàngu na ma-manundu lai Nyungga.

³Ba tuna na banjaru nuna àtalu wàngu eti biada; nahàmu wànguma na etida ba dawàngu huri lumungu pa-mayitangu. Lai nyuda nda ningua pa-hilitu-na: nawotu kameti maraku hapi mini dàngu nawotu kameti maraku tau, nawotu kameti maraku ana mbimbi dàngu ba pata nggoru ahu; na-mangejingu wàngu uhu nggàndumu dàngu na-mangejingu wàngu ria wei, la patunu karanu dàngu ba lumungu kahala tau.

⁴Jia-duyaka hi kuwàngu-mai duku eti wikinggu Nyungga tàka hi ku-pahandauni-nja na ura pàda pa-mangàdatu-da. Nadu ba ku-paaungu, nda ningua mahema; ba ku-kareuku, nda ningua ma-patingingu. Darihi mbuhangu-mapa palawa-ngga Nyungga dàngu la patuu ma-akatu,” wàna.

⁵Patingingu nggàraya na papanii-na i MIRI, ha nyimi ma-mangàdatu dàngu ma-manundu lai Nyuna, “Ruku tuturu-mi lai Nyungga, ningu la honga banjaru-mi ma-karaü-nggai eti, dàngu nda dabihu pa-panggolu dànggai. Nyuda da-paaka-nggai nyimi, ‘Màtawa i MIRI ka na-pajiliku-nya na bokulu-na, ka peku ita-manggai nyimi bai hawola,’ wàdanggai. Na nyuna napa nyuda wiki da ma-makia.

⁶Patingingu! Ningu lingu makanduu la paraingu; ningu talia lii la Umanggu; nu jia-duyaka na talia liinggu ba kutungu hilunggu la muhu!

⁷Na paraingu matua-nggu beri kawini-ya na ma-paana ba dàngu ndedi kayili-na paraï pakatiu paana; na ma-paanangu anakeda mini ba dàngu ndedi pàda-nanya na katiu paana.

⁸Nggamu mambàda rongu ma-hamangu tungu nu? Nggamu mambàda itangu mahama-nya nuna na madedi tuna nu? Tàka na banjaru Ihirailu nadedi la rehi katiu paana-na na Hiungu.

⁹Àmbu nidunya la kanandingu-mi na matuna yia, ka nadedi na banjaru-nggu ba wàngguka, tàka nda kuhili pahia-nyai ka habola-nya,” nuya na papanii-na i MIRI.

¹⁰Mbaha eti dànyawa na Yeruhali, ha dimi mbuu ndàbami mambuha-nya. Nyimi ma-handuka lumuna nyuna, peku-mika nàhu kai hawola mbaha eti.

¹¹Napa nyimi mipàda-nya na mbokaru-na, hama tuna na haàtu ana rara na mahuhu la inana.

¹²Nadu ba napanii-du i MIRI, “Napa kuwua-nggainya na mànjaku hama tuna luku na ma-lulungu; da pawulu-da da banjaru pangàndi-ha napa lai nyimi hama tuna na luku na maiwa. Hama tuna na ana rarakai nyimi na pa-pahuhu dàngu na pakalunggu inana, tàka hi nao - odahu-ya la babana.

¹³Napa Nyungga kuomba-kai la Yeruhali, hama tuna na haàtu ina na maomba anana.

¹⁴Bai itaya nuna ka mbaha eti-dimi-nyaka, tàka hi mi-àtalu dàngu mi-hayandalu hama tuna na rumba ma-kangura. Napa da atanggu daera-nya na kuaha-nggu tàka da muhunggu dapàda-nya na mbeninggu,” wàna.

¹⁵Langatàka, napa namai wàngu epi i MIRI; napa Nyuna na kaliti-ya na kareta-na hama tuna na làpuru, la pa-hanubuku-nya na hànggana, dàngu la pambeni pa-langatàkangu.

¹⁶Nadu mbuu ndàbana na tau na manjala pa-hukungu la epi dàngu la hapanda-ya napa, dàngu nadangu-ma na pa-hukungu meti.

¹⁷Napanii i MIRI, “Mbuu ndàba na tau na ma-paili wikina ka pajurungu la wo - woka ndumada da marapu[88] la palumu-nja, napa da-molungu pa-kariangu dàngu da tau mangangu tolu wei dàngu kalaü hamangui da pangangu hawiangu da pa-mayitangu.

¹⁸Kupi-manya[89] na pa-pangàda-da dàngu na paraï rukuda. Nyungga mainggunya[90] pa-pauhi-nja da tau welingu la nggubulu banjaru. Nu la rehi pauhi-da, napa daita-ya na kuaha-nggu Nyungga.

¹⁹Napa kutuya na hau tanda la hongada nyuda. Hawiangu da ma-hakudu-da la hongada nyuda napa ku-pamàna-nja. Napa nyuda ku-palewa-ha la ba - banjaru la ta - tana mamarau da mandedi handàkangu parongu-ya na rukunggu Nyungga jàka ndia la paita-ya na bokulu-nggu dàngu na kuaha-nggu: la Hapanyulu, Limbia,[91] dàngu la Lindia dàngu da mini panana da mamàhi, la Tumbàlu dàngu la Yunani. Napa nyuda da-bobaru-ya na bokulu-nggu la hongada nuda da banjaru.

²⁰Welingu la tana nuda dangàndi beliha napa da angu dedimi da angu banjaru-mi ka tanda maraku lai Nyunggaha. Napa nyuda dangàndi-ha nuda da tau la tandula matua-nggu[92] la Yeruhali, ba da-kaliti njara, kalandai dàngu ota, dàngu ba dawàngu kareta dàngu karobaku, hama tuna na pakàli wàda da tau Ihirailu ba dangàndi maraku uhu nggàndumu la Umana i Miri la kanaingu ma-yarahu.

²¹Hawiangu la hongada nyuda napa kutuha ratu dàngu tau Lewi.

²²Hama tuna na awangu bidi dàngu na tana bidi ba na-padaingu ruku kuaha-nggu, tuna nu napa da wàla wuamu dàngu na tamumu ba da-padaingu.

²³La nimbihu Wulangu Bidi dàngu la nimbihu lodu Hangahu nggubulu-na na banjaru tau pinu tana napa damai pa-marubuku-ngga Nyungga la Yeruhali.

²⁴La rehi hadangu-da, napa daita-ha da metida da tau da ma-patula ngganggangu lai Nyungga. Da ana kataru da manganja da metida nda jia meti-ada, dàngu na epi na ma-pakehi-ha nyuda nda jia mbàda-ana; nuna nu na pa-maringgingu hamangu la mbuu ndàba tau na maita-ha,” wàna.